ଉଦଳା,୧୭ା୪(ଡି.ଏନ.ଏ.)- ଜଳକଷ୍ଟ ସମସ୍ୟାକୁ ନେଇ ମୟୂରଭଞ୍ଜ ଜିଲା ଉଦଳା ବ୍ଲକ ଅଧୀନ ଶାଳମୁଣ୍ଡଳି ଗ୍ରାମର ଶତାଧିକ ମହିଳା ଗରା ବାଲ୍ଟି ଧରି ରାସ୍ତାକୁ ଓହ୍ଲାଇଛନ୍ତି। ଏହି ଗ୍ରାମର ୮୦ରୁ ଅଧିକ ପରିବାର ଶୁଦ୍ଧ ପାନୀୟ ଜଳ ମୁନ୍ଦାଏ ପାଇଁ ଡହଳବିକଳ ହେଉଛନ୍ତି। ଗ୍ରାମରେ ୩ଟି ନଳକୂପ ଖନନ ହୋଇଥିଲେ ସୁଦ୍ଧା ସେଗୁଡ଼ିକ ଅଚଳ ହୋଇ ପଡ଼ିଛି। ଯାହାଫଳରେ ଲୋକେ ଗ୍ରାମରେ ଥିବା ଏକ ପାଣିଟାଙ୍କି ଉପରେ ନିର୍ଭର କରିଥାନ୍ତି। ପାଣିଟାଙ୍କି ମୋଟର ଏବଂ ଯନ୍ତ୍ରାଂଶକୁ କେହି ଦୁର୍ବୃତ୍ତ ଚୋରି କରି ନେଇଥିବାରୁ ୩ ଦିନ ହେବ ଗ୍ରାମବାସୀ ପାଣି ବୁନ୍ଦାଏ ପାଇପାରୁନାହାନ୍ତି। ଏନେଇ ଗ୍ରାମବାସୀ ବାରମ୍ବାର ସ୍ଥାନୀୟ ସରପଞ୍ଚ ଏବଂ ବିଡିଓଙ୍କୁ ଅବଗତ କରାଇଥିଲେ ସୁଦ୍ଧା କୌଣସି ସୁଫଳ ମିଳିପାରି ନାହିଁ। ଏହାର ପ୍ରତିବାଦରେ ଶତାଧିକ ମହିଳା ହାତରେ ଗରା ବାଲ୍ଟି ଧରି ଉଦଳା-ଶାଳୁମୁଣ୍ଡଳି-କୁଣ୍ଡାବାଇ ରାସ୍ତା ଅବରୋଧ କରିଥିଲେ। ଦୀର୍ଘ ସମୟ ଧରି ରାସ୍ତା ଅବରୋଧ ହୋଇଥିଲେ ମଧ୍ୟ ଘଟଣାସ୍ଥଳରେ କୌଣସି ସରକାରୀ ଅଧିକାରୀ ପହଞ୍ଚି ନ ଥିଲେ। ଖବରପାଇ ୧ନଂ. ଜୋନ ଜିଲା ପରିଷଦ ସଦସ୍ୟ ଚକ୍ରଧର ସିଂ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ମହିଳାଙ୍କୁ ବୁଝାସୁଝା କରିବା ସହିତ ଘଟଣା ବାବଦରେ ବିଡିଓ ଏବଂ ଆରଡବ୍ଲ୍ୟଏସ୍ଏସର ଅଧିକାରୀଙ୍କୁ ଜଣାଇଥିଲେ। ପରେ ଗ୍ରାମ ନିକଟରେ ଏକ ନଳକୂପ ବସାଯିବା ପରେ ରାସ୍ତା ଅବରୋଧ ପ୍ରତ୍ୟାହୃତ ହୋଇଥିଲା ା
