ବଣାଇଁ,୪।୯(ପ୍ରଦୀପ ତ୍ରିପାଠୀ): ସୁନ୍ଦରଗଡ଼ ଜିଲା ବଣାଇଁ ବନାଞ୍ଚଳ ସରସରା ସେକସନ କୁଲୁକୁତାରେ ଏକ ଦୁଃଖଦ ଘଟଣା ଘଟିଛି। କୁଲୁକୁତା ଅଞ୍ଚଳରେ ପ୍ରାୟ ୭ ଦିନ ଧରି ଏକ ଗୋଠଛଡା ଦନ୍ତା ଘୁରି ବୁଲି ଆତଙ୍କ ସୃଷ୍ଟି କରୁଥିଲା l ଧନ ଜୀବନ ହାନୀ ଆଶଙ୍କାରେ ଅଞ୍ଚଳବାସୀ ବନବିଭାଗର ସହାୟତା ଲୋଡି ହାତୀ ଘଉଡାଇବା କାର୍ଯ୍ୟରେ ସହଯୋଗ କରିଥିଲେ। ଗତକାଲି କୁଲୁକୁତା ମୁଣ୍ଡାବସ୍ତିର ଗୋବିନ୍ଦ ମୁଣ୍ଡା ବନବିଭାଗ ସହ ହାତୀ ଘଉଡାଇବାକୁ ଯାଇ ହାତୀର ପାଲଟା ଆକ୍ରମଣର ଶିକାର ସାଜି ମୃତ୍ୟୁବରଣ କରିଥିବା ଜଣାପଡିଛି l ଆଜି ସକାଳେ ଘଟଣାସ୍ଥଳରୁ ବନବିଭାଗ ମୃତଦେହ ଉଦ୍ଧାର କରି ବଣାଇଁ ଉପଖଣ୍ଡ ଚିକିତ୍ସାଳୟକୁ ବ୍ୟବଚ୍ଛେଦ ନିମନ୍ତେ ପଠାଇଛନ୍ତି l ଗ୍ରାମରେ ଉତ୍ତେଜନା ନେଇ ବନବିଭାଗ ପକ୍ଷରୁ ବୁଝାସୁଝା ପରେ ପରିସ୍ଥିତି ଶାନ୍ତ ରହିଛି l ଏଭଳି ଘଟଣାରେ କ୍ଷତିଗ୍ରସ୍ତ ପରିବାର ପ୍ରତି ସମବେଦନା ଜଣାଇ ମୃତକଙ୍କ ପରିବାରବର୍ଗଙ୍କୁ ଉପଯୁକ୍ତ କ୍ଷତିପୂରଣ ଦିଆଯିବା ପ୍ରକ୍ରିୟା ଚାଲିଥିବା ବଣାଇଁ ଡିଏଫଓ ଲଳିତ ପାତ୍ର ସୂଚନା ଦେଇଛନ୍ତି l