ବିଜେପୁର,୭।୫: ବରଗଡ଼ ଜିଲା ବିଜେପୁର ଥାନା ଅଧୀନ ସାତବନ୍ଧ ଗ୍ରାମରେ ଶୁକ୍ରବାର କରୋନା ଆକ୍ରାନ୍ତ ଜଣେ ବୃଦ୍ଧ ମାନସିକ ଭାରସାମ୍ୟ ହରାଇ ଦଉଡି ଦେଇ ଆତ୍ମହତ୍ୟା କରିଛନ୍ତି। ମୃତକ ହେଲେ ଅର୍ଜୁନ ମେହେର (୬୫)। ମିଳିଥିବା ସୂଚନା ମୁତାବକ ସାତବନ୍ଧ ଗ୍ରାମର ଅର୍ଜୁନ ମେହେର ଏବଂ ତାଙ୍କ ସ୍ତ୍ରୀ ଚହଲ ମେହେରଙ୍କୁ ଜ୍ବର ହେଉଥିବାରୁ ବିଜେପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ଆସିଥିଲେ। ଚହଲଙ୍କ କରୋନା ନେଗେଟିଭ ରିପୋର୍ଟ ଆସିଥିବା ବେଳେ ଅର୍ଜୁନଙ୍କ ପଜିଟିଭ ଆସିଥିଲା। ହେଲେ ଚହଲଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ଭୀମ୍ସାର ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ହେଲେ ଅର୍ଜୁନଙ୍କୁ ଘରକୁ ପଠାଇ ଦିଆଯାଇଥିଲା। ଅର୍ଜୁନ ମାନସିକ ଭାରସାମ୍ୟ ହରାଇ ଘରେ ଦଉଡି ଦେଇ ଆତ୍ମହତ୍ୟା କରିଥିଲେ । ଖବର ପାଇ ବିଜେପୁର ପୋଲିସ ସନ୍ଧ୍ୟାରେ ସାତବନ୍ଧ ଗାଁରେ ପହଞ୍ଚିଥିଲା। ରାତି ହୋଇଥିବାରୁ ଶନିବାର ମୃତଦେହ ପଞ୍ଚନାମା କରାଯିବ ବୋଲି ପୋଲିସ କହିଛି। ବରଗଡ଼ର ନିଷ୍ଠା ପରିବାର ପକ୍ଷରୁ ଶନିବାର ମୃତଦେହ ଶତ୍କାର କରାଯିବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି। ଅନ୍ୟପକ୍ଷରେ ଭୀମ୍ସାରରେ ଚିକିତ୍ସାଧିନ ଅବସ୍ଥାରେ ଚହଲଙ୍କ ମଧ୍ୟ ମୃତ୍ୟୁ ଘଟିଥିବା ସୂଚନା ମିଳିଛି। ଗୋଟିଏ ଦିନରେ ବୃଦ୍ଧ ଦମ୍ପତିଙ୍କ ମୃତ୍ୟୁକୁ ନେଇ ଅଞ୍ଚଳବାସୀ ଶୋକ ପ୍ରକାଶ କରିଛନ୍ତି।
