ବରଗଡ଼ ଅଫିସ,୨୬।୯: ବିଶ୍ୱରେ କରୋନା(କୋଭିଡ-୧୯) ସଂକ୍ରମଣ ବ୍ୟାପି ଚାଲିଛି । ଏ ପର୍ଯ୍ୟନ୍ତ ଏହାର କୌଣସି ଠୋସ ପ୍ରତିଷେଧକ ଔଷଧ କିମ୍ବା ଭ୍ୟାକସିନ୍ ବାହାରି ପାରି ନାହିଁ। ଏଥିପାଇଁ ବିଶ୍ୱ ସ୍ବାସ୍ଥ୍ୟ ସଂଗଠନ ( ଡବ୍ଲୁଏଚ୍ଓ) ତଥା ସ୍ବାସ୍ଥ୍ୟ ବିଶେଷଜ୍ଞମାନେ ଦିନରାତି ଲାଗି ପଡିଥିଲେ ହେଁ, ସେଥିରେ ବର୍ତ୍ତମାନ ସୁଦ୍ଧା ସକ୍ଷମ ହୋଇ ପାରି ନାହାନ୍ତି।
ଅନ୍ୟପକ୍ଷରେ ବରଗଡ଼ ଜିଲା ଭେଡେନ୍ ଥାନା ରୁଷୁଡା ଅଞ୍ଚଳର ଜଣେ ଯୁବକ ପ୍ରହଲ୍ଲାଦ ବିଶି ନିଜେ କୋଭିଡ-୧୯ ପ୍ରତିଷେଧକ ଟୀକା (ଭ୍ୟାକସିନ୍) ପ୍ରସ୍ତୁତ କରିଛନ୍ତି ବୋଲି ଦାବି କରିବା ଆଲୋଡ଼ନ ସୃଷ୍ଟି କରିଛି। ଏ ନେଇ ଖବରପାଇ ବରଗଡ଼ ଡ୍ରଗ୍ସ ଇନ୍ସପେକ୍ଟର ସସ୍ମିତା ଦେହୁରୀ ସମ୍ପୃକ୍ତ ଯୁବକଙ୍କ ପାଖରେ ପହଞ୍ଚି ଖୋଳତାଡ଼ ଆରମ୍ଭ କରିଛନ୍ତି। ତାଙ୍କ ପାଖରୁ ଲାଲ ଓ ନୀଳ ରଙ୍ଗର ୧୨ ଭାଏଲ ସେହି ତଥାକଥିତ ଟିକା, ସିରିଞ୍ଜ ଆଦି ଜବତ୍ ହୋଇଛି ବୋଲି ଡ୍ରଗ୍ସ ଇନ୍ସପେକ୍ଟର ଦେହୁରୀ କହିଛନ୍ତି। ଏ ସମ୍ପର୍କରେ ଡ୍ରଗ୍ସ କଣ୍ଟ୍ରୋଲ ରୁମ୍କୁ ଜଣାଯିବା ସହିତ ଏକ ନମୁନା ପରୀକ୍ଷା ପାଇଁ ଲାବୋରେଟୋରୀକୁ ପଠାଯାଇଛି ବୋଲି ଦେହୁରୀ କହିଛନ୍ତି। ସେହିପରି ସମ୍ପୃକ୍ତ ଯୁବକ ଡ୍ରଗ୍ସ ଆକ୍ଟ ଉଲ୍ଲଂଘନ କରିଥିବା ଯୋଗୁ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ଡ୍ରଗ୍ସ ଇନ୍ସପେକ୍ଟର ଦେହୁରୀ କହିଛନ୍ତିି। ଅନ୍ୟପଟେ ସେ ଭ୍ୟାକସିନ ପ୍ରସ୍ତୁତ କରିବା ପରେ ନିଜେ ଖବର ଦେବାରୁ ଡ୍ରଗ୍ସ ଇନ୍ସପେକ୍ଟର ଦେହୁରୀ ତାଙ୍କ ପାଖକୁ ପହଞ୍ଚି ଥିଲେ ବୋଲି ସମ୍ପୃକ୍ତ ଯୁବକ କହିଛନ୍ତି । ସେହି ଭ୍ୟାକସିନ୍ ପ୍ରୟୋଗ କଲେ ତାହା ନିଶ୍ଚିତ କାମ ଦେବ ବୋଲି ଯୁବକ ଜଣକ କହିଛନ୍ତି। ସମ୍ପୃକ୍ତ ଯୁବକ ଜଣକ ଭେଡେନ୍ ଥାନା ରେମଣ୍ଡା ଅଞ୍ଚଳର ମୂଳ ବାସିନ୍ଦା ଏବଂ ଗତ କିଛିମାସ ହେଲା, ସେ ରୁଷୁଡାର ଏକ ଭଡାଘରେ ବାସ କରୁଛନ୍ତି ବୋଲି ସ୍ଥାନୀୟ ଲୋକେ କହିଛନ୍ତି। ଘଟଣାଟି ଜିଲାରେ ହଇଚଇ ସୃଷ୍ଟି କରି ଦେଇଛି।