ବ୍ରହ୍ମପୁର ଅଫିସ,୧ା୩: ଜନୈକା ମହିଳାଙ୍କୁ ଅଶ୍ଳୀଳ ଭିଡିଓ ପଠାଇ ଜଣେ ଯୁବକ ଗିରଫ ହୋଇଛନ୍ତି। ସେ ହେଲେ ଶିବରାମ ଜେନା (୨୯) । ପୋଲିସ ତାଙ୍କ ନିକଟରୁ ଏକ ମୋବାଇଲ୍ ଫୋନ ଜବତ କରିଛି। ମୋବାଇଲ ଯାଞ୍ଚ ବେଳେ ସେ ଏଭଳି ଅଶ୍ଳୀଳ ଭିଡିଓ ୫୦ରୁ ଊର୍ଦ୍ଧ୍ୱ ଯୁବତୀ ଓ ମହିଳାଙ୍କୁ ପଠାଇଥିବା ପୋଲିସ ଜାଣିବାକୁ ପାଇଛି। ଅଭିଯୁକ୍ତ ଜଣକ ଏକ ରାଜନୈତିକ ଦଳର ଯୁବନେତା ଥିବା ପୋଲିସ ତଦନ୍ତ ବେଳେ ଜାଣିବାକୁ ପାଇଛି। ଶିବରାମ ଫେସ୍ବୁକ୍ରେ ଏକ ନକଲି ଆଇଡି ଖୋଲିଥିଲେ। ଏହି ଆଇଡ଼ି ଜରିଆରେ ସେ ୨୦୨୦ ଅଗଷ୍ଟରେ ଜନୈକା ମହିଳାଙ୍କ ନିକଟକୁ ଫେସ୍ବୁକ୍ ମେସେଞ୍ଜରରେ କେତେକ ଅଶ୍ଳୀଳ ଫଟୋ ଏବଂ ଭିଡିଓ ପଠାଇ ଶାରୀରିକ ସମ୍ପର୍କ ରଖିବାକୁ ପ୍ରସ୍ତାବ ଦେଇଥିଲେ। ଶିବରାମ ବାରମ୍ବାର ଏଭଳି ଭିଡିଓ ପଠାଇବାରୁ ମହିଳା ଜଣକ ସାଇବର୍ ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା(ନଂ. ୧୬/୨୦) ରୁଜୁ କରିଥିଲା। ଘଟଣାର ତଦନ୍ତ ପରେ ପୋଲିସ ଶିବରାମଙ୍କୁ ଗିରଫ କରି କୋର୍ଟ ଚାଲାଣ କରିଛି।
