ଭୁବନେଶ୍ୱର,୧୭।୧୨(ବ୍ୟୁରୋ): ପୂର୍ବ ଶତ୍ରୁତାକୁ କେନ୍ଦ୍ର କରି ଦିନ ଦ୍ୱିପହରରେ ଜଣେ ହୋଟେଲ ମାଲିକଙ୍କୁ କଟୁରି ଧରି ଗୋଡାଇ ଗୋଡାଇ ହାଣିଲେ ଯୁବକ। ମଞ୍ଚେଶ୍ୱର ଥାନା ଅନ୍ତର୍ଗତ ରସୁଲଗଡ଼ରେ ଶୁକ୍ରବାର ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି। ଯୁବକଙ୍କ କଟୁରି ଚୋଟରେ ରସୁଲଗଡର ବିମ୍ବାଧର ଓରଫ ବମ୍ବେ ଜେନା (୬୦)ଙ୍କ କାନ, ମୁଣ୍ଡ ଓ ଗାଲରେ ଗଭୀର ଆଘାତ ଲାଗିବାରୁ ଆହତ ହୋଇଛନ୍ତି। ଆହତ ଅବସ୍ଥାରେ ତାଙ୍କୁ ଉଦ୍ଧାର କରାଯାଇ ପ୍ରଥମେ କ୍ୟାପିଟାଲ ପରେ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ଖବରପାଇ ମଞ୍ଚେଶ୍ୱର ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ହୋଟେଲର ସମସ୍ତ କର୍ମଚାରୀଙ୍କୁ ପଚରାଉଚରା କରିଛି। ଏଥିସହ ଏଭଳି କାଣ୍ଡ ଭିଆଇଥିବା ଉକ୍ତ ଅଞ୍ଚଳର ଯୁବକଙ୍କୁ ଅଟକ ରଖି ଘଟଣାର ଅଧିକ ତଦନ୍ତ ଚଳାଇଛି। ଅନ୍ୟପଟେ ଥାନାଠାରୁ ମାତ୍ର ୩୦୦ ମିଟର ଦୂରରେ ଏଭଳି ଘଟଣା ଘଟିବାକୁ ନେଇ ଅପରାଧୀମାନେ ପୋଲିସକୁ ନ ଡରିବା ସହ ଖୋଲା ଚ୍ୟାଲେଞ୍ଜ ଦେଇଛନ୍ତି ବୋଲି ସାଧାରଣରେ ଆଲୋଚନା ହେଉଛି।
ସ୍ଥାନୀୟ ଲୋକଙ୍କ କହିବାନୁସାରେ, ଉଭୟ ହୋଟେଲ ମାଲିକ ବିମ୍ବାଧର ଏବଂ ଅଟକ ଯୁବକଙ୍କ ପରିବାର ମଧ୍ୟରେ ହୋଟେଲର ପଛ ପାର୍ଶ୍ୱରେ ଥିବା ପ୍ଲଟକୁ ନେଇ ଦୀର୍ଘ ଦିନ ଧରି ବିବାଦ ଲାଗି ରହିଛି। ଗତ ୪୪ ବର୍ଷ ଧରି ଉକ୍ତ ଜମିର ମାଲିକାନାକୁ ନେଇ ଉଭୟ ପରିବାର ଏକ ଆଇନଗତ ଲଢ଼େଇ କରୁଥିଲେ। ୨ ପରିବାରଙ୍କ ଉପସ୍ଥିତିରେ ରାଜସ୍ବ ଅଧିକାରୀଙ୍କ ଦ୍ୱାରା ତର୍ଜମା କରାଯାଇଥିଲା। ତର୍ଜମା ପରେ ଜଣାପଡିଥିଲା ଯେ ଯୁବକଙ୍କ ପରିବାରର ସେଥିରେ କୌଣସି ଜାଗା ନାହିଁ । ଏ ନେଇ ୧୨ ଦିନ ପୂର୍ବରୁ ଓଡ଼ିଶା ହାଇକୋର୍ଟ ବିମ୍ବାଧରଙ୍କ ସପକ୍ଷରେ ଆଦେଶ ଦେବା ପରେ ଏହି ଜମି ଅଧିକାର କରିଥିଲେ। ଏହାସହ ଉକ୍ତ ଜାଗାରେ ଗଣ୍ଡଗୋଳ ଆଶଙ୍କା ଥିବାରୁ ୧୪୪ ଧାରା ଲାଗୁ କରାଯାଇଥିଲା। ତେବେ ଏଥିରେ ଉତ୍କ୍ଷିପ୍ତ ହୋଇ ଉକ୍ତ ଯୁବକ ଶୁକ୍ରବାର ସକାଳେ ହୋଟେଲ ପଛ ପଟେ ବସିଥିବା ବିମ୍ବାଧରଙ୍କୁ ଅଚାନକ ଆକ୍ରମଣ କରିଥିଲା। ସ୍ଥାନୀୟ ଲୋକମାନେ ଘଟଣାସ୍ଥଳରେ ପହଞ୍ଚି ଆହତ ବିମ୍ବାଧରଙ୍କୁ ଉଦ୍ଧାର କରି ଡାକ୍ତରଖାନାକୁ ନେଇଥିଲେ ।