ଖଲ୍ଲିକୋଟ,୨୯ା୫(ପ୍ରଶାନ୍ତ କୁମାର ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ସିକୁଳା ଗ୍ରାମର ଜଣେ ମହିଳା ଗ୍ୟାସ୍ଚୁଲାରୁ ନିଆଁ ଲାଗି ଗୁରୁତର ଅବସ୍ଥାରେ ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ଆସିଥିବା ବେଳେ ଏଠାରେ ତାଙ୍କର ବୁଧବାର ମୃତ୍ୟୁ ହୋଇଛି।
ମିଳିଥିବା ସୂଚନାନୁଯାୟୀ, ଖଲ୍ଲିକୋଟ ଥାନା ଅନ୍ତର୍ଗତ ନୂତନ ବ୍ରହ୍ମପୁର ଗ୍ରାମର ମିନତି ଲେଙ୍କା ଗତ ୧୪ ବର୍ଷ ତଳେ ସିକୁଳା ଗ୍ରାମର ଯୋଗେନ୍ଦ୍ର ଲେଙ୍କାଙ୍କୁ ବିବାହ କରିଥିଲେ। ଇତିମଧ୍ୟରେ ତାଙ୍କର ଦୁଇଟି ପୁଅ ଅଛନ୍ତି। ଗତ ୧୫ ତାରିଖ ସନ୍ଧ୍ୟାରେ ମିନତି ରୋଷେଇ କରିବା ପାଇଁ ଗ୍ୟାସ୍ଚୁଲା ଅନ୍ କରିବା ମାତ୍ରେ ନିଆଁ ଜଳି ଉଠିଥିଲା। ମିନତିଙ୍କ ଶରୀରରେ ନିଆଁ ଲାଗି ପ୍ରାୟ ୭୦ ଭାଗ ପୋଡ଼ି ଯାଇଥିଲା। ମିନତିଙ୍କ ଚିତ୍କାର ଶୁଣି ପାଖ ରୁମ୍ରେ ଥିବା ସ୍ବାମୀ ଯୋଗେନ୍ଦ୍ର ଲେଙ୍କା ଓ ୧୧ ବର୍ଷର ସାନ ପୁଅ କାହ୍ନା ଦୌଡ଼ି ଆସି ବଞ୍ଚାଇବାକୁ ଚେଷ୍ଟା କରିବା ବେଳେ ସେମାନେ ମଧ୍ୟ ନିଆଁରେ ପୋଡ଼ି ହୋଇ ଆହତ ହୋଇଥିଲେ। ତୁରନ୍ତ ପରିବାର ଲୋକେ ତାଙ୍କୁ ଗୁରୁତର ଅବସ୍ଥାରେ ଚିକିତ୍ସା ପାଇଁ ପ୍ରଥମେ କୋଦଳା ଓ ପରେ ବ୍ରହ୍ମପୁର ବଡ଼ ମେଡ଼ିକାଲକୁ ନେଇ ଯାଇଥିଲେ। ସେଠାରେ ସ୍ବାସ୍ଥ୍ୟାବସ୍ଥା ଅଧିକ ଗୁରୁତର ହେବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଥିଲା। ତେବେ ସେଠାରେ ଆଶା ଜନକ ଚିକିତ୍ସା ସୁବିଧା ନ ମିଳିବାରୁ ମିନତିଙ୍କ ବାପ ଘର ନୂତନ ବ୍ରହ୍ମପୁରକୁ ନେଇ ଆସିଥିଲେ। ଆଜି ସନ୍ଧ୍ୟାରେ ମିନତିଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ଆଣିଥିଲେ। ତେବେ ଏଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତ୍ୟୁ ଖବର ଶୁଣି ମେଡିକାଲ ପରିସରରେ ଶୋକାକୁଳ ପରିବେଶ ସୃଷ୍ଟି ହୋଇଛି। ସେପଟେ ଘରର ଏଭଳି ଅବସ୍ଥା ଦେଖି ମିନତିଙ୍କ ଶ୍ୱଶୁର ବିଜୟ ଲେଙ୍କା (୭୦) ଚିନ୍ତାରେ ଗତ ସୋମବାର ଆଖି ବୁଜିଛନ୍ତି। ମିନତିଙ୍କ ମୃତ୍ୟୁ ସମ୍ପର୍କରେ ମେଡିକାଲ ପକ୍ଷରୁ ଖଲ୍ଲିକୋଟ ଥାନା ପୋଲିସକୁ ଖବର ଦିଆଯାଇଥିବା ସୂଚନା ମିଳିଛି।