ନୂଆପଡ଼ା,୫ା୧୧(ମକାରୁ ବେମାଲ) ନୂଆପଡ଼ା ଜିଲା ସଦର ରେଞ୍ଜ୍ ଧରମବନ୍ଧା ଥାନା ସିଲିଆରିବାହାରା ଗଁାରେ ଶନିବାର ଜଣେ ମହିଳାଙ୍କୁ ମାରି ଖାଇଛି କଲରାପତରିଆ ବାଘ। ମୃତା ହେଲେ ସିଲିଆରିବାହାରା ଗଁାର ପୂର୍ବତନ ୱାର୍ଡମେମ୍ବର ରାମେଶ୍ବରୀ ମାଝି (୫୦)। ସେହିପରି ଏହି ଗଁାଠାରୁ କିଛି ଦୂର କୋଦପାଲିରେ ଜଣେ ଶିଶୁକୁ ବାଘ ଝାମ୍ପିନେବାବେଳେ ଗଁା ଲୋକେ ଉଦ୍ଧାର କରିଛନ୍ତି। ଗୁରୁତର ଅବସ୍ଥାରେ ଶିଶୁଟିକୁ ନୂଆପଡ଼ା ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
ଶୁକ୍ରବାର ସାରେ ରାମେଶ୍ୱରୀ ଗଁାମୁଣ୍ଡକୁ ଶୌଚ ପାଇଁ ଯାଇଥିଲେ। ହେଲେ ଘରକୁ ଫେରି ନ ଥିଲେ। ରାତିରେ ପରିବାର ଲୋକେ ବହୁ ଖୋଜାଖୋଜି କରିଥିଲେ ମଧ୍ୟ କୌଣସି ପତ୍ତା ମିଳି ନ ଥିଲା। ଶନିବାର ସକାଳୁ ଗଁାମୁଣ୍ଡରେ ମହିଳାଙ୍କୁ କଲରାପତରିଆ ବାଘ ଖାଉଥିବା ଲୋକେ ଦେଖିବାକୁ ପାଇଥିଲେ। ଗଁା ଲୋକେ ବାଘକୁ ଘଉଡ଼ାଇବାକୁ ଉଦ୍ୟମ କରିଥିଲେ। ଦୀର୍ଘ ସମୟ ଧରି ବାଘ ଓ ଲୋକଙ୍କ ମଧ୍ୟରେ ଛକାପଞ୍ଝା ଲାଗି ରହିଥିଲା। ହେଲେ ଘଉଡ଼ାଇବା ପାଇଁ ଯାଇଥିବା ଲୋକଙ୍କୁ ବାଘ ଗୋଡ଼ାଉଥିଲା। ମଧ୍ୟାହ୍ନରେ ଗଁା ଲୋକେ ସଂଘବଦ୍ଧ ଭାବେ ଠେଙ୍ଗାବାଡ଼ି ଧରି ବାଘକୁ ଘଉଡ଼ାଇଥିଲେ। ସେଠାରୁ ମହିଳାଙ୍କ ଖଣ୍ଡ ବିଖଣ୍ଡିତ ମୃତଦେହ ମିଳିଥିଲା। ବାଘ ମହିଳାଙ୍କ ମୁଣ୍ଡ ଓ ଗଣ୍ଡିକୁ ଅଲଗା କରିଦେଇଥିବାବେଳେ ଦେହର ମାଂସକୁ ପୁଳା ପୁଳା ଖାଇଯାଇଥିଲା। ସନ୍ଧ୍ୟା ସମୟରେ କୋଦପାଲି ଗଁାର ବାଲକରାମ ଧରୁଆଙ୍କ ୫ବର୍ଷର ପୁଅ ନୀଳକଣ୍ଠ ଖେଳୁଥିବାବେଳେ ବାଘ ଝାମ୍ପି ନେଇଥିଲା। ଗଁା ଲୋକେ ଘଉଡ଼ାଇବାରୁ ବାଘ ଛାଡ଼ିପଳାଇଥିଲା। ଗୋଟିଏ ଦିନରେ ୨ଟି ଘଟଣା ଘଟିବାରୁ ବାଘ ଭୟରେ ଅଞ୍ଚଳବାସୀ ଆତଙ୍କିତ ହୋଇପଡ଼ିଛନ୍ତି। ସନ୍ଧ୍ୟାରେ ବନ ବିଭାଗ ଟିମ୍ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଛି। ମୃତକଙ୍କ ପରିବାରକୁ କ୍ଷତିପୂରଣ ଦାବିରେ ଲୋକେ ମୃତଦେହ ଉଠାଇବାକୁ ଦେଇନାହାନ୍ତି। ଏବେ ଗଁାରେ ଉତ୍ତେଜନା ଦେଖାଦେଇଛି।
ଉଲ୍ଲେଖଯୋଗ୍ୟ, ଗତ ୩୦ ତାରିଖ ଭରୁଆମୁଣ୍ଡା ପଞ୍ଚାୟତ କଟିଙ୍ଗପାଣି ଗଁାର ଗୌଧସ ପଡ଼ାର ହୁମନ ଧରୁଆଙ୍କ ପୁଅ ଡମ୍ବରୁ (୭) ସାଙ୍ଗଙ୍କ ସହ ଗଁା ଦାଣ୍ଡରେ ଖେଳୁଥିବା ସମୟରେ ପାଖ ସୁନାବେଡ଼ା ଅଭୟାରଣ୍ୟରୁ କଲରାପତରିଆ ବାଘ ଆସି ଟାଣି ନେଇଥିଲା। ଗ୍ରାମବାସୀ ଡମ୍ବରୁଙ୍କୁ ଉଦ୍ଧାର କରିଥିଲେ ମଧ୍ୟ ତାଙ୍କ ଜୀବନ ଚାଲିଯାଇଥିଲା। ୬ ଦିନ ବ୍ୟବଧାନରେ ପୁଣି ଜଣେ ମହିଳାଙ୍କୁ ମାରି ଖାଇଲା। ଗୋଟିଏ ସପ୍ତାହ ନ ପୂରୁଣୁ ବାଘ ଆକ୍ରମଣରେ ଦୁଇଟି ଜୀବନ ଚାଲିଯାଇଥିବାରୁ ଲୋକେ ଆତଙ୍କିତ ହୋଇପଡ଼ିଛନ୍ତି। ବାଘକୁ ଶୀଘ୍ର ଧରି ଅନ୍ୟତ୍ର ସ୍ଥାନାନ୍ତର କରାଯାଉ ବୋଲି ସାଧାରଣରେ ଦାବି ହେଉଛି।