କପ୍ତିପଦା,୧୯ା୫(ଡି.ଏନ୍.ଏ.): ପାରିବାରିକ କଳହରୁ ସ୍ବାମୀଙ୍କୁ କାଠଫାଳିଆରେ ପିଟିପିଟି ମାରି ଦେଇଛନ୍ତି ସ୍ତ୍ରୀ। ଏପରି ଅଭାବନୀୟ ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲା ଶରତ ଥାନା ଅନ୍ତର୍ଗତ ସିରିଆପାଳ ଗାଁରେ। ମୃତକ ଜଣକ ହେଲେ ଲାଦୁରା ସିଂ। ତେବେ ଘଟଣା ପରେ ସ୍ତ୍ରୀ ଗୁରୁବାରୀ ସିଂ ୩ଟି ଛୁଆଙ୍କୁ ଧରି କେଉଁଆଡ଼େ ଫେରାର ହୋଇଯାଇଛନ୍ତି।
ବୁଧବାର ରାତିରେ ଲାଦୁରା ଓ ଗୁରୁବାରୀ ବଜାରକୁ ଯାଇଥିଲେ। ହାଣ୍ଡିଆ ପିଇ ବଜାରରୁ ଫେରିବା ପରେ କୌଣସି କଥାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ପରେ ନିଶାସକ୍ତ ସ୍ତ୍ରୀ ଗୁରୁବାରୀ ଉତ୍କ୍ଷିପ୍ତ ହୋଇ ସ୍ବାମୀଙ୍କ ମୁଣ୍ଡକୁ କାଠ ଫାଳିଆରେ ପିଟି ଦେଇଥିଲେ। ଘଟଣାସ୍ଥଳରେ ଲାଦୁରାଙ୍କ ମୃତ୍ୟୁ ଘଟିଥିଲା। ଗୁରୁବାର ପରିବାର ଲୋକେ ଜାଣିବା ପରେ ଲାଦୁରାଙ୍କ ସାନ ଭାଇ ସାଧବ ଶରତ ଥାନାରେ ଲିଖିତ ଅଭିଯେଗ କରିଛନ୍ତି। ପୋଲିସ ଆଜି ସକାଳୁ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ କରୁଛି।
