ଭଦ୍ରକ ଅଫିସ, ୮।୬ – ସିଏଲଏଫର ସଭାନେତ୍ରୀ ସମ୍ପାଦିକାଙ୍କୁ ମାସିକ ଭତ୍ତା, ପୋଷାକ ବାବଦରେ ବାର୍ଷିକ ଦୁଇହଜାର ଟଙ୍କା, ପରିଚୟ ପତ୍ର ପ୍ରଦାନ ଆଦି ଦାବି ନେଇ ଭଦ୍ରକ ସହରାଞ୍ଚଳର ସ୍ବୟଂ ସହାୟିକା ଗୋଷ୍ଠୀର ମହିଳା ମାନେ ମଙ୍ଗଳବାର ଜିଲାପାଳଙ୍କ ଅଫିସ ଆଗରେ ବିକ୍ଷୋଭ ପ୍ରଦର୍ଶନ କରିବା ସହ ଗେଟ ଡେଇଁ ଭିତରକୁ ଧସେଇ ପଶିଥିଲେ। ପୋଲିସ ସହ ବହୁ ସମୟ ଧରି ମହିଳା ମାନଙ୍କର ଧସ୍ତାଧସ୍ତି ପରେ ପୋଲିସ ବୁଝାଶୁଝା କରି ଗେଟ ବାହାରକୁ ମହିଳାମାନଙ୍କୁ ଆଣିଥିଲେ।
ସୂଚନା ଅନୁଯାୟୀ, ଭଦ୍ରକ ଜିଲାର ସାଳନ୍ଦୀ ସହର ସ୍ତରୀୟ ମହାସଂଘ ପକ୍ଷରୁ ବହୁ ସଂଖ୍ୟାର ମହିଳା୧୦ ଦଫା ଦାବି ନେଇ ବିଭିନ୍ନ ନାରାବାଜି ସହ ସହର ଶୋଭାଯାତ୍ରା କରି ଜିଲାପାଳଙ୍କ ଅଫିସ ଫାଟକ ଆଗରେ ପହଞ୍ଚିଥିଲେ। ଗ୍ରାମାଞ୍ଚଳରେ ପ୍ରତି ମହିଳା ଆଞ୍ଚଳିକ ମଞ୍ଚର ସଭାନେତ୍ରୀ ସମ୍ପାଦିକାଙ୍କୁ ସରକାର ମାସିକ ଭତ୍ତା ପ୍ରଦାନ କରୁଥିବା ବେଳେ ସହରାଞ୍ଚଳରେ ଦିଆଯାଉନାହିଁ। ଏନେଇ ଆଗରୁ ଜିଲାପାଳଙ୍କୁ ଏକାଧିକବାର ଲିଖିତ ଭାବେ ଜଣାଇଥିଲେ ବି କୌଣସି ସୁଫଳ ମିଳିନଥିବାରୁ ମହିଳା ମାନେ ବିକ୍ଷୋଭ ପ୍ରଦର୍ଶନ କରିବା ସହ ଜିଲାପାଳଙ୍କୁ ଭେଟିବା ପାଇଁ କହିଥିଲେ। କିନ୍ତୁ ପୋଲିସ ଅନୁମତି ନ ଦେବାରୁ କାର୍ଯ୍ୟାଳୟକୁ ଧସେଇ ପଶିବା ଉଦ୍ୟମ କରିଥିଲେ। ସାଳନ୍ଦୀ ସିଏଲଏଫର ସମ୍ପାଦିକା ଜୟନ୍ତୀ ବିଶ୍ୱାଳ, ରୁକସାନା ବିବିଙ୍କ ନେତୃତ୍ୱରେ ବହୁ ସଂଖ୍ୟାର ମହିଳା ଏହି ପ୍ରତିବାଦରେ ସାମିଲ ହୋଇଥିଲେ।
