କୋକସରା,୧୦।୪(ଡି.ଏନ.ଏ.): କଳାହାଣ୍ଡି ଜିଲା କୋକସରା ବ୍ଲକ ଲଡୁଗାଁ କେନ୍ଦୁପତ୍ର ଫରେଷ୍ଟ ଡିଭିଜନ ଅନ୍ତର୍ଭୁକ୍ତ ବିଜମରା ସେକ୍ସନ ଅଧୀନରେ କାର୍ଯ୍ୟ କରୁଥିବା ମୁନସି, ଚେକର, ଚପରାଶି ଓ କେନ୍ଦୁପତ୍ର ତୋଳାଳୀମାନେ ସୋମବାର କୋକସରା ବ୍ଲକ ଉପାଧ୍ୟକ୍ଷଙ୍କୁ ଏକ ଦାବିପତ୍ର ଦେଇଛନ୍ତି । ବିଗତ କିଛି ବର୍ଷ ହେବ ଘରୋଇ କମ୍ପାନୀମାନେ ବିଭିନ୍ନ ଗ୍ରାମରେ ଗ୍ରାମସଭା କରି ସ୍ଥାନୀୟ କେନ୍ଦୁପତ୍ର ତୋଳାଳୀଙ୍କୁ ଅଧିକ ଅର୍ଥ ଦେଇ ଗ୍ରାମସଭା ମାଧ୍ୟମରେ ବେଆଇନ ଭାବେ କେନ୍ଦୁପତ୍ର କିଣୁଛନ୍ତି। ଯାହା ଦ୍ୱାରା ବିଭିନ୍ନ କେନ୍ଦୁପତ୍ର ଫଡ଼ିରେ ୧୯୭୩ ମସିହାରୁ ନିୟୋଜିତ ମୁନସି, ଚେକର, ଚପରାଶିଙ୍କ ଜୀବନ ଜୀବିକା ପ୍ରଭାବିତ ହୋଇଛି। ଗତ ୨୦୨୦/୨୧/୨୨/୨୩ଠାରୁ ରାଜ୍ୟ ବାହାରର ବିଭିନ୍ନ ଘରୋଇ କମ୍ପାନୀମାନେ ସାହାଜଖୋଲ ଜଙ୍ଗଲ ଅଞ୍ଚଳରେ ଥିବା କେନ୍ଦୁପତ୍ର ସଂଗ୍ରହ ଗ୍ରାମରେ ସ୍ଥାନୀୟ କିଛି ନେତାଙ୍କୁ ଧରି ଗ୍ରାମସଭା କରି ବେସରକାରୀ ଭାବେ କେନ୍ଦୁପତ୍ର କ୍ରୟ କରି ଆସୁଛନ୍ତି। ଫଳରେ ବିଜମରା କେନ୍ଦୁପତ୍ର ସେକ୍ସନ ଅଧୀନରେ ଥିବା ବିଭିନ୍ନ ଫଡ଼ିରେ ନିୟୋଜିତ କର୍ମଚାରୀମାନେ ଜୀବିକା ହରାଇଛନ୍ତି। ଘରୋଇ କମ୍ପାନୀମାନେ ଗ୍ରାମସଭା କରି କେନ୍ଦୁପତ୍ର ତୋଳାଳୀଙ୍କୁ ପ୍ରଲୋଭିତ କରିଛନ୍ତି ହେଲେ ସରକାରୀ ଭାବେ ତୋଳାଳୀଙ୍କୁ ଯେଉଁ ସୁବିଧା ସୁଯୋଗ ମିଳିବ ତାହା ଦେଉନାହାନ୍ତି। ସରକାରୀ ନିୟମ ଅନୁଯାୟୀ ତୋଳାଳୀଙ୍କୁ ଚପଲ ପାଣି ବୋତଲ, ଅଖା ବସ୍ତା, ବୋନସ, ସ୍ବାସ୍ଥ୍ୟ ବୀମା, ପିଲାଙ୍କ ପାଇଁ ପାଠ୍ୟ ଉପକରଣ, ବିବାହ ଖର୍ଚ୍ଚ ଆଦି ଶ୍ରମିକ କଲ୍ୟାଣ ସାହାଯ୍ୟ ଯୋଗାଇ ଦେଉଛନ୍ତି, ତେବେ ଘରୋଇ କମ୍ପାନୀ କେରି ପିଛା କିଛି ଅଧିକ ଟଙ୍କା ଦେଇ ତୋଳାଳୀଙ୍କୁ ଅନ୍ୟ କୌଣସି ସହାୟତା ଦେଉ ନାହାନ୍ତି ବୋଲି ଅଭିଯୋଗ ହୋଇଛି। ସୋମବାର ବିଜମରା କେନ୍ଦୁପତ୍ର ସେକ୍ସନର ବିଭିନ୍ନ ଫଡ଼ିରେ କାର୍ଯ୍ୟରତ କର୍ମଚାରୀମାନେ କୋକସରା ବ୍ଲକ ଅଧ୍ୟକ୍ଷା ରିତା ଅଗ୍ରୱାଲ ଓ ଉପାଧ୍ୟକ୍ଷ ରାଜୀବ କୁମାର ଅଗ୍ରୱାଲଙ୍କୁ ଭେଟି ଏହି ଦାବିପତ୍ର ଦେବା ସହ ଘରୋଇ କମ୍ପାନୀ କେନ୍ଦୁପତ୍ର କ୍ରୟ ଉପରେ କଟକଣା ଲଗାଇବାକୁ ଅନୁରୋଧ କରିଛନ୍ତି। ଏହି ସମୟରେ କର୍ମଚାରୀ ପ୍ରଦୀପ ପାୟା ସିଂ, କ୍ଷୀରୋଦ କଣ୍ଠ, ଯୁଧିଷ୍ଠିର ମାଝୀ, ବଦ୍ରୀ ପ୍ରସାଦ ଭୋଇ, ମନୋଜ କୁମାର ନାଏକ, ତ୍ରିନାଥ ପାତ୍ର, ରୂପଧର ଚଣ୍ଡି, ବିଶେଶ୍ୱର ମାଝୀ, ଟଙ୍କଧର ମାଝୀ, ବନ ବିହାରୀ ନାଏକ, ବଳଦେବ ବାଗ, ପ୍ରଫୁଲ ନାଏକ, ନିତ୍ୟାନନ୍ଦ ନାଏକ ଓ ସତ୍ୟବାନ ନାଏକ ପ୍ରମୁଖ ମୁନସି, ଚେକର, ଚପରାଶି ଉପସ୍ଥିତ ଥିଲେ।