ପୁରୁଷୋତ୍ତମପୁର,୩୦।୧(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଶାର୍ଗୁଣାପଲ୍ଲୀ ଗ୍ରାମରେ ଶାଗ ତୋଳିବାକୁ ଯାଇ ବୁଧବାରଠାରୁ ନିଖୋଜ ଥିଲେ ଜଣେ ମହିଳା। ତେବେ ଶନିବାର ଗ୍ରାମଠାରୁ ୧ କିଲୋମିଟର ଦୂରରେ ଥିବା ବିଲମାଳରୁ ଏକ ପରିତ୍ୟକ୍ତ କୂଅରୁ ତାଙ୍କ ମୃତଦେହ ମିଳିବା ଘଟଣାର ଫର୍ଦ୍ଦାଫାଶ କରି ଅଭିଯୁକ୍ତ ଭାବନ୍ଧ ଗ୍ରାମର ବୁଦ୍ଧିଆ ଦାସ(୪୫)ଙ୍କୁ ଗିରଫ କରିଛି ପୁରୁଷୋତ୍ତମପୁର ପୋଲିସ। ପ୍ରେମ ସମ୍ପର୍କକୁ ନେଇ ହତ୍ୟା କରାଯାଇଥିବା ସ୍ପଷ୍ଟ କରିଛନ୍ତି ପୁରୁଷୋତ୍ତମପୁର ଏସ୍ଡିପିଓ ସୀମା ସ୍ବାଇଁ। ଆୟୋଜିତ ଖବରଦାତା ସମ୍ମିଳନୀରେ ଏସ୍ଡିପିଓ ସୀମା ସ୍ବାଇଁ, ଥାନାଧିକାରୀ ଜଗନ୍ନାଥ ମଲ୍ଲିକ,ଏସ୍ଆଇ ସୁନିଲ କୁମାର ପ୍ରଧାନ ସୂଚନା ଦେଇଛନ୍ତି। ଶାର୍ଗୁଣାପଲ୍ଲୀ ଗ୍ରାମର ମହିଳାଙ୍କ ସ୍ବାମୀ ମୁମ୍ବାଇରେ ରହୁଥିବା ବେଳେ ସେ ତାଙ୍କର ୪ ପିଲାଙ୍କୁ ନେଇ ଶାଶୁଶଶୁରଙ୍କ ନିକଟରେ ରହୁଥିଲେ। ଗ୍ରାମ ନିକଟସ୍ଥ ପଥର ଖଣିର ଶ୍ରମିକ ଭାବରେ କାର୍ଯ୍ୟ କରୁଥିଲେ। ଇତି ମଧ୍ୟରେ ଟ୍ରକରେ ଶ୍ରମିକ ଭାବରେ କାର୍ଯ୍ୟ କରୁଥିବା ଭାବନ୍ଧ ଗ୍ରାମର ବୁଦ୍ଧିଆ ଦାସଙ୍କ ସହ ପ୍ରେମ ସମ୍ପର୍କ ଗଢ଼ି ଉଠିଥିଲା। ଏପରିକି ଦୀର୍ଘ ଦୁଇ ବର୍ଷ ଧରି ସମ୍ପର୍କ ଚାଲିଥିବା ବେଳେ ବୁଦ୍ଧିଆଙ୍କୁ ନିଜର ସ୍ତ୍ରୀ ଭାବେ ଘରକୁ ନେବା ଲାଗି ବାରମ୍ବାର ଦାବି କରୁଥିଲେ ମହିଳା ଜଣକ। ମାତ୍ର ବୁଦ୍ଧିଆ ବିବାହିତ ହୋଇଥିବା ଓ ତାଙ୍କର ୩ ପିଲା ରହିଥିବାରୁ ସେ ମନା କରୁଥିଲେ। ଗତ ୨୫ ତାରିଖରେ ମହିଳା ତାଙ୍କ ଗ୍ରାମର ଜଣେ ମହିଳାଙ୍କ ଫୋନ୍ରେ ବୁଦ୍ଧିଆଙ୍କୁ ଫୋନ୍ କରି ଡାକିଥିଲେ। ଏହି ସମୟରେ ଉଭୟଙ୍କ ମଧ୍ୟରେ ବଚସା ହୋଇଥିଲା।
ଏହାକୁ ନେଇ ନେଇ ବୁଦ୍ଧିଆ ସଂପୃକ୍ତ ମହିଳାଙ୍କୁ ମାରି ଶେଷ କରିଦେବା ଲାଗି ଯୋଜନା କରିଥିଲେ। ଏକ ଧାରୁଆ କାତି ଧରି ଗ୍ରାମ ନିକଟସ୍ଥ ବିଲମାଳକୁ ଆସିଥିଲେ। ସେଠାକୁ ମହିଳା ଜଣକ ମଧ୍ୟ ଯାଇଥିଲେ। ଉଭୟେ ସେଠାରେ ଶାରିରୀକ ସମ୍ପର୍କ ରଖିବା ପରେ ବୁଦ୍ଧିଆଙ୍କ ଘରକୁ ଯିବାଲାଗି ଜିଦ୍ ଧରିଥିଲେ ମହିଳା। ଫଳରେ ଯୋଜନା ଅନୁଯାୟୀ ବୁଦ୍ଧିଆ ନେଇଥିବା କାତିରେ ନିର୍ମମ ଭାବେ ହତ୍ୟା କରି ଘୋଷାଡ଼ି ନେଇ କୂଅରେ ଫିଙ୍ଗି ଘରକୁ ଚାଲି ଯାଇଥିଲେ। ମୃତଦେହ ମିଳିବା ପରେ ମହିଳଙ୍କ ଭାଇଙ୍କ ଅଭିଯୋଗକୁ ନେଇ ଥାନାରେ କେସ ନଂ ୨୬/୨୧ ରୁଜୁ କରାଯାଇଥିଲା। ତେବେ ଘଟଣାର ପାରିପାଶର୍ବିକ ସ୍ଥିତିକୁ ନେଇ ଛାନ୍ଭିନ ହେବାରୁ ମୃତ ମହିଳାଙ୍କ ସହ ସାଙ୍ଗ ହୋଇ କାମକୁ ଯାଉଥିବା ଅନ୍ୟ ମହିଳାଙ୍କୁ ଆଣି ପଚରାଉଚରା କରିବା ସହ ମୋବାଇଲ କଲ୍କୁ ଆଧାର କରି ଅଭିଯୁକ୍ତଙ୍କୁ ତାଙ୍କ ଘରୁ ଗିରଫ କରାଯାଇଛି। ଜେରା ବେଳେ ଅଭିଯୁକ୍ତ ଘଟଣା ସମ୍ପର୍କରେ କହିବା ସହ ହତ୍ୟାକାଣ୍ଡ ସ୍ଥଳକୁ ଯାଇ ଲୁଚାଇଥିବା ମୃତ ମହିଳାଙ୍କ ଚପଲ ଓ ହତ୍ୟାକାଣ୍ଡରେ ବ୍ୟବହୃତ କାତିକୁ ଆଣି ପୋଲିସକୁ ହସ୍ତାନ୍ତର କରିଛନ୍ତି।