ରାୟଗଡ଼ା,୨୦ା୯(ଆଶିଷ ରଞ୍ଜନ ପଣ୍ଡା): ରାୟଗଡ଼ା ସହର ଉପକଣ୍ଠ ଧୁମାଗୁଡ଼ା ଗାଁ ନିକଟ ନାଗାବଳୀ ନଦୀରେ ବୁଧବାର ଏକ ଅଘଟଣ ଘଟିଛି। ଗଣେଶ ମୂର୍ତ୍ତି ବିସର୍ଜନ ବେଳେ ଜଣେ ଯୁବକ ନିଖୋଜ ହୋଇଯାଇଛନ୍ତି। ନିଖୋଜ ଯୁବକ ହେଲେ ମାଙ୍କଡଝୋଲା ବସ୍ତିର ଶ୍ରୀନିବାସ ଅଶୋକ କୁମାର (୩୦)। ଆଜି ଅପରାହ୍ନରେ ଏହି ଘଟଣା ଘଟିଛି। ଅଶୋକ ନିଜ ମା’ଙ୍କ ସହ ନାଗାବଳୀ ନଦୀରେ ଗଣେଶ ମୂର୍ତ୍ତି ବିସର୍ଜନ ପାଇଁ ଆସିଥିଲେ। ପୋଲ ଉପରେ ମା’ ଠିଆ ହୋଇଥିବା ବେଳେ ଅଶୋକ ନଦୀକୁ ଯାଇ ମୂର୍ତ୍ତି ବିସର୍ଜନ କରୁଥିଲେ। ତେବେ ପ୍ରବଳ ବର୍ଷାରେ ନଦୀ କୂଳରେ ମାଟି ଖସଡ଼ା ଓ ଶିଉଳି ହୋଇଥିବାରୁ ସେ ଖସି ପଡ଼ିଥିଲେ। ଖସିଯାଇ ସିଧା ନଦୀର ସ୍ରୋତରେ ଭାସି ଯାଇଛନ୍ତି। ଏହା ଦେଖି ତାଙ୍କ ମା’ ପାଟି କରିଥିଲେ। ପାଟି ଶୁଣି କିଛି ଯୁବକ ପହଞ୍ଚି ତୁରନ୍ତ ଦମକଳ କେନ୍ଦ୍ରକୁ ସୂଚନା ଦେଇଥିଲେ। ଖବରପାଇ ଦମକଳବାହିନୀ ଯବାନ ପହଞ୍ଚି ନଦୀ ଭିତରେ ଖୋଜାଖୋଜି କରୁଛନ୍ତି। ତେବେ ଅଶୋକଙ୍କ ପତ୍ତା ମିଳିନାହିଁ। ବର୍ଷାଯୋଗୁ ଏଥିରେ ବାଧା ସୃଷ୍ଟି ହୋଇଛି। ଏଥିସହ ରାୟଗଡ଼ା ଥାନା ପୋଲିସ ମଧ୍ୟ ପହଞ୍ଚି ଘଟଣାର ଅନୁଧ୍ୟାନ କରିଛି। ଏହି ଘଟଣା ପରେ ପରିବାରବର୍ଗ ଭାଙ୍ଗି ପଡ଼ିଛନ୍ତି। ଅଶୋକଙ୍କୁ ଖୋଜିବା ପାଇଁ ନଦୀର ତଳ ମୁଣ୍ଡରେ ମଧ୍ୟ ଗୋଟିଏ ଦମକଳବାହିନୀ ଟିମ୍ ଓ ତାଙ୍କର ସାଙ୍ଗମାନେ ଲାଗିଛନ୍ତି। ଅଶୋକ ଜେକେ କାଗଜକଳରେ କାମ କରୁଥିବା ସୂଚନା ମିଳିଛି।