ପାଟନା,୨୨।୯: ବିହାରର ଆରାହା ନିବାସୀ ସୌରଭ କୁମାରଙ୍କ ଭାଗ୍ୟ ହଠାତ୍ ବଦଳିଯାଇଛି। ସେ ରାତାରାତି କୋଟିପତି ହୋଇଯାଇଛନ୍ତି। ଛାତ୍ରୀଛାତ୍ରମାନଙ୍କୁ ଟ୍ୟୁସନ ଶିକ୍ଷା ଦେଉଥିବା ସୌରଭ ଦୁଇ ବର୍ଷ ଧରି ଅନଲାଇନ କ୍ରିକେଟ ଖେଳରେ ନିଜ ଭାଗ୍ୟ ପରୀକ୍ଷା କରୁଥିଲେ। ଗତ ଭାରତ ଏବଂ ଅଷ୍ଟ୍ରେଲିଆ ମ୍ୟାଚରେ ମଧ୍ୟ ଏକ ଟିମ୍ ଗଠନ କରିଥିଲେ, ଯାହା ତାଙ୍କ ଜୀବନର ମୋଡ଼ ବଦଳାଇ ଦେଇଥିଲା। ସେ ୧ କୋଟି ଟଙ୍କା ଜିତିଥିଲେ। ତାଙ୍କ ଆକାଉଣ୍ଟକୁ ଟ୍ୟାକ୍ସ କଟି ୭୦ ଲକ୍ଷ ଟଙ୍କା ଆସିଥିଲା। ସୌରଭ ଏହି ସଫଳତା ପାଇଁ ତାଙ୍କ ମାତାପିତାଙ୍କୁ ଶ୍ରେୟ ଦେଇଥିଲେ।
ଆରାହା ଜିଲ୍ଲାର ଚାରପୋଖରୀ ବ୍ଲକର ଠାକୁରୀ ଗାଁର ସୌରଭ କୁମାର ଦୀର୍ଘ ଦିନ ଧରି ଅନଲାଇନ କ୍ରିକେଟ ଖେଳରେ ଏକ ଦଳ ଗଠନ କରି ଟଙ୍କା ବିନିଯୋଗ କରୁଥିଲେ। ସୌରଭ କହିଛନ୍ତି, ୨୦୧୯ ମସିହାରୁ ସେ ଅନଲାଇନ ଗେମିଂ ଆପରେ ଏକ ଦଳ ଗଠନ କରୁଛନ୍ତି। ଏଥିରେ ସେ ଅନେକ ଥର ହଜାର ହଜାର ଟଙ୍କା ଜିତିଛନ୍ତି ଏବଂ ହରାଇଛନ୍ତି। ସୌରଭ ଏବେ ସ୍ନାତକୋତ୍ତର ଅଧ୍ୟୟନ କରୁଛନ୍ତି। ଅଧ୍ୟୟନ ସହିତ ସେ କ୍ରିକେଟ ପ୍ରତି ମଧ୍ୟ ବହୁତ ଆଗ୍ରହୀ।