ଜାତିସଂଘ,୨୮ା୧୦:ଜଳବାୟୁ ପରିବର୍ତ୍ତନଜନିତ ସଙ୍କଟକୁ ସାମ୍ନା କରୁଥିବା ପୃଥିବୀ ଏକ ବୃହତ୍ ବିପର୍ଯ୍ୟୟ ଆଡ଼କୁ ମୁହଁାଇଛି ବୋଲି ଜାତିସଂଘ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଦର୍ଶାଯାଇଛି। ଜାତିସଂଘ ପରିବେଶ କାର୍ଯ୍ୟକ୍ରମ (ୟୁଏନ୍ଇପି) ଗୁରୁବାର ଜାରି କରିଥିବା ଏହାର ବାର୍ଷିକ ଏମିଶନ୍ସ ଗ୍ୟାପ୍ ରିପୋର୍ଟରେ ଉଲ୍ଲେଖ କରିଛି, ବିଶ୍ୱରେ ବଢ଼ୁଥିବା ତାପମାତ୍ରା ହ୍ରାସ ପାଇଁ ସରକାରମାନେ ଦେଇଥିବା ପ୍ରତିଶ୍ରୁତି ଠିକ୍ ଭାବେ ପାଳନ କରୁନାହାନ୍ତି। ବର୍ତ୍ତମାନର ସରକାରୀ କ୍ଲାଇମେଟ୍ ପଲିସିଗୁଡ଼ିକ ବିଶ୍ୱରେ ହାରାହାରି ୨.୮ ଡିଗ୍ରୀ ସେଲ୍ସିୟସ୍ ବା ୫ ଡିଗ୍ରୀ ଫାରେନ୍ଡିଟ୍ ପର୍ଯ୍ୟନ୍ତ ତାପମାତ୍ରା ବୃଦ୍ଧି ଆଡ଼କୁ ଟାଣିନେଉଛି।
ଇଜିପ୍ଟରେ ନଭେମ୍ବର ୬ରୁ ୧୮ ତାରିଖ ପର୍ଯ୍ୟନ୍ତ ଚାଲିବାକୁ ଥିବା କୋପ୍ ୨୭ ଜଳବାୟୁ ଆଲୋଚନାରେ ତାପମାତ୍ରାକୁ ୨ ଡିଗ୍ରୀ ସେଲସିୟସ୍ ମଧ୍ୟରେ ସୀମିତ ରଖିବା ଉପରେ ଗୁରୁତ୍ୱାରୋପ କରାଯିବ। ତାପମାତ୍ରାକୁ ସୀମିତ ରଖିବା ପାଇଁ ପୂର୍ବରୁ ରହିଥିବା ସୁଯୋଗକୁ ଆମେ ହାତଛଡ଼ା କରିଦେଇଛେ। ଆମ ଅର୍ଥନୀତି ଓ ସମାଜଗୁଡ଼ିକରେ ଆମୂଳଚୂଳ ପରିବର୍ତ୍ତନ ଜରିଆରେ ହିଁ ପାଣିପାଗଜନିତ କ୍ରମବର୍ଦ୍ଧିଷ୍ଣୁ ବିପର୍ଯ୍ୟୟରୁ ନିଜକୁ ରକ୍ଷା କରିପାରିବା ବୋଲି ୟୁଏନ୍ଡିପି କାର୍ଯ୍ୟନିର୍ବାହୀ ନିର୍ଦ୍ଦେଶକ ଆଇଙ୍ଗର ଆଣ୍ଡରସନ୍ କହିଛନ୍ତି। ସେହିପରି ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସ୍ କହିଛନ୍ତି, କାର୍ବନ ନ୍ୟୁଟ୍ରାଲିଟିକୁ ସମର୍ଥନ ନ ମିଳିଲେ ଏହାର ଲକ୍ଷ୍ୟ ମୂଲ୍ୟହୀନ ହୋଇଯିବ। ବୈଶ୍ୱିକ ଓ ଜାତୀୟ ସ୍ତରରେ ଜଳବାୟୁ ପରିବର୍ତ୍ତନର ପ୍ରଭାବ ହ୍ରାସ ଲାଗି ଦିଆଯାଉଥିବା ପ୍ରତିଶ୍ରୁତିକୁ ରକ୍ଷା କରାଯାଉନାହିଁ। ଅନ୍ୟ ଭାଷାରେ ଆମେ ଏକ ବୈଶ୍ୱିକ ବିପର୍ଯ୍ୟୟ ଆଡ଼କୁ ଅଗ୍ରସର ହେଉଛେ ବୋଲି ଏକ ଭିଡିଓ ମେସେଜ୍ରେ ଗୁଟେରସ୍ କହିଛନ୍ତି।
