ଆନନ୍ଦପୁର,୧୧।୬ ରାତି ପାହିଲେ ପେଟ ଚିନ୍ତା। ଘଞ୍ଚ ଜଙ୍ଗଲକୁ ଯାଇ ଶାଳ ପତ୍ର ଆଣି ଖଲି ତିଆରି ନ କଲେ କୁଟୁମ୍ବ ଉପାସ। ରାଶନ ଚାଉଳ ଗଣ୍ଡେ ମିଳୁଛି ସିନା, ହେଲେ ତେଲ ଲୁଣ ପାଇଁ ଖଲି ତିଆରି ନ କଲେ ନ ଚଳେ। ଖଲିକୁ ଭରସା କରି ଜୀବନ ଅତିବାହିତ କରୁଥିବା ମହିଳା ଜଣକ ହେଲେ ଆନନ୍ଦପୁର ବ୍ଲକ ମନୋହରପୁର ପଞ୍ଚାୟତର ବାଇଗୁଣ୍ଡି ଗ୍ରାମର ଗୁରୁବାରୀ ସିର୍କା।
ବିପଜ୍ଜନକ ଅବସ୍ଥାରେ ସେ ଘଞ୍ଚ ଜଙ୍ଗଲକୁ ଯାଇ ଶାଳପତ୍ର ଗୋଟାଇବା ଏବଂ ତାକୁ ନେଇ ଘରେ ଶୁଖାଇ ପରେ ଖଲି ତିଆରି କରିବାରେ ନିଜର ସମୟକୁ ଅତିବାହିତ କରୁଛନ୍ତି। ଦିନକୁ ଶହେ ଟିକିଆ ଦୁଇ ବିଡ଼ା ଖଲି ପ୍ରସ୍ତୁତ କରିବାକୁ ସକ୍ଷମ ହେଉଥିବା ଗୁରୁବାରୀ କହିଛନ୍ତି। ଯେଉଁମାନେ ଟିକେ ଅଧିକ ପରିଶ୍ରମ କରୁଛନ୍ତି ସେମାନେ ଦିନକୁ ୪ ବିଡ଼ା ପର୍ଯ୍ୟନ୍ତ ଖଲି ପ୍ରସ୍ତୁତ କରିଥାନ୍ତି। ଶହେ ଟିକିଆ ବିଡ଼ା ବିକ୍ରି ବାବଦକୁ ୩୦ ଟଙ୍କା ପାଉଣା ମିଳିଥାଏ। ଦିନକୁ ଦୁଇ ବିଡ଼ା ପ୍ରସ୍ତୁତ କଲେ ୬୦ ଟଙ୍କା ପର୍ଯ୍ୟନ୍ତ ରୋଜଗାର ହୋଇଥାଏ। ତେବେ ବର୍ଷା ସମୟରେ ଖଲି ପ୍ରସ୍ତୁତ କରିବା କଷ୍ଟସାଧ୍ୟ ହୋଇପଡ଼ିଥାଏ ବୋଲି ଗୁରୁବାରୀ କହିଛନ୍ତି। ଏଭଳି କ୍ଷେତ୍ରରେ ଜବକାର୍ଡଧାରୀଙ୍କ ପାଇଁ ଶହେ ଦିନର କାମ ଯୋଗାଇବାର ସରକାରୀ ନାରା ବ୍ୟର୍ଥ ହେବା ପରିି ଅନୁମାନ କରାଯାଉଛି। ଆଦିବାସୀ ଅଧ୍ୟୁଷିତ ଅଞ୍ଚଳରେ ସରକାରୀ ଉନ୍ନୟନ କାର୍ଯ୍ୟ ବ୍ୟାପକ ଭାବେ କାର୍ଯ୍ୟକାରୀ ହେଉଛି ହେଲେ ଜବକାର୍ଡ଼ଧାରୀଙ୍କୁ ନିୟମିତ କାମ ମିଳୁ ନ ଥିବାରୁ ଗୁରୁବାରୀଙ୍କ ଭଳି ବହୁ ଗରିବ ଓ ଅସହାୟ ମହିଳା ଦୁଃଖ କଷ୍ଟରେ ଚଳୁଛନ୍ତି। ପ୍ରଶାସନ ଏ ଦିଗରେ ପଦକ୍ଷେପ ଗ୍ରହଣ କରିବା ପାଇଁ ଦାବି ହେଉଛି।