ବ୍ରହ୍ମପୁର ଅଫିସ,୮ା୮: ବର୍ତ୍ତମାନ ସମୟରେ ଗର୍ଭବତୀ ମହିଳାମାନେ ପ୍ରସବ ସମୟରେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। କୌଣସି ସରକାରୀ ଡାକ୍ତରଖାନାକୁ ଜରୁରିକାଳୀନ ପରିସ୍ଥିତିରେ ଚିକିତ୍ସା କିମ୍ବା ପ୍ରସବ ପାଇଁ ଗଲେ ପ୍ରଥମେ ନମୁନା ପରୀକ୍ଷା କରିବା ପାଇଁ ଧାଡ଼ିରେ ଠିଆ ହେବାକୁ ପଡୁଛି, ଯାହାକି ଅତି ଚିନ୍ତାଜନକ ବିଷୟ। କରୋନା ମହାମାରୀ ଭଳି ଭୟାନକ ପରିସ୍ଥିତିରେ ଏମିତି ଏକ ଉଦାହରଣ ଗଞ୍ଜାମ ଜିଲା କୁକୁଡାଖଣ୍ଡି ବ୍ଲକରେ ସାମ୍ନାକୁ ଆସିଛି । ଯାହା ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। ଲାଞ୍ଜିଆ ପଞ୍ଚାୟତର ପଦରବାଲି ଗ୍ରାମର ଜଣେ ଗର୍ଭବତୀ ମହିଳା କୌଣସି କାରଣ ବଶତଃ ସାମାନ୍ୟ ଲକ୍ଷଣ ଦେଖାଦେବାରୁ ସ୍ଥାନୀୟ ଅଙ୍ଗନଓ୍ବାଡ଼ି କର୍ମୀ ଓ ପ୍ରଶାସନର ସହଯୋଗରେ ନମୁନା ପରୀକ୍ଷା କରାଯାଇଥିଲା ଏବଂ ପରବର୍ତ୍ତୀ ସମୟରେ ତାଙ୍କର ନମୁନା ମଧ୍ୟ ପଜିଟିଭ୍ ଆସିଥିଲା। ଡାକ୍ତରଙ୍କ କହିବା ଅନୁସାରେ କେବଳ ୧୦ ଦିନ ସମୟ ଥିଲା ପ୍ରସବ ପାଇଁ ଯାହାକୁ ଅତି ଗୁରୁତର ସହିତ ନେଇ ପ୍ରଥମେ ଘରୋଇ ସଙ୍ଗରୋଧରେ ରଖାଯାଇଥିଲା ମହିଳା ଜଣଙ୍କୁ। ତହସିଲଦାର ଡଃ. ଇପ୍ସିତା ପ୍ରିୟଦର୍ଶିନୀ ମିଶ୍ର, କୁକୁଡ଼ାଖଣ୍ଡି ଗୋଷ୍ଠୀ ଚିକିତ୍ସା ଅଧିକାରୀ ରାମଚନ୍ଦ୍ର ମହାପାତ୍ର, ଅଙ୍ଗନଓ୍ବାଡ଼ି କର୍ମୀ ଦୀପ୍ତିମୟୀ ଦେବୀ ପ୍ରମୁଖ ନିୟମିତ ଉକ୍ତ ମହିଳାଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିବା ସହ ଚିକିତ୍ସା କରାଯାଇ ଆବଶ୍ୟକୀୟ ଔଷଧ ତାଙ୍କୁ ପ୍ରଦାନ କରାଯାଉଥିଲା। କେବଳ ୯ ଦିନ ସଙ୍ଗରୋଧରେ ରହିବା ପରେ ଯେତେବେଳେ ପ୍ରସବ ତାରିଖ ଆସିଲା ପୁନର୍ବାର ନମୁନା ପରୀକ୍ଷା କରାଯାଇଥିଲା। ସେତେବେଳେ ଗର୍ଭବତୀ ମହିଳା ଜଣଙ୍କ ରିପୋର୍ଟ ନେଗେଟିଭ୍ ଆସିଥିଲା। ଏମ୍କେସିଜିରେ ଅସ୍ତ୍ରୋପଚାର ମାଧ୍ୟମରେ ସଂପୃକ୍ତା ମହିଳା ଜଣଙ୍କ ଏକ ଶିଶୁପୁତ୍ର ଜନ୍ମ ଦେଇଥିଲେ। ବର୍ତ୍ତମାନ ଉଭୟ ମା’ ଓ ଶିଶୁ ସୁସ୍ଥ ଥିବା ଜଣାପଡ଼ିଛି।