ନୂଆଗାଁ,୧୮।୪(ଧନେଶ୍ୱର ସାହୁ)ନୟାଗଡ଼ ଜିଲା ନୂଆଗାଁ ବ୍ଲକ ନିକଟରେ ଚାଲିଥିବା ପ୍ରାଣୀ ଚିକିତ୍ସାଳୟ ନୂତନ ଗୃହ ନିର୍ମାଣ ଦୀର୍ଘ ମାସ ହେଲା ଅଧପନ୍ତରିଆ ଭାବେ ପଡି ରହିଛି। ପଶୁପକ୍ଷୀ , ଗାଈଗୋରୁ ଆଦିଙ୍କ ସୁରକ୍ଷା, ଚିକିତ୍ସାଓ କୃଷକମାନଙ୍କ ସ୍ବାର୍ଥ ଦୃଷ୍ଟିରୁ ନୂଆଗାଁ ବ୍ଲକ ନିକଟରେ ପ୍ରତିଷ୍ଠା ହୋଇଥିବା ପ୍ରାଣୀ ଚିକିତ୍ସାଳୟର ରକ୍ଷଣାବେକ୍ଷଣ ଅଭାବରୁ ପୁରୁଣା ଘର ସବୁ ଭୁଶୁଡିବାକୁ ବସିଲାଣି। ତେଣୁ ନୂତନ ପ୍ରାଣୀ ଚିକିତ୍ସାଳୟ ଗୃହ ନିର୍ମାଣ କରିବା ପାଇଁ ସରକାର ୬୪ ଲକ୍ଷ ଟଙ୍କା ଅନୁଦାନ ଦେଇଥିବା ବେଳେ ତା’ର ନିର୍ମାଣ ଦାୟିତ୍ୱ ଓଡିଶା କ୍ଷୁଦ୍ରଶିଳ୍ପ ନିଗମ ତରଫରୁ ଟେଣ୍ଡର ମାଧ୍ୟମରେ ଠିକାଦାର ଚୟନ କରାଯାଇଛି। ଗୃହ ନିର୍ମାଣ କାର୍ଯ୍ୟ ବିଣ୍ଡା ସିମେଣ୍ଟରେ ଅତି ନିମ୍ନମାନର ହେଉଥିବା ନେଇ ଅଭିଯୋଗ ହୋଇଥିଲା। ନିମ୍ନମାନର କାର୍ଯ୍ୟ ବାବଦରେ ଜିଲା ପ୍ରାଣୀ ଚିକିତ୍ସାଧିକାରୀ ପ୍ରଶାନ୍ତ କୁମାର ମିଶ୍ରଙ୍କୁ ଅଭିଯୋଗ କରାଯାଇଥିଲେ ମଧ୍ୟ କୌଣସି ସୁଫଳ ମିଳିଲା ନାହିଁ। ଠିକାଦାର ପୂର୍ବ ଭଳି ବିଣ୍ଡା ସିମେଣ୍ଟରେ କାମ କରିବା ସହ ଗୃହ ଭିତରେ ବାଲି ପୋତିବା ବଦଳରେ ମାଟି ପୋତିଥିଲେ। ତେବେ ପରବର୍ତ୍ତୀ ସମୟରେ ଠିକାଦାର ନିର୍ମାଣ କାର୍ଯ୍ୟକୁ ଅଧପନ୍ତରିଆ ଭାବେ ଛାଡି ଦେଇଛି। କାମ ବନ୍ଦ ହେବାର ଦୀର୍ଘ ମାସ ବିତି ଯାଇଥିଲେ ମଧ୍ୟ କାମ କରିବାର ନାଁ ଧରୁନାହାନ୍ତି ଠିକାଦାର। କୌଣସି କାର୍ଯ୍ୟ ଆରମ୍ଭ ପୂର୍ବରୁ ଜନ ସାଧାରଣଙ୍କ ଅବଗତି ନିମନ୍ତେ କାର୍ଯ୍ୟସ୍ଥଳରେ ସୂଚନା ଫଳକ ଲଗାଇବାର ନିୟମ ରହିଥିବା ବେଳେ ଏଠାରେ ତାହାର ବ୍ୟତିକ୍ରମ ଦେଖିବାକୁ ମିଳିଛି।
କାର୍ଯ୍ୟ ବାବଦରେ ଜନ ସାଧାରଣଙ୍କୁ ଅନ୍ଧାରରେ ରଖି ନିର୍ମାଣ କାର୍ଯ୍ୟ ଚାଲିଥିବା ବେଳେ ବର୍ତ୍ତମାନ କାମ ସମ୍ପୂର୍ଣ୍ଣ ବନ୍ଦ କରିଦିଆଯାଇଛି। ଗୋଟିଏ ପଟେ ଜରାଜୀର୍ଣ୍ଣ ଅବସ୍ଥାରେ ଥିବା ପୁରୁଣା ଗୃହରେ ବିପଦପୂର୍ଣ୍ଣ ଅବସ୍ଥାରେ ପ୍ରାଣୀ ଚିକିତ୍ସାଳୟ ଚାଲିଥିବା ବେଳେ ଅନ୍ୟପଟେ ଅନୁଦାନ ଦେଇ ମଧ୍ୟ ନୂତନ ଗୃହ ନିର୍ମାଣ କରିବାରେ ବିଳମ୍ବ କରାଯାଉଛି। ଅଧପନ୍ତରିଆ ଭାବେ ପଡିଥିବା ପ୍ରାଣୀ ଚିକିତ୍ସାଳୟ ଗୃହ ନିର୍ମାଣ ବାବଦରେ ନୂଆଗାଁ ବ୍ଲକ ପ୍ରାଣୀ ଚିକିତ୍ସାଧିକାରୀ ଶୁଭାଶିଷ ମହାପାତ୍ରଙ୍କୁ ପଚାରିବାରେ ଉକ୍ତ ନିର୍ମାଣ କାର୍ଯ୍ୟକୁ ଓଡ଼ିଶା କ୍ଷୁଦ୍ରଶିଳ୍ପ ନିଗମ ଟେଣ୍ଡର ମାଧ୍ୟମରେ ଠିକାଦାର ଚୟନ କରିଛି। ପୁରୁଣା ଗୃହ ଭାଙ୍ଗି ଛାତରୁ କଂକ୍ରିଟ ଖସୁଥିଲେ ମଧ୍ୟ ତାରି ମଧ୍ୟରେ ବସି କାର୍ଯ୍ୟ କରିବାକୁ ପଡୁଛି। ଠିକାଦାରଙ୍କୁ ଫୋନ କଲେ ସେ ଫୋନ ଉଠାଉ ନାହାନ୍ତି ବୋଲି ପ୍ରାଣୀ ଚିକିତ୍ସାଧିକାରୀ ମହାପାତ୍ର କହିଛନ୍ତି।
