ନିଶ୍ଚିନ୍ତକୋଇଲି,୨୫ା୧୧(ସ୍ବ.ପ୍ର.): କଟକ ଜିଲା ନିଶ୍ଚିନ୍ତକୋଇଲି ଥାନା ଅଧିନସ୍ଥ ସରପଡ଼ା ଗ୍ରାମର ଜଣେ ନାବାଳିକାଙ୍କୁ ସେହି ଗ୍ରାମର ଜଣେ ଯୁବକ ବିଭିନ୍ନ ପ୍ରକାର ପ୍ରଲୋଭନ ଦେଖାଇ ଅନୈତିକ ସମ୍ପର୍କ ରଖିବା ନେଇ ସମ୍ପୃକ୍ତା ନାବାଳିକାଙ୍କ ମା’ ଥାନାରେ ଅଭିଯୋଗ କରିଛନ୍ତି।
ସୂଚନାରୁ ପ୍ରକାଶ ଯେ, ସରପଡ଼ା ଗ୍ରାମର ଜଣେ ନାବାଳିକା ଅଷ୍ଟମ ଶ୍ରେଣୀରେ ପଢନ୍ତି। ସେହି ଗ୍ରାମର ଆଲୋକ କୁମାର ସାହୁ ନାବାଳିକାଙ୍କ ଘରକୁ ଯିବା ଆସିବା କରୁଥିଲେ। ପରେ ନାବାଳିକାଙ୍କୁ ମୋବାଇଲ ଏବଂ ବିବାହ ପ୍ରଲୋଭନ ଦେଖାଇ ତାଙ୍କ ସହ ଅନୈତିକ ସମ୍ପର୍କ ସ୍ଥାପନ କରିଥିଲେ। ଝିଅ ହାତରେ ଏକ ମୋବାଇଲ ଦେଖି ନାବାଳିକାଙ୍କ ମା’-ବାପା ପଚାରିବାରୁ ସମସ୍ତ ଘଟଣା ସମ୍ପର୍କରେ ସମ୍ପୃକ୍ତା ନାବାଳିକା ପ୍ରକାଶ କରିଥିଲେ।
ଏହା ପରେ ନାବାଳିକାଙ୍କ ମା’-ବାପା ଆଲୋକଙ୍କ ଘରକୁ ଯାଇ ତାଙ୍କ ବାପାଙ୍କ ସହ କଥା ହୋଇଥିଲେ। ଆଲୋକ ଘରେ ନ ଥିବା ସେ ପ୍ରକାଶ କରିଥିଲେ। ଘଟଣା ସମ୍ପର୍କରେ ଆଲୋକ ଜାଣି ସମ୍ପୃକ୍ତା ନାବାଳିକାଙ୍କ ଘରକୁ ଆସି ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଧମକ ଦେଇଥିଲେ। ଏନେଇ ନାବାଳିକାଙ୍କ ମା’ ନିଶ୍ଚିନ୍ତକୋଇଲି ଥାନାରେ ବୁଧବାର ଲିଖିତ ଅଭିଯୋଗ କରିଥିଲେ। ଏହି ଅଭିଯୋଗକୁ ଭିତ୍ତିକରି ଗୁରୁବାର ନିଶ୍ଚିନ୍ତକୋଇଲି ଥାନାଧିକାରୀ ଚିନ୍ମୟୀ ସାହୁ ତଦନ୍ତ ଚାଲୁ ରଖିଥିବା ପ୍ରକାଶ କରିଛନ୍ତି। କେସ୍ ନଂ ୧୬୭/୨୧ରେ ଏକ ମାମଲା ରୁଜୁ କରାଯାଇଥିବାବେଳେ ଉଭୟଙ୍କର ଡାକ୍ତରୀ କରାଯାଇଛି। ଏଥିସହ ନାବାଳିକାଙ୍କ ବୟାନ ରେକର୍ଡ ମଧ୍ୟ କରାଯାଇଛି। ପରେ ଅଭିଯୁକ୍ତ ଆଲୋକ କୁମାର ସାହୁଙ୍କୁ ଗିରଫ କରାଯାଇଛି।
