ସମାଜରେ ଭୂତ ଅଛନ୍ତି କି ନାହିଁ ସେ ନେଇ ପ୍ରାୟ ସବୁବେଳେ ଦ୍ୱନ୍ଦ୍ୱ ଦେଖାଯାଇଥାଏ। ବିଜ୍ଞାନ ମତରେ ଭୂତ ବୋଲି କିଛି ନାହିଁ। ଏସବୁ ମନର ଏକ ଭ୍ରମ। ମାତ୍ର ଅନେକ ଲୋକ ଅଛନ୍ତି ଯେଉଁମାନେ ଭୂତକୁ ବିଶ୍ୱାସ କରନ୍ତି। ଭୂତ ସହିତ ପ୍ରେମ, ଶୁଣିବା ପାଇଁ ଅଜବ ଲାଗିଥିଲେ ମଧ୍ୟ ଇଂଲଣ୍ଡରେ ଏଭଳି ଏକ ଘଟଣା ସାମ୍ନାକୁ ଆସିଛି।
ଇଂଲଣ୍ଡର ଆମେଥାଇଷ୍ଟ ରିଲାମ ନାମକ ଜଣେ ମହିଳା କେବଳ ଭୂତ ସହିତ ପ୍ରେମ ସମ୍ପର୍କ ରଖି ନ ଥିଲେ, ତାଙ୍କ ସହ ବିଦେଶକୁ ଛୁଟି କାଟିବାକୁ ମଧ୍ୟ ଯାଇଥିଲେ। ମାତ୍ର ରିଲାମ ବର୍ତ୍ତମାନ ଦୀର୍ଘ ଦିନର ସମ୍ପର୍କକୁ ଭାଙ୍ଗିବାକୁ ଚାହୁଁଛନ୍ତି। ରିଲାମ ଦାବି କରିଛନ୍ତି ଯେ, ସେ ଏକ ଭୂତ ସହିତ ପ୍ରେମ ସମ୍ପର୍କରେ ଥିଲେ। କିଛି ଦିନ ପୂର୍ବରୁ ସେ ଏହା ମଧ୍ୟ କହିଥିଲେ ଯେ, ସେ ଏକ ଭୂତ ସନ୍ତାନର ମା’ ହେବାକୁ ଚାହୁଁଛନ୍ତି। କିନ୍ତୁ ବର୍ତ୍ତମାନ ରିଲାମ ଭୂତ ସହିତ ରହିଥିବା ସବୁ ସମ୍ପର୍କ ତୁଟାଇ ଦେବାକୁ ଚାହାଁନ୍ତି।
୨୦୧୮ ମସିହାରେ ରିଲାମ ଏକ ଟିଭି ଚ୍ୟାନେଲକୁ ଦେଇଥିବା ସାକ୍ଷାତକାରରେ ଦାବି କରିଥିଲେ ଯେ, ସେ ଗତ କିଛି ବର୍ଷ ଧରି ଭୂତଙ୍କ ସହ ସମ୍ପର୍କରେ ଥିଲେ। କିନ୍ତୁ ବର୍ତ୍ତମାନ ସେ କହିଛନ୍ତି ଯେ, ସେ ଆଉ ଭୂତକୁ ବିବାହ କରିବେ ନାହିଁ। କାରଣ ବର୍ତ୍ତମାନ ତାଙ୍କ ମଧ୍ୟରେ ଆଉ କିଛି ସମ୍ପର୍କ ନାହିଁ । ଆହୁରି ମଧ୍ୟ ସେ କହିଛନ୍ତି, ଆମେ ଦୁହେଁ ଛୁଟିରେ ଥାଇଲାଣ୍ଡ ଯାଇଥିଲୁ। ଯେତେବେଳେ ସେ ଛୁଟି ପାଳନ କରିବା ପରେ ଫେରିଗଲେ, ଭୂତର ଆଚରଣ ସମ୍ପୂର୍ଣ୍ଣ ବଦଳିଗଲା। ମୁଁ ଭାବୁଛି ସେ ଅନ୍ୟ କାହାକୁ ଭଲ ପାଉଥିଲେ।
ଭୂତ ସହିତ ପ୍ରେମ ଦାବି କରି ସେ କହିଥିଲେ ଯେ, ସେ ଭଲ ପାଉଥିବା ଭୂତ ଘରକୁ ଆହୁରି ଅନେକ ଆତ୍ମା ଆଣିଥିଲେ। ସେମାନେ ସମସ୍ତେ ଘରେ ଡ୍ରଗ୍ସ ନେଉଥିଲେ ଏବଂ ପାର୍ଟି କରୁଥିଲେ। ସେ ଘରକୁ ଆଣିଥିବା ଆତ୍ମାମାନେ ଅଜବ ଶବ୍ଦ କରୁଥିଲେ। ଏପରି ପରିସ୍ଥିତିରେ ସେ ଏକାକୀ ରହିବାକୁ ସ୍ଥିର କଲେ ଏବଂ ତାଙ୍କ ସହ ସମସ୍ତ ସମ୍ପର୍କ ସମାପ୍ତ ହେଲା ବୋଲି ରିଲାମ କହିଛନ୍ତି।