ଜୋହାନ୍ସବର୍ଗ, ୧ା୮ (ପି.ଟି.)-କୋଭିଡ୍-୧୯ ମହାମାରୀ ଯୋଗୁ ଦକ୍ଷିଣ ଆଫ୍ରିକା ଏହାର ଓ୍ବେଷ୍ଟଇଣ୍ଡିଜ ଓ ଶ୍ରୀଲଙ୍କା ଟୁର୍କୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ସ୍ଥଗିତ ରଖିଛି। କ୍ରିକେଟ ଦକ୍ଷିଣ ଆଫ୍ରିକା (ସିଏସ୍ଏ)ର ନିର୍ଦ୍ଦେଶକ ଗେମ୍ ସ୍ମିଥ୍ ଶନିବାର ଏହା ପ୍ରକାଶ କରିଛନ୍ତି। ଜାତୀୟ ଦଳ ନଭେମ୍ବରରେ ଆକ୍ସନକୁ ଫେରିବ ବୋଲି ପୂର୍ବତନ ଅଧିନାୟକ ସ୍ମିଥ୍ କହିଛନ୍ତି। ଓ୍ବେଷ୍ଟଇଣ୍ଡିଜର ମୁଖ୍ୟ କାର୍ଯ୍ୟନିର୍ବାହୀ ଜନ୍ନି ଗ୍ରେଭ୍ ଗତ ସପ୍ତାହରେ କହିଥିଲେ ଯେ, ତାଙ୍କ ବୋର୍ଡ ଦକ୍ଷିଣ ଆଫ୍ରିକା ବିପକ୍ଷରେ ୫ ମ୍ୟାଚ ବିଶିଷ୍ଟ ଟି୨୦ ସିରିଜ ଅବା ଦୁଇ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ସେପ୍ଟେମ୍ବରରେ କରିବା ଲାଗି ଆଗ୍ରହୀ ରହିଛି। ସ୍ମିଥ୍ କହିଛନ୍ତି ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ସେପ୍ଟେମ୍ବର ୧୯ରୁ ନଭେମ୍ବର ୮ ପର୍ଯ୍ୟନ୍ତ ଇଣ୍ଡିଆନ ପ୍ରିମିୟର ଲିଗ୍ ଖେଳାଯିବାର କାର୍ଯ୍ୟକ୍ରମ ରହିଛି। ଦକ୍ଷିଣ ଆଫ୍ରିକାର ବହୁ ଖେଳାଳି ଏଥିରେ ଭାଗ ନେବେ। ତେଣୁ ଟୁର୍ ପାଇଁ ସମୟ ହେବ ନାହିଁ। ପୁନଶ୍ଚ ବର୍ତ୍ତମାନ ପରିସ୍ଥିତିରେ ଦକ୍ଷିଣ ଆଫ୍ରିକା କ୍ରିକେଟ ଦଳ ବିଦେଶ ଟୁର୍ରେ ଯିବାକୁ ହେଲେ ସରକାରଙ୍କ ଅନୁମତି ଦରକାର। ତେଣୁ ଶ୍ରୀଲଙ୍କା ଟୁର୍ ମଧ୍ୟ ସମ୍ଭବପର ନୁହେଁ। କରୋନା ଭାଇରସ୍ ଯୋଗୁ ସ୍ଥଗିତ ରଖାଯାଇଥିବା ସମସ୍ତ ସିରିଜଗୁଡ଼ିକର କାର୍ଯ୍ୟସୂଚୀ ନଭେମ୍ବର ଆରମ୍ଭରେ ପୁନଃ ନିର୍ଦ୍ଧାରଣ କରାଯିବ।