ପଦ୍ମପୁର,୨୪ା୧୧(ଡି.ଏନ୍.ଏ.): ଭଦ୍ରକ ଜିଲା ତିହିଡ଼ି ପୀରହାଟ ଥାନା ଅଧୀନସ୍ଥ ଖିଦିରପୁର ଗାଁରେ ଏକ ଅଭାବନୀୟ ଘଟଣା ଘଟିଛି। ପୁଅ ଝିଅ ସାଥିରେ ମିଶି ସ୍ତ୍ରୀ ସ୍ବାମୀଙ୍କୁ ଜୀବନରୁ ମାରି ଦେଇଥିବା ଅଭିଯୋଗ ହୋଇଛି। ଏ ସମ୍ପର୍କରେ ମୃତକଙ୍କ ୮୦ ବର୍ଷୀୟା ମା’ ବେଙ୍ଗ ଦାସ ଥାନାରେ ଅଭିଯୋଗ କରିଛନ୍ତି। ବୁଧବାର ରାତିରେ ଏମାନେ ମୃତକ ବାବୁଆ ଦାସଙ୍କୁ ମାଡ଼ ମାରିଥିଲେ। ତାଙ୍କୁ ପ୍ରଥମେ ପୀରହାଟ ପରେ ତିହିଡ଼ି ମେଡିକାଲକୁ ନିଆଯାଇଥିଲା। ଅବସ୍ଥା ସଙ୍କଟାପନ୍ନ ଥିବାରୁ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।
ଲିଖିତ ଅଭିଯୋଗ ଅନୁଯାୟୀ, ପୀରହାଟ ଥାନାରେ ବିଭିନ୍ନ ଦଫା ବଳରେ ୧୬୯/୨୨ ନଂ ମକଦ୍ଦମା ରୁଜୁ କରାଯାଇଛି। ଅଭିଯୁକ୍ତମାନେ ଫେରାର ହୋଇଛନ୍ତି। ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଯାଇଛି। ବ୍ୟବଚ୍ଛେଦ ରିପୋର୍ଟ ଆସିଲେ ଘଟଣାର ପ୍ରକୃତ ସତ୍ୟାସତ୍ୟ ପଦାକୁ ଆସିବ ବୋଲି ପୋଲିସ ପକ୍ଷରୁ ସୂଚନା ମିଳିଛି।