ଚାନ୍ଦବାଲି,୧୩।୩(ଡି.ଏନ.ଏ.)-ବ୍ୟବସାୟୀଙ୍କୁ ନକଲି ସୁନା ଅଳଙ୍କାର ବିକ୍ରି କରୁଥିବା ବେଳେ ଧରା ପଡ଼ିଛନ୍ତି ଜଣେ ଯୁବକ। ତାଙ୍କ ନିକଟରୁ ୩୮ ଗ୍ରାମର ନକଲି ସୁନା ଅଳଙ୍କାର ସହିତ ଏକ କାର୍ ଜବତ କରିଛି ପୋଲିସ। ଶୁକ୍ରବାର ଭଦ୍ରକ ଜିଲା ଚାନ୍ଦବାଲି ବ୍ଲକ ମତୋ ବଜାରରେ ଏଭଳି ଘଟଣା ଦେଖିବାକୁ ମିଳିଛି।
ସୂଚନା ଅନୁଯାୟୀ, ଅପରାହ୍ନ ପ୍ରାୟ ୪ଟା ବେଳେ ଜଣେ ଯୁବକ ଏକ କାର୍ରେ ଆସି ମୁହଁରେ ମାସ୍କ ଲଗାଇ ମତୋ ବଜାରର ଜଣେ ସୁନା ବ୍ୟବସାୟୀଙ୍କୁ ଚୁଡ୍ ବିକ୍ରି କରିବାକୁ ଦେଖାଇଥିଲେ। ଅଳଙ୍କାର ଉପରେ ବିଏସ୍ଆଇର ହଲମାର୍କ ମଧ୍ୟ ରହିଥିଲା। ଭଉଣୀ ବିବାହ ପାଇଁ ଏହି ଅଳଙ୍କାରକୁ ବିକି ଅନ୍ୟ କିଛି ଅଳଙ୍କାର ନେବାକୁ ସେ ଯୋଜନା କରିଥିବା କହିଥିଲେ। ସମ୍ପୃକ୍ତ ସୁନା ଦୋକାନୀଙ୍କର ସନ୍ଦେହ ହେବାରୁ ସେ ଏହାକୁ ପରୀକ୍ଷା କରିବା ପରେ ହଲ୍ମାର୍କ ସତ୍ତ୍ୱେ ନକଲି ବୋଲି ଜଣାପଡ଼ିଥିଲା। ଏହାପରେ ଯୁବକଙ୍କୁ ତାଙ୍କ ଘର ପଚାରିବାରୁ ସେ ସ୍ଥାନୀୟ ବାଂଶଡ଼ା ଥାନା ଅଧୀନ ଯଶୀପୁର ବୋଲି କହିଥିଲେ। ଅଧିକ ପଚରାଉଚରା କରିବାରୁ ଘର କଟକ ଜିଲାର ସାଲେପୁର ଅଞ୍ଚଳରେ କହିଥିଲେ। ସ୍ଥାନୀୟ ଲୋକେ ତାଙ୍କୁ ଧରି ମତୋ ଫାଣ୍ଡିରେ ଜିମା ଦେଇଥିଲେ। ମତୋ ଫାଣ୍ଡିରୁ ତାଙ୍କୁ ଚାନ୍ଦବାଲି ଥାନାକୁ ନିଆଯାଇଛି। ଚାନ୍ଦବାଲିର କେତେଜଣ ବ୍ୟବସାୟୀଙ୍କୁ ଏପରି ଠକିଥିବା ନେଇ ଆଲୋଚନା ହେଉଛି। ପୋଲିସ ଏ ନେଇ ଅଧିକ ତଦନ୍ତ କରୁଛି।