ଟୋକିଓ: ଦି ୱେଡେଡ୍ ରକ୍ସ ତଥା ମେଓଟୋ ଇୱା ନାମକ ଜାପାନର ଦୁଇଟି ପବିତ୍ର ଚଟାଣ ରହିଛି, ଯାହାକୁ ‘ସ୍ତ୍ରୀ ଏବଂ ସ୍ବାମୀ’ କିମ୍ବା ବିବାହିତ ଚଟାଣ ମଧ୍ୟ କୁହାଯାଏ। ଏହି ଚଟାଣକୁ ମହିଳା ଏବଂ ପୁରୁଷଙ୍କ ମଧ୍ୟରେ ମିଳନ, ଭଲ ପାଇବା, ସୁଖଦ ଗୃହସ୍ଥ ଜୀବନର ପ୍ରତୀକ ଭାବେ ମାନନ୍ତି। ଝିଅ-ପୁଅ ଏହି ପଥରକୁ ପବିତ୍ର ଭାବି ତା’ ସମ୍ମୁଖରେ ବିବାହ କରିଥାନ୍ତି। ରିପୋର୍ଟ ମୁତାବକ, ଏହି ପାହାଡ଼ ଜାପାନର ଫୁଟାମି ସହର ପାଖ ସମୁଦ୍ରରେ ରହିଛି। ବଡ଼ ପାହାଡ଼ଟି ୪୦ ମିଟର ପରିଧି ସହ ପ୍ରାୟ ୯ ମିଟର ଇଚ୍ଚ। ଏହି ପାହାଡ଼ର ନାମ ଇଜାନାଗି, ଯାହା ସ୍ବାମୀର ପ୍ରତୀକ। ପାହାଡ଼ ଶିଖର ଦେଶରେ ଏକ ଛୋଟ ସିଣ୍ଟୋ ଟୋରି ଗେଟ୍ ରହିଛି। ଏହି ପାହାଡ଼ର ଡାହାଣପଟେ ଆଉ ଏକ ପାହାଡ଼ ରହିଛି, ଯାହା ୩.୬ ମିଟର ଉଚ୍ଚ ଏବଂ ଏହାର ନାମ ଇଜାନାମି। ପ୍ରାୟ ୯ ମିଟର ପରିଧି ମଧ୍ୟରେ ବିସ୍ତାର କରୁଥିବାବେଳେ ଏହା ସ୍ତ୍ରୀର ଭୂମିକା ବହନ କରେ। ବିବାହିତ ହୋଇଥିବା କାରଣରୁ ଦୁଇ ପଥର ସିମେନାୱା ରଶିରେ ବାନ୍ଧି ହୋଇଛନ୍ତି, ଯାହା ଆଧ୍ୟାତ୍ମିକ ଏବଂ ସାଂସାରିକ କ୍ଷେତ୍ରରେ ବିଭାଜନର ପ୍ରତୀକ ଅଟେ। ଏହି ରଶି ସିମେନାୱା ନାମକ ଚାଉଳରୁ ପ୍ରସ୍ତୁତ କରାଯାଇଛି, ଯାହାର ଓଜନ ପ୍ରାୟ ୧ ଟନ୍ ହୋଇଥାଏ। ଏହି ରଶିକୁ ବର୍ଷରେ ୩ ଥର ମେ’, ସେପ୍ଟେମ୍ବର ଏବଂ ଡିସେମ୍ବରରେ ଆୟୋଜିତ ଏକ ଖାସ୍ ସମାରୋହରେ ବଦଳାଇ ଦିଆଯାଏ। ମେଓଟୋ ଇୱାକୁ ବର୍ତ୍ତମାନ ସମୟରେ ଲୋକେ ଏକ ତୀର୍ଥସ୍ଥଳ ଭାବେ ମାନନ୍ତି। ଝିଅ-ପୁଅ ଏହି ପାହାଡ଼ ସମ୍ମୁଖରେ ବିବାହକରି ଦୁହିଙ୍କ ସମ୍ପର୍କ ଯେପରି ଦୃଢ଼ ରହିବ ସେନେଇ ପ୍ରାର୍ଥନା କରିଥାନ୍ତି। ଦମ୍ପତିମାନେ ମଧ୍ୟ ଏହି ପାହାଡ଼ ସମ୍ମୁଖରେ ସେମାନଙ୍କ ବିବାହିତ ଜୀବନ ଏବଂ ତାଙ୍କ ଯୋଡ଼ି ମଜଭୁତ ହେବାକୁ ପ୍ରାର୍ଥନା କରିଥାନ୍ତି।