ଜୟପୁର, ୪।୭: ପୃଥିବୀର ତୃତୀୟ ବୃହତମ ଷ୍ଟାଡ଼ିୟମ୍ ଭାରତରେ ନିର୍ମାଣ ହେବ। ଷ୍ଟାଡ଼ିୟମ୍ଟି ରାଜସ୍ଥାନର ଜୟପୁରରେ ନିର୍ମିତ ହେବ। ଏଥିଲାଗି ୩୫୦ କୋଟି ଟଙ୍କାର ବ୍ୟୟ ଅଟକଳ କରାଯାଇଛି। ଏହାର ଡିଜାଇନିଂକୁ ଇତିମଧ୍ୟରେ ମଞ୍ଜୁରୀ ମିଳିଛି। ଚୈମ୍ପ୍ ଗାଁ ନିକଟରେ ନିର୍ମାଣ ହେବାକୁ ଥିବା ଏହି ବିଶାଳକାୟ ଷ୍ଟାଡ଼ିୟମ ପାଇଁ ୧୦୦ ଏକର ଜମି ଅଧିଗ୍ରହଣ କରାଯିବାକୁ ଚୂଡ଼ାନ୍ତ ନିଷ୍ପତ୍ତି ଗ୍ରହଣ କରାଯାଇଛି। ଏଥିରେ ୭୫ ହଜାର ଦର୍ଶକ ବସି ମ୍ୟାଚ୍ ଦେଖିପାରିବେ। ପୃଥିବୀର ବୃହତମ ଷ୍ଟାଡ଼ିୟମ୍ ଅହମଦାବାଦ୍ର ମୋଟେରାରେ ରହିଛି। ଏଠାରେ ଲକ୍ଷେ ୧୦ ହଜାର ଦର୍ଶକ ବସିବାର ସୁବିଧା ରହିଛି। ଏହା ତଳକୁ ଦ୍ୱିତୀୟ ବୃହତମ ଷ୍ଟାଡ଼ିୟମ୍ ହେଉଛି ଅଷ୍ଟ୍ରେଲିଆର ମେଲବୋର୍ନ ଷ୍ଟାଡ଼ିୟମ୍। ଏଠାରେ ଲକ୍ଷେ ୨ ହଜାର ଦର୍ଶକ ବସିବାର ସୁବିଧା ଅଛି। ଜୟପୁରଠାରେ ନିର୍ମାଣ ହେବାକୁ ଥିବା ଏହି ଷ୍ଟାଡ଼ିୟମ୍ରେ ୪ ହଜାର କାର ପାର୍କିଂ କରି ପାରିବ। ଷ୍ଟାଡ଼ିୟମ୍ରେ ଦୁଇଟି ପ୍ରାକ୍ଟିସ୍ ଗ୍ରାଉଣ୍ଡ୍ ରହିବ। ଏହାର ନିର୍ମାଣ ୨ଟି ପ୍ରର୍ଯ୍ୟାୟରେ ଶେଷ ହେବ ବୋଲି କୁହାଯାଉଛି।