ପାଟଣା,୨୮।୯(ସ୍ବ.ପ୍ର.): କେନ୍ଦୁଝର ଜିଲା ଢେଙ୍କିକୋଟ ପାଟଣା ଦେଇ ଯାଇଥିବା ୨୨୦ନଂ. ଜାତୀୟ ରାଜପଥରେ ବୁଧବାର ଘଟିଛି ଏକ ଦୁର୍ଘଟଣା। ସକାଳୁ ମଙ୍ଗଳପୁର ଛକ ଏଞ୍ଜେଲ ଢାବା ନିକଟରେ ଏକ ଟ୍ରକ୍ ଧକ୍କାରେ ଜଣେ ବୃଦ୍ଧାଙ୍କ ମୃତ୍ୟୁ ଘଟିଥିବା ବେଳେ ତାଙ୍କ ସ୍ବାମୀ ଓ ଦିଅର ଆହତ ହୋଇଛନ୍ତି। ମୃତା ହେଲେ ଘଟଗାଁ ବ୍ଲକ ପାଇଦା ପାଟଣା ପଞ୍ଚାୟତ ନୁସୁରିପଶି ଗ୍ରାମର ସୋମବାରୀ ମୁଣ୍ଡା। ଆହତ ହେଲେ ତାଙ୍କ ସ୍ବାମୀ ରବି ମୁଣ୍ଡା ଓ ଦିଅର ବନମାଳୀ। ସମସ୍ତଙ୍କୁ ଉଦ୍ଧାର କରି ଅଗ୍ନିଶମ କର୍ମଚାରୀ ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ଡାକ୍ତର ସୋମବାରୀଙ୍କୁ ମୃତ ଘୋଷଣା କରିଛନ୍ତି। ଘଟଣାସ୍ଥଳରେ ପାଟଣା ଥାନା ଏସ୍ଆଇ ମନୋରମା ସ୍ବାଇଁ ପହଞ୍ଚି ଛାନ୍ଭିନ୍ ତଦନ୍ତ ଚଳାଇଛନ୍ତି।
ସୂଚନା ଅନୁଯାୟୀ, ରବି ସାନଭାଇ ବନମାଳୀଙ୍କ ସହ ସୋମବାରୀଙ୍କୁ ଡାକ୍ତରଙ୍କୁ ଦେଖେଇବା ଲାଗି ମେଡିକାଲ ନେଇ ଯାଉଥିେଲେ। ସେମାନେ ଏକ ଲୁନାରେ ଯାଉଥିବା ବେଳେ ପଛପଟୁ ଆସୁଥିବା ଏକ ଟ୍ରକ୍ ତାଙ୍କୁ ଧକ୍କାଦେଇ କରଞ୍ଜିଆ ଆଡ଼କୁ ପଳାଇ ଯାଇଥିବା ଜଣାପଡ଼ିଛି।