ଚିତ୍ରକୋଣ୍ଡା,୯।୬(ଡି.ଏନ୍.ଏ.): ଗଞ୍ଜେଇ ଚାଲାଣ ସୂଚନା ପାଇ ମାଲକାନଗିରି ଜିଲା ଚିତ୍ରକୋଣ୍ଡା ଥାନା ପୋଲିସ ସୋମବାର ରାତିରେ ନୂଆଗୁଡ଼ା ପଞ୍ଚାୟତର ଆର୍ଏସସି ୧୩, ଆର୍ଏସି ୧୦, ଆର୍ଏସି ୧୧ ଗ୍ରାମରେ ଯାନବାହନ ଯାଞ୍ଚ ସମୟରେ ୧୫୯୬ କେଜି ୩୦୦ ଗ୍ରାମ ଗଞ୍ଜେଇ ଜବତ କରିଛି। ଏହି ଘଟଣାରେ ୨ ଜଣଙ୍କୁ ଗିରଫ କରାଯାଇଛି। ସେମାନେ ହେଲେ ଆର୍ଏସି ୧୩ ଗ୍ରାମର ଦଶରଥ ଖିଲ(୨୭) ଏବଂ କେଶବ ଖଡା(୨୩)।
ସୂଚନା ଅନୁଯାୟୀ, ଆର୍ଏସି ୧୩ ଗ୍ରାମ ନିକଟରେ ଦୁଇଟି ଗାଡ଼ି ନମ୍ବର ଏପି ୦୫ ଇଡବ୍ଲ୍ୟୁ ୨୩୫୯ ଏବଂ ଓଡି ୧୦ ଡି ୭୦୪୩ ଏବଂ କେତେଜଣ ଲୋକ ଠିଆ ହୋଇଥିବା ପୋଲିସ ଦେଖିଥିଲା। ପୋଲିସ ସେଠାକୁ ଯାଇ ଗଞ୍ଜେଇ ଚାଲାଣ ହେଉଥିବା ଜାଣିବାକୁ ପାଇଥିଲା। ୬୪ ବ୍ୟାଗ୍ ଗଞ୍ଜେଇ ରଖିଥିବାବେଳେ ପୋଲିସକୁ ଦେଖି କିଛି ଲୋକ ଜଙ୍ଗଲ ଦିଗକୁ ଦୌଡ଼ିଥିଲେ। ସେମାନଙ୍କ ମଧ୍ୟରୁ ପୋଲିସ ୨ ଜଣଙ୍କୁ ଧରିବାରେ ସଫଳ ହୋଇଥିଲା। ଏହି ସମୟରେ ଆର୍ଏସି ୧୩ ଗ୍ରାମବାସୀ ସେଠାରେ ଉପସ୍ଥିତ ଥିଲେ। ଗାଁ ଲୋକେ ପୋଲିସକୁ ଘେରିଯାଇ ଗଞ୍ଜେଇ ଜବତ ନ କରି ଛାଡ଼ିଦେବାକୁ କହିଥିଲେ। ପୋଲିସ ସେମାନଙ୍କ କଥାକୁ ଖାତିର ନ କରି ଗଞ୍ଜେଇ ଜବତ କରିଥିବା ବୁଧବାର ଏସ୍ଡିପିଓ ଅଂଶୁମାନ ଦ୍ୱିବେଦୀ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ତେବେ ଉକ୍ତ ଗଞ୍ଜେଇ ଜବତ ଘଟଣାରେ ମଙ୍ଗଳବାର ଆର୍ଏସସି ୧୩ ଗ୍ରାମର କେତେଜଣ ମହିଳା ପୋଲିସ ବିରୋଧରେ ଅଭିଯୋଗ କରିଛନ୍ତି। ବିନା କାରଣରେ ଚିତ୍ରକୋଣ୍ଡା ପୋଲିସ ଗାଁରେ ପଶି ଘରୁ ଡାକି ମହିଳାମାନଙ୍କୁ ମାଡ଼ ମାରିଥିବା ସେମାନେ ଅଭିଯୋଗ କରିଛନ୍ତି। ଏଥିରେ କେତେଜଣ ମହିଳା ଗୁରୁତର ଏବଂ ଆହତ ହୋଇ ଡାକ୍ତରଖାନା ଯିବାକୁ ପଡ଼ିଥିବା ସେମାନେ ଗଣମାଧ୍ୟମ ନିକଟରେ ପ୍ରକାଶ କରିଛନ୍ତି। ମହିଳାମାନଙ୍କ କହିବା ହେଲା ଚିତ୍ରକୋଣ୍ଡା ଥାନାର ୫୦ରୁ ଊର୍ଦ୍ଧ୍ୱ ପୋଲିସ କର୍ମଚାରୀ ୫ଟି ଗାଡ଼ିରେ ଆସି ରାତି ପ୍ରାୟ ଗୋଟାଏ ବେଳେ ଗାଁରେ ପଶିଥିଲେ।
କୌଣସି କାରଣ ନ ଦର୍ଶାଇ ଘରୁ ଡାକି ମାରପିଟ କରିଥିଲେ। ଅଭିଯୋଗ ନେଇ ଚିତ୍ରକୋଣ୍ଡା ଥାନା ଅଧିକାରୀ ଅନିଲ କୁମାର ପରିଡ଼ାଙ୍କୁ ପଚାରିବାରୁ ସେ ଅଭିଯୋଗକୁ ଖଣ୍ଡନ କରିବା ସହ ଏହା ଭିତ୍ତିହୀନ ବୋଲି କହିଛନ୍ତି। ଗଞ୍ଜେଇ ଜବତ କରି ୨ ଜଣଙ୍କୁ ଗିରଫ କରାଯାଇଥିବାରୁ ଗ୍ରାମବାସୀ ପୋଲିସକୁ ବଦନାମ କରିବାକୁ ଏଭଳି ଅଭିଯୋଗ କରିଥିବା କହିଛନ୍ତି। ଅନ୍ୟପକ୍ଷରେ ମାଲକାନଗିରି ଏସ୍ପି ନିତିଶ ଓ୍ବାଧଓ୍ବାନୀ ମଧ୍ୟ ଏହା ଏକ ମିଥ୍ୟା ଆରୋପ ବୋଲି କହିଛନ୍ତି।