ଦାରିଙ୍ଗବାଡି,୧୭ା୧୧(ଅରୁଣ ସାହୁ): ଓଡିଶାର କାଶ୍ମୀର କୁହାଯାଉଥିବା ଦାରିଙ୍ଗବାଡିରେ ଧୀରେ ଧୀରେ ଶୀତର ପ୍ରକୋପ ବୃଦ୍ଧି ପାଉଛି। ତାପମାତ୍ରା ହ୍ରାସ ପାଇବା ସହ ପାଗ ସମ୍ପୂର୍ଣ୍ଣ ଶୁଖିଲା ରହିଛି। ଲଘୁଚାପ ବର୍ଷା ସମ୍ପୂର୍ଣ୍ଣ ଛାଡିଯାଇଛି। ଏବେ ଦିନରେ ଖରା ହେବା ସହ ଅପରାହ୍ନରୁ ଆରମ୍ଭ ହେଇଯାଉଛି ଶୀତ। ଏଥିସହ ସୁଲୁସୁଲିଆ ପବନ ବୋହୁଛି। ଫଳରେ ଶୀତର ପ୍ରକୋପ ଦ୍ବିଗୁଣିତ ହେଇଯାଉଛି। ଉକ୍ତ ବ୍ଲକର ଆଭ୍ୟନ୍ତରୀଣ ଅଞ୍ଚଳରେ ତାପମାତ୍ରା ୧୦ଡିଗ୍ରୀ ତଳେ ପାରଦ ରହୁଛି। ହଠାତ ଶୀତର ପ୍ରକୋପ ବୃଦ୍ଧି ଯୋଗୁଁ ଲୋକେ ନିଆଁ ଲଗାଇ ଶୀତର ଦାଉରୁ ନିଜକୁ ଉଷୁମ କରୁଛନ୍ତି। ଶୀତର ମଜା ନେବାକୁ ଦେଶ ବିଦେଶରୁ ପର୍ଯ୍ୟଟକଙ୍କ ଦାରିଙ୍ଗବାଡି ଆସିବା ଆରମ୍ଭ ହୋଇଗଲାଣି। ବିଶେଷ କରି ପଶ୍ଚିମବଙ୍ଗରୁ ପର୍ଯ୍ୟଟକ ଆସୁଥିବା ବେଳେ କେରଳ, ଚେନାଇ, ମହାରାଷ୍ଟ୍ର ଆଦି ରାଜ୍ୟରୁ ପର୍ଯ୍ୟଟକ ଦାରିଙ୍ଗବାଡିରେ ରାତ୍ରିଯାପନ କରି ଶୀତର ମଜା ନେଉଛନ୍ତି। ହିଲଭିୟୁ ପାର୍କ ସମେତ କଫିବଗିଚା, ଶିଶୁ ଉଦ୍ୟାନ, ଡୁଲୁରୀ ପାଇନବଣ, ଲଭର୍ସ ପଏଣ୍ଟ, ପାଟାବାନ୍ଧା ଜଳପ୍ରପାତ, ଋଷିମାଳ, ଯୋଗୀ ମଠ ଆଦି ପର୍ଯ୍ୟଟନକ୍ଷେତ୍ରରେ ପର୍ଯ୍ୟଟକମାନେ ଭିଡ଼ ଜମାଇଲେଣି। ସେହିପରି ସମସ୍ତ ପଞ୍ଚାୟତ କାର୍ଯ୍ୟାଳୟରେ ରାତ୍ରୀ ଆଶ୍ରୟସ୍ଥଳ ଖୋଲିବାକୁ ସ୍ଥାନୀୟ ବିଡ଼ିଓ ଗଦାଧର ପାତ୍ର ନିର୍ଦ୍ଦେଶ ଦେଇଛନ୍ତି। କୌଣସି ଅସହାୟ ଲୋକଙ୍କୁ ଦେଖିଲେ ସେମାନଙ୍କୁ ଆଶ୍ରୟ ସ୍ଥଳରେ ଆଶ୍ରୟ ଦେବାକୁ ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଥିବା ବିଡ଼ିଓ କହିଛନ୍ତି।