ନୂଆଦିଲ୍ଲୀ, ୨୮।୭: ଇଂଲଣ୍ଡ ଓ ଆୟର୍ଲାଣ୍ଡ ଏକଦିବସୀୟ କ୍ରିକେଟ ସିରିଜ ଚଳିତମାସ ୩୦ରୁ ଆରମ୍ଭ ହେବ। ଏହି ସିରିଜରୁ ଆନୁଷ୍ଠାନିକଭାବେ କ୍ରିକେଟ ବିଶ୍ୱକପ ସୁପରଲିଗ୍ ଆରମ୍ଭ ହେବ ବୋଲି ଅନ୍ତର୍ଜାତୀୟ କ୍ରିକେଟ କାଉନସିଲ(ଆଇସିସି) ପକ୍ଷରୁ ସୋମବାର ପ୍ରକାଶ କରାଯାଇଛି। ବିଶ୍ୱକପ ସୁପରଲିଗ୍ ପ୍ରଥମେ ୨୦୧୮ ଜୁନ୍ରେ ଘୋଷଣା ହୋଇଥିଲା। ମାତ୍ର ସେତେବେଳେ ତାହା କେବଳ ଟେଷ୍ଟ ଚାମ୍ପିୟନଶିପ୍ ପାଇଁ ପ୍ରଜୁଜ୍ୟ ଥିଲା। ବର୍ତ୍ତମାନ ଏକଦିବସୀୟ କ୍ରିକେଟ ପାଇଁ ଘୋଷିତ ସୁପରଲିଗ୍ ୨୦୨୩ ପୁରୁଷ ବିଶ୍ୱକପ ଯୋଗ୍ୟତା ପର୍ଯ୍ୟାୟଭାବେ ବ୍ୟବହୃତ ହେବ। ୨୦୧୫-୧୭ ଆଇସିସି ଓ୍ବାଲର୍ଡ କ୍ରିକେଟ ଲିଗ୍ ଚାମ୍ପିୟନ ନେଦରଲାଣ୍ଡ୍ସ ସମେତ ୧୨ଟି ଦଳ ଏଥିରେ ଭାଗନେବେ। ସେମାନଙ୍କ ମଧ୍ୟରୁ ଶ୍ରେଷ୍ଠ ୭ ଦଳ ଏବଂ ଆୟୋଜକ ଭାରତ ୨୦୨୩ ବିଶ୍ୱକପ ପାଇଁ ସିଧାସଳଖ ଯୋଗ୍ୟତା ଅର୍ଜନ କରିବେ। ବିଶ୍ୱକପର ଅବଶିଷ୍ଟ ୨ ସ୍ଥାନ ପାଇଁ ଲିଗ୍ ଟେବୁଲର ଶେଷ ୫ ଦଳ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେବ। ସେମାନଙ୍କ ସହ କ୍ରିକେଟ ଓ୍ବାଲର୍ଡ କପ୍ ଲିଗ୍-୨ ସିରିଜ ଦେଇ ଆସିଥିବା ସହଯୋଗୀ ଦେଶର ଦଳ ଗୁଡ଼ିକ ଯୋଗଦେବେ। କ୍ରିକେଟ ବିଶ୍ୱକପ ଲିଗ୍-୨ ସିରିଜ ନାମ୍ବିଆରେ ଆୟୋଜିତ ହେବ। ଆଇସିସି ବିଶ୍ୱକପ ୧୦ ଦଳକୁ ନେଇ ଅନୁଷ୍ଠିତ ହେବ।
ଲିଗ୍ର ନିୟମ ଅନୁସାରେ ପ୍ରତି ଦଳ ଘରୋଇ ଏବଂ ବାହାର ପରିବେଶରେ ୪ଟି ଲେଖାଏ ସିରିଜ ଖେଳିବେ। ବିଜେତା ଦଳକୁ ୧୦ ପଏଣ୍ଟ ମିଳିବ। କୌଣସି ମ୍ୟାଚରୁ ଫଳାଫଳ ନ ମିଳିଲେ କିମ୍ବା ମ୍ୟାଚ ଟାଇ ରହିଲେ ୫ ପଏଣ୍ଟ ଲେଖାଏ ପ୍ରଦାନ କରାଯିବ। ପ୍ରତି ସୁପରସିରିଜରେ ୩ଟି ଲେଖାଏ ମ୍ୟାଚ ରହିବ। କୌଣସି ସିରିଜରେ ଅତିରିକ୍ତ ମ୍ୟାଚ ରଖାଯାଇ ପାରିବ, ମାତ୍ର ସେଥିରେ ଲିଗ୍ ପଏଣ୍ଟ ବ୍ୟବସ୍ଥା ରହିବ ନାହିଁ। ବିଶ୍ୱକପ ସୁପରଲିଗ୍ ପ୍ରକୃତରେ ୨୦୨୦ ମେ’ରୁ ଆରମ୍ଭ ହୋଇ ୨୦୨୨ ମାର୍ଚ୍ଚ ପର୍ଯ୍ୟନ୍ତ ଚାଲିବାର ଥିଲା। ମାତ୍ର କରୋନା ଭାଇରସ ସଂକ୍ରମଣ ଯୋଗୁ ଏହାକୁ ଜୁଲାଇ ୩୦ ପର୍ଯ୍ୟନ୍ତ ଘୁଞ୍ଚାଇ ଦିଆ ଯାଇଥିଲା।