ଉଦଳା,୯ା୧୨(ଡି.ଏନ.ଏ.)- ବିଚ୍ ରାସ୍ତାରେ ଯୁବକଙ୍କୁ ମାଡ଼। ତାହା ପୁଣି ରାଜ୍ୟ ରାଜପଥରେ ଶତାଧିକ ଲୋକଙ୍କ ସମ୍ମୁଖରେ। ଉଦଳା ଥାନା ପୋଲିସ୍ ଘଟଣାସ୍ଥଳରେ ଉପସ୍ଥିତ ଥାଇ ମଧ୍ୟ ନୀରବଦ୍ରଷ୍ଟା ସାଜିଥିଲା। ଆଇନକୁ ହାତକୁ ନେଇ ଜଣେ ଯୁବକଙ୍କୁ ଉଲଗ୍ନ କରି କାନ ଧରାଇ ଉଠ୍ବସ କରାଯିବା ଘଟଣା ସୋସିଆଲ ମିଡିଆରେ ଭାଇରାଲ ହେବା ପରେ ମୟୂରଭଞ୍ଜ ଏସ୍ପି ପରମାର ସ୍ମିଥ ପୁରୁଷୋତ୍ତମ ଦାସ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ସେଠାରେ ଉପସ୍ଥିତ ଥିବା ଦୁଇ ପୋଲିସ କର୍ମଚାରୀଙ୍କୁ ସେ ନିଲମ୍ବନ କରିଛନ୍ତି। ନିଲମ୍ବିତ ଦୁଇ ପୋଲିସ କର୍ମଚାରୀ ହେଲେ ସି.ଏସ.ଆଇ. ବିଜୟ କୁମାର ମୁର୍ମୁ ଓ ଡ୍ରାଇଭର ଚନ୍ଦ୍ରକାନ୍ତ ପଣ୍ଡା। ମାଡ଼ ମାରିଥିବା ଯୁବକ ଉଦୟ କରଙ୍କୁ କୋର୍ଟ ଚାଲାଣ କରାଯାଇଛି। ଏନେଇ ଥାନାରେ ଏକ ମାମଲା(ନଂ.୩୧୨/୨୦) ରୁଜୁ ହୋଇଛି।
ସୂଚନା ଅନୁଯାୟୀ, ଖୋର୍ଦ୍ଧା ଜିଲା ବାଣପୁର ଅଞ୍ଚଳର ଜଣେ ଯୁବକ ବାଲେଶ୍ୱରର ଏକ କମ୍ପାନୀରେ କାର୍ଯ୍ୟ କରନ୍ତି। ମଙ୍ଗଳବାର ସେ କୌଣସି କାମରେ ଉଦଳା ଆସିଥିବା ବେଳେ ତାଙ୍କର ଜଣେ ଝିଅ ସାଙ୍ଗଙ୍କୁ ଦେଖା କରିଥିଲେ ା ସମ୍ପୃକ୍ତା ଝିଅଙ୍କୁ ଉଦଳା ଅଞ୍ଚଳର ଉଦୟ କର ଦୀର୍ଘ ଦିନ ହେବ ହଇରାଣ ହରକତ କରି ଆସୁଥିଲେ ା ମଙ୍ଗଳବାର ବାଣପୁର ଅଞ୍ଚଳର ଯୁବକ ଜଣକ ଝିଅ ସାଙ୍ଗଙ୍କ ସହ ଏକ ଫଟୋ ଉଠାଇ ଉଦୟ କରଙ୍କ ମୋବାଇଲକୁ ପଠାଇଥିଲେ। ସନ୍ଧ୍ୟାରେ ବାଣପୁର ଅଞ୍ଚଳର ଯୁବକ ଉଦଳା ହାଇସ୍କୁଲ ଛକ ନିକଟରେ ଥିବା ଏକ ଚା ଦୋକାନରେ ଛିଡ଼ା ହୋଇଥିବା ବେଳେ ହଠାତ୍ ଉଦୟ ସେଠାରେ ପହଞ୍ଚି ତାଙ୍କୁ ନିସ୍ତୁକ ମାଡ଼ ମାରିଥିଲେ। ବାଣପୁର ଅଞ୍ଚଳର ଯୁବକ ସେଠାରୁ ଖସି ପଳାଇଯାଇ ନିକଟସ୍ଥ ଏକ ଲଜ୍ରେ ରହିଥିଲେ। ପରେ ସେ ବାଲେଶ୍ୱର ବାହାରି ଯିବାକୁ ଚେଷ୍ଟା କରୁଥିଲା ବେଳେ ଉଦୟ ସେଠାରେ ପହଞ୍ଚି ତାଙ୍କୁ ରାଜ୍ୟ ରାଜପଥକୁ ଘୋଷାରି ଆଣିଥିଲେ। ରାସ୍ତା ମଝିରେ ଉଲଗ୍ନ କରି କାନ ଧରି ଉଠ୍ବସ କରାଇଥିଲେ ା ଏହି ସମୟରେ ଉଦଳା ପୋଲିସ ସେଠାରେ ପହଞ୍ଚିଥିଲେ ମଧ୍ୟ କିଛି ପଦକ୍ଷେପ ଗ୍ରହଣ କରି ନ ଥିଲା। ଦୀର୍ଘ ସମୟ ଏପରି ଚାଲିବା ପରେ ଶେଷରେ ବାଧ୍ୟ ହୋଇ ପୋଲିସ ବାଣପୁର ଅଞ୍ଚଳର ଯୁବକଙ୍କୁ ଥାନାକୁ ନେଇଯାଇଥିଲା। ପରେ ମାଡ଼ ମାରିଥିବା ଉଦୟ ମଧ୍ୟ ଥାନାରେ ପହଞ୍ଚିଥିଲେ। ରାତି ୧୦ଟାରେ ଉଭୟ ପକ୍ଷଙ୍କ ମଧ୍ୟରେ ଘଟଣାର ସମାଧାନ ହେବାରୁ ପୋଲିସ ବାଣପୁର ଅଞ୍ଚଳର ଯୁବକଙ୍କୁ ଛାଡ଼ି ଦେଇଥିଲା।
ଏନେଇ ମାଡ଼ ଖାଇଥିବା ଯୁବକଙ୍କୁ ପଚାରିବାରୁ ସେ କୌଣସି ଭୁଲ୍ କରି ନ ଥିବାବେଳେ ହଠାତ୍ ତାଙ୍କୁ ଉଲଗ୍ନ କରି ଉଠ୍ବସ କରାଇବା ଦ୍ୱାରା ତାଙ୍କର ସମ୍ମାନ ହାନି ହୋଇଥିବା କହିଛନ୍ତି। ଏ ସଂକ୍ରାନ୍ତରେ ଉଦଳା ଥାନା ଆଇଆଇସି ମୁକ୍ତିକାନ୍ତ କୁଲୁଙ୍କୁ ପଚାରିବାରୁ ମୁଁ ବ୍ୟସ୍ତ ଅଛି, ଉକ୍ତ ଘଟଣା ବାବଦରେ କିଛି କହିପାରିବି ନାହିଁ ବୋଲି କହିଥିଲେ।
