ଯାଜପୁର ଅଫିସ,୧୫ା୬: ଯାଜପୁର ଜିଲା ଦେଇ ପ୍ରବାହିତ ଖରସ୍ରୋତାର ଶାଖା ଯମୁନା ନଦୀ କୂଳବାସୀ ଗତ ୮ ମାସ ହେବ କୁମ୍ଭୀର ଆତଙ୍କରେ ରହିଛନ୍ତି। ଯାଜପୁର ବ୍ଲକ ଶିମିଳିଆ ପଞ୍ଚାୟତର ଷଠିଆ, ଟିଗିରି, ମେରକାଶନପୁର, ଦରାଜପୁର ପ୍ରଭୃତି ଗ୍ରାମର ଲୋକ ଏଥିପାଇଁ ନାହିଁ ନଥିବାର ସମସ୍ୟାର ସମ୍ମୁଖୀନ ହେଉଛନ୍ତି। ଯାଜପୁର ରୋଡ ବନାଞ୍ଚଳ, ଜଙ୍ଗଲ ବିଭାଗ ପକ୍ଷରୁ କୁମ୍ଭୀର ଯାତାୟାତ କରୁଥିବା ଖରସ୍ରୋତା ନଦୀର ଯମୁନା ନାଳ ମଧ୍ୟକୁ ସର୍ବସାଧାରଣ ପ୍ରବେଶ ନିଷେଧ ବୋର୍ଡ ମାରି ନିଜର ଦାୟିତ୍ୱ ସମ୍ପାଦନ କରାଯାଇଛି। କିନ୍ତୁ ଅନେକ ମୌଳିକ ସୁବିଧା ଅପହଞ୍ଚ ହୋଇଥିବାରୁ ଏହି ଗ୍ରାମବାସୀ ଯମୁନା ନାଳ ଉପରେ ନିର୍ଭର ହେବାକୁ ବାଧ୍ୟ ହେଉଛନ୍ତି।
ଆଖି ଆଗରେ କୁମ୍ଭୀର କୁକୁର ଓ ବାଛୁରୀ ଟାଣି ନେଇଯାଉଛି। ଗ୍ରାମରେ ପାନୀୟ ଜଳ ଓ ଶୌଚାଳୟ ସମସ୍ୟା ରହିଥିବାବେଳେ ତାହାର ସମାଧାନ ହେଉ ନ ଥିବାରୁ ଲୋକେ ଜୀବନକୁ ବାଜି ଲଗାଇ ନଦୀ ପାଣିକୁ ବ୍ୟବହାର କରୁଛନ୍ତି। କେତେବେଳେ କାହାକୁ କୁମ୍ଭୀର ଟାଣିନେବ ତାହା ଉପରେ ଭରସା ନାହିଁ। ମନରେ ଭୟ ଥିଲେ ବି ଜଣକୁ ବାଡ଼ି ଧରାଇ ଜଗୁଆଳ କରି ପିଲାଠୁ ବୟସ୍କ ଯାଏ ନଦୀରେ ଗାଧୋଇବା ସହ ଗୋରୁ ପାର କରୁଛନ୍ତି। ନଦୀ ଆରପଟେ ଗ୍ରାମବାସୀଙ୍କ ଚାଷ ଜମି ରହିଛି। ଏହି ନଦୀ ଉପରେ କୌଣସି ବ୍ରିଜ୍ ନ ଥିବାରୁ ସହଜ ଗମନାଗମନ ସମ୍ଭବ ହୋଇପାରୁନାହିଁ। ହୁଲି ଡଙ୍ଗାରେ ଚାଷୀ ପାର ହେଉଛନ୍ତି। ନଦୀରୁ କୁମ୍ଭୀରକୁ ଉଦ୍ଧାର କରି ଅନ୍ୟତ୍ର ଥଇଥାନ କରିବାକୁ ଗ୍ରାମବାସୀ ଦାବି କରୁଥିଲେ ମଧ୍ୟ ବନ ବିଭାଗ ତାହାକୁ ଗୁରୁତ୍ୱ ଦେଉନାହିଁି। ଏଠାରେ ୩୦୦ ପରିବାର ଲାଗି ମାତ୍ର ୨ଟି ନଳକୂପ ରହିଛି। ଖରାଦିନେ ଆବଶ୍ୟକ ପାଣି ବାହାରୁ ନ ଥିବାରୁ ପାନୀୟ ଜଳ ପାଇଁ ଲୋକେ ଡହଳବିକଳ ହେଉଛନ୍ତି। ଅନ୍ୟପକ୍ଷରେ ଅତିରିକ୍ତ ଜିଲାପାଳ ଅକ୍ଷୟ କୁମାର ମଲ୍ଲିକ କୁମ୍ଭୀରକୁ ଅନ୍ୟତ୍ର ସ୍ଥାନାନ୍ତର ଲାଗି ବନ ବିଭାଗକୁ ନିର୍ଦ୍ଦେଶ ଦେଇଛନ୍ତି ବୋଲି ସୂଚନା ମିଳିଛି। ଗ୍ରାମବାସୀ ଅରକ୍ଷିତ ଜେନା କୁହନ୍ତି, ଗୋଟିଏ ପଟେ ସ୍ବଚ୍ଛ ଭାରତ ମିଶନ ଯୋଜନାରେ ପ୍ରତ୍ୟେକ ଘରେ ଶୌଚାଳୟ ଯୋଗାଇ ଦିଆଯାଉଛି। କିନ୍ତୁ ଯମୁନା ନଦୀକୂଳ ଗ୍ରାମବାସୀ ଏହି ଯୋଜନାରୁ ବଞ୍ଚିତ ରହିଛନ୍ତି। ଫଳରେ ବାଧ୍ୟ ହୋଇ ଗ୍ରାମବାସୀ ଶୌଚ ପାଇଁ ଯମୁନା ନଦୀକୂଳ ଉପରେ ନିର୍ଭର କରି ଜୀବନକୁ ବିପଦରେ ପକାଉଛନ୍ତି।