ଇନ୍ଦୋର,୯।୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟପ୍ରଦେଶର ଇନ୍ଦୋରରେ ୧୭ତମ ପ୍ରବାସୀ ଭାରତୀୟ ଦିବସ ସମ୍ମିଳନୀକୁ ସୋମବାର ଉଦ୍ଘାଟନ କରିଛନ୍ତି। ଏଥିସହିତ କାର୍ଯ୍ୟକ୍ରମକୁ ସମ୍ବୋଧିତ କରି କହିଛନ୍ତି, ପ୍ରବାସୀ ଭାରତୀୟ ଦିବସ ସମ୍ମିଳନୀ ମଧ୍ୟପ୍ରଦେଶର ମାଟିରେ ଅନୁଷ୍ଠିତ ହେଇଛି। ଯାହାକୁ ଦେଶର ହୃଦୟ ବୋଲି କୁହାଯାଏ। ମଧ୍ୟପ୍ରଦେଶର ମା’ ନର୍ମଦାଙ୍କ ଜଳ, ଏଠାରେ ଥିବା ଜଙ୍ଗଲ, ଆଦିବାସୀ ପରମ୍ପରା ଏବଂ ଏଠାରେ ଥିବା ଆଧ୍ୟାତ୍ମିକତା ଆପଣଙ୍କ ଯାତ୍ରାକୁ ଅବିସ୍ମରଣୀୟ କରିବ। ସେ ଆହୁରି କହିଛନ୍ତି, ପ୍ରବାସୀ ଭାରତୀୟ ଭାରତର ବ୍ରାଣ୍ଡ ଆମ୍ବାସାଡର ଏବଂ ସେମାନଙ୍କର ଭୂମିକା ଭିନ୍ନ ଅଟେ। ଆପଣ ସମସ୍ତେ ‘ମେକ ଇନ ଇଣ୍ଡିଆ’, ହସ୍ତଶିଳ୍ପ ତଥା ଇଣ୍ଡିଆନ ମିଲେଟ୍ ବ୍ରାଣ୍ଡ ଆମ୍ବାସାଡର ଅଟନ୍ତି। ଆଜି ସମଗ୍ର ବିଶ୍ୱ ଭାରତ ଆଡକୁ ଚାହିଁରହିଛି।
ପ୍ରଧାନମନ୍ତ୍ରୀ କହିଛନ୍ତି ଯେ, ସମଗ୍ର ବିଶ୍ୱ ହେଉଛି ଆମର ଦେଶ। ଶତାବ୍ଦୀ ପୂର୍ବରୁ ଆମେ ବିଶ୍ୱ ବାଣିଜ୍ୟର ଏକ ଅସାଧାରଣ ପରମ୍ପରା ଆରମ୍ଭ କରିଥିଲୁ। ଆମେ ସମୁଦ୍ର ପାର ହୋଇଥିଲୁ ଯାହା ଅସୀମ ମନେ ହେଉଥିଲା। ବିଭିନ୍ନ ଦେଶ ଏବଂ ବିଭିନ୍ନ ସଭ୍ୟତା ମଧ୍ୟରେ ବ୍ୟବସାୟିକ ସମ୍ପର୍କ କିପରି ଭାଗୀଦାର ସମୃଦ୍ଧିର ବାଟ ଖୋଲିପାରିବ ବୋଲି ତାହା ଭାରତ ଦର୍ଶାଇଛି ବୋଲି ମୋଦି କହିଛନ୍ତି।
