ରାଜକୋଟ,୧୫।୨: ଭାରତ ଏବଂ ଇଂଲଣ୍ଡ ମଧ୍ୟରେ ପାଞ୍ଚ ମ୍ୟାଚ ଟେଷ୍ଟ ସିରିଜର ତୃତୀୟ ମ୍ୟାଚ ରାଜକୋଟରେ ଖେଳାଯାଉଛି। ରାଜକୋଟ ଟେଷ୍ଟରେ ଭାରତୀୟ ଦଳ ବିରାଟ କୋହଲିଙ୍କ ବିନା ପୁଣି ଥରେ ପଡ଼ିଆକୁ ଓହ୍ଲାଇଛି। ଇଂଲଣ୍ଡ ବିପକ୍ଷ ସମ୍ପୂର୍ଣ୍ଣ ସିରିଜରେ କୋହଲି ଟିମ ଇଣ୍ଡିଆର ଅଂଶ ନାହାନ୍ତି। ବିରାଟ କୋହଲିଙ୍କ ବିଷୟରେ ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ବୀରେନ୍ଦ୍ର ସେହ୍ବାଗ କହିଛନ୍ତି ଯେ ସମଗ୍ର ଦେଶ ତାଙ୍କୁ ମିସ୍ କରୁଛି।
କୋହଲି ବ୍ୟକ୍ତିଗତ କାରଣରୁ ଟିମ ଇଣ୍ଡିଆରୁ ବାହାରେ ଅଛନ୍ତି। ଏହାପୂର୍ବରୁ କୋହଲି କେବଳ ଇଂଲଣ୍ଡ ବିପକ୍ଷ ପ୍ରଥମ ଦୁଇଟି ଟେଷ୍ଟରୁ ତାଙ୍କ ନାମ ପ୍ରତ୍ୟାହାର କରି ନେଇଥିଲେ। ସିରିଜର ପାଞ୍ଚଟି ମ୍ୟାଚ ପାଇଁ ଟିମ ଇଣ୍ଡିଆକୁ ଦୁଇ ଭାଗରେ ଘୋଷଣା କରାଯାଇଥିଲା। ପ୍ରଥମ ଦୁଇଟି ଟେଷ୍ଟ ପାଇଁ ଭାରତୀୟ ଦଳ ଘୋଷଣା କରାଯାଇଥିଲା। ଏଥିରେ ବିରାଟ କୋହଲିଙ୍କ ନାମ ସାମିଲ କରାଯାଇଥିଲା।
କିନ୍ତୁ ପରେ ବିସିସିଆଇ ଏକ ଅପଡେଟ ଦେଇ କହିଥିଲା ଯେ, ବ୍ୟକ୍ତିଗତ କାରଣରୁ କୋହଲି ପ୍ରଥମ ଦୁଇଟି ମ୍ୟାଚରୁ ତାଙ୍କ ନାମ ପ୍ରତ୍ୟାହାର କରି ନେଇଛନ୍ତି। ତା’ପରେ ପ୍ରଶଂସକମାନେ ଆଶା କରିବା ଆରମ୍ଭ କଲେ ଯେ ସିରିଜର ଶେଷ ତିନୋଟି ଟେଷ୍ଟରେ ସେମାନେ କୋହଲିଙ୍କୁ ଧଳା ଜର୍ସିରେ ଖେଳୁଥିବାର ଦେଖି ପାରିବେ, କିନ୍ତୁ ତାହା ମଧ୍ୟ ହୋଇପାରିଲା ନାହିଁ। ଶେଷ ତିନୋଟି ଟେଷ୍ଟ ପାଇଁ ଟିମ ଇଣ୍ଡିଆ ଘୋଷଣା କରାଯାଇଥିଲା, ସେଥିରେ ମଧ୍ୟ ତାଙ୍କ ନାଁ ନ ଥିଲା।
ବର୍ତ୍ତମାନ ବୀରେନ୍ଦ୍ର ସେହ୍ବାଗ ବିରାଟ କୋହଲିଙ୍କ ବିଷୟରେ କହିଛନ୍ତି, ସମଗ୍ର ଦେଶ ତାଙ୍କୁ ମିସ୍ କରୁଛି। ମୁଁ ଆଶା କରୁଛି ଯେ ସେ ଯେଉଁଠାରେ ଅଛନ୍ତି, ସେ ଏବଂ ତାଙ୍କ ପରିବାର ଖୁସି ଥାନ୍ତୁ। ଆଶା କରୁଛି ସେ ଶୀଘ୍ର କ୍ରିକେଟ ପଡ଼ିଆକୁ ଫେରିବେ। ବିରାଟ ଜଣେ ମହାନ କ୍ରିକେଟର।