ଅତି ବେଶିରେ ଲକ୍ଷେ କି ୨ ଲକ୍ଷ ଟଙ୍କାରେ ମେଣ୍ଢା କିଣାବିକା ଖବର ଶୁଣିଥିବେ । ମାତ୍ର ଏମିତି ଏକ ମେଣ୍ଢା, ଯାହା ବିଶ୍ୱର ସବୁଠାରୁ ଦାମୀ ଭାବେ ପରିଗଣିତ ହୋଇଛି। ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ଏହା ସତ। ଏହି ମେଣ୍ଢାର ଦାମ୍ କୋଟିଏ କି ୨ କୋଟି ନୁହେଁ ୩ କୋଟିରୁ ଊର୍ଦ୍ଧ୍ୱ। ଜାଣନ୍ତୁ ଏହି ଅନନ୍ୟ ମେଣ୍ଢା ସମ୍ପର୍କରେ…
ଏହି ମେଣ୍ଢାର ନାମ ଡବଲ ଡାଏମଣ୍ଡ। ସ୍କଟ୍ଲାଣ୍ଡର ଲାନାର୍କରେ ଗତ ସପ୍ତାହରେ ଏକ ନିଲାମୀର ଆୟୋଜନ କରାଯାଇଥିଲା। ଏଠାକୁ ଉକ୍ତ ମେଣ୍ଢା ଆସିଥିଲା। ଏହି ମେଣ୍ଢାର ନିଲାମୀ ୧୩ ହଜାର ଡଲାର ଅର୍ଥାତ୍ ୯.୫୩ ଲକ୍ଷରୁ ଆରମ୍ଭ ହୋଇଥିଲା। ଶେଷରେ ୪.୯୦ ଲକ୍ଷ ଆମେରିକୀୟ ଡଲାର ଅର୍ଥାତ ୩.୫୯ କୋଟି ଟଙ୍କା ପର୍ଯ୍ୟନ୍ତ ନିଲାମୀ ଡକା ଯାଇଥିଲା। ଏହି ମେଣ୍ଢାକୁ ୩ ଟି ଅଲଗା ଅଲଗା ଫାର୍ମ ମିଶି କିଣିଛନ୍ତି। ଅର୍ଥାତ୍ ମେଣ୍ଢାଟି ୩ଟି ଫାର୍ମରେ ଯାଇ ରହିବ। ଏହା ଟେକ୍ସେଲ ପ୍ରଜାତିର। ହଲାଣ୍ଡରେ ଏହି ମେଣ୍ଡା ପାଳନ କରାଯାଏ। ଟେକ୍ସେଲ ମେଣ୍ଢାପାଳକ ସୋସାଇଟ ଅନୁସାରେ, ଏହି ମେଣ୍ଢାର ମାଂସ ବହୁତ ମହଙ୍ଗା। ଏହି ପ୍ରଜାତିର ମେଣ୍ଢାକୁ ପୂର୍ବରୁ ୨.୨୪ କୋଟିରେ କିଣା ଯାଇଥିଲା। ଏହା ୨୦୦୯ ମସିହାର କଥା। ଏହି ପ୍ରଜାତିର ମେଣ୍ଢାର ଲୋମରୁ ଊଲ୍ ତିଆରି ହୁଏ। ଏହା ଫ୍ୟାଶନ ଇଣ୍ଡଷ୍ଟ୍ରିରେ ବେଶ୍ ଜଣାଶୁଣା। ଏତଦ୍ବ୍ୟତୀତ ଏହି ମେଣ୍ଢା ମାଂସର ଦାମ୍ ୟୁରୋପ, ଅଷ୍ଟ୍ରେଲିଆ, ଆମେରିକା ଏବଂ ନ୍ୟୁଜିଲାଣ୍ଡରେ ବହୁତ ଅଧିକ। ପ୍ରଥମେ ଏହି ପ୍ରଜାତି ମେଣ୍ଢା ଲୋମରୁ କପଡ଼ା ପ୍ରସ୍ତୁତ କରାଯାଇଥାଏ। ପରେ ଏହାକୁ ସ୍ଲଟର ହାଉସ୍କୁ ପଠାଯାଇ ମାଂସ କଟାଯାଇଥାଏ। ଏହି ମେଣ୍ଢାର ଓଜନ ୩ରୁ ୫ କ୍ୱିଣ୍ଟାଲ ପର୍ଯ୍ୟନ୍ତ ରହିଛି।