ରସୁଲପୁର,୩୧ା୩(ଡି.ଏନ.ଏ.): ଯାଜପୁର ଜିଲା କୁଆଖିଆ ଥାନା ଅନ୍ତର୍ଗତ ରାହାମ୍ବା ପଞ୍ଚାୟତ ମିର୍ଜାପୁର ଗ୍ରାମର ବିକାଶ ଲେଙ୍କାଙ୍କ ମୃତଦେହକୁ ପୋଲିସ ଗୁରୁବାର ଏକ ପରିତ୍ୟକ୍ତ ପୋଖରୀରୁ ଜବତ କରିଛି। ଏ ନେଇ ମୃତ ଯୁବକଙ୍କ ଦାଦା ନୀଳମଣି ଲେଙ୍କା ତାଙ୍କ ପୁତୁରାକୁ ମାରି ପୋଖରୀରେ ଫିଙ୍ଗି ଦିଆଯାଇଛି ବୋଲି ଥାନାରେ ଅଭିଯୋଗ କରିଛନ୍ତି। ପୋଲିସ ଏକ ମାମଲା (ନଂ.୧୦୫/୨୩) ରୁଜୁ କରି ତଦନ୍ତ କରୁଛି। ବ୍ୟବଚ୍ଛେଦ ପରେ ପୋଲିସ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରିଛି। ଜମିବାଡ଼ି ବିବାଦକୁ ନେଇ ଏହି ଘଟଣା ଘଟିଥିବା ପୋଲିସ ପ୍ରାଥମିକ ତଦନ୍ତରୁ ଜଣାପଡିଛି।
ସୂଚନା ଅନୁଯାୟୀ, ବୁଧବାର ରାତି ପ୍ରାୟ ୧୦ଟାରେ ବିକାଶ ଲେଙ୍କା ଓ ସାଙ୍ଗ ମୁନା ଜେନାଙ୍କ ସହ ମିର୍ଜାପୁରରୁ ରାହାମ୍ବା ଗ୍ରାମକୁ ଆସିଥିଲେ। ଗୁରୁବାର ସକାଳ ୮ଟାରେ ତାଙ୍କ ମୃତଦେହ ରାହାମ୍ବା ପୋଖରୀରେ ଭାସୁଥିବା ଠାବ କରାଯାଇଥିଲା। ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ପରିବାର ପକ୍ଷରୁ ଅଭିଯୋଗ ହେଉଛି। ତେବେ ଏହି ଘଟଣା ସହ ସମ୍ପର୍କ ଯୋଡୁଥିବା ଅନ୍ୟ କିଛି ଘଟଣା ନେଇ ଏହା ଏକ ହତ୍ୟାକାଣ୍ଡ ବୋଲି ସୂଚାଉଛି। ବୁଧବାର ରାତିରେ ୧୬ନଂ. ଜାତୀୟ ରାଜପଥ ପାର୍ଶ୍ୱ ଏକ ହୋଟେଲରେ ଏ ନେଇ ଯୋଜନା ପ୍ରସ୍ତୁତ ହୋଇଥିଲା। ହରି ବରାଳଙ୍କ ବଡ଼ପୁଅ ଗରୁଡ ଉକ୍ତ ହୋଟେଲରେ ଜଣେ କର୍ମଚାରୀ ଭାବେ କାମ କରନ୍ତି। ସେଦିନ ରାତିରେ ଗରୁଡ଼ ଫୋନ ଯୋଗେ ତାଙ୍କ ସହଯୋଗୀଙ୍କ ସହ କଥା ହୋଇ ହତ୍ୟାର ଯୋଜାନ ପ୍ରସ୍ତୁତି କରିଥିଲେ। ଏହି କଥା ଉକ୍ତ ହୋଟେଲର ଅନ୍ୟ ଜଣେ କର୍ମଚାରୀ ଶୁଣିଥିବା ସୂଚନା ମିଳିଛି। ଘଟଣା ଦିନ ରାତିରେ ଗୁରୁଡ଼ ଫୋନରେ ତାଙ୍କ ସହଯୋଗୀଙ୍କୁ କହୁଥିଲେ ତାକୁ ବାନ୍ଧିକି ରଖିଥାଅ, ସେ ଗଲେ ତାକୁ ମାରିକି ପୋଖରୀରେ ଫୋପାଡି ଦେବ । ଗୁରୁବାର ସକାଳୁ ବିକାଶଙ୍କ ମୃତଦେହ ପୋଖରୀରୁ ମିଳିଥିବାରୁ ଏହା ହତ୍ୟା ଘଟଣା ବୋଲି ଚର୍ଚ୍ଚା ଜୋର ଧରିଛି। ପୋଲିସ ଉକ୍ତ ଘଟଣାରେ ୩ଜଣ ଯୁବକଙ୍କୁ ଥାନାରେ ଅଟକ ରଖି ପଚରା ଉଚୁରା ଜାରି ରଖିଛି।
ସୂଚନାଯୋଗ୍ୟ, ୨୦୧୬ରୁ ଜମିବାଡ଼ି ବିବାଦକୁ ନେଇ କୁଳମଣି ଲେଙ୍କାଙ୍କ ପରିବାର ଓ ହରି ବରାଳ ପରିବାର ମଧ୍ୟରେ ଗଣ୍ଡଗୋଳ ହୋଇଥିଲା। ସେତେବେଳେ ହରି ବରାଳ ଓ ମୁନା ବରାଳ ମିଶି ବିକାଶଙ୍କ ୨ ହାତକୁ ହାଣି ଦେଇଥିଲେ। ଏହାକୁ ନେଇ କୁଆଖିଆ ଥାନାରେ ମାମଲା ରୁଜୁ ହେବା ସହ ଅଭିଯୁକ୍ତମାନେ ଫେରାର ଅଛନ୍ତି। ଘଟଣା ଦିନ ରାତିରେ ହରି ବରାଳଙ୍କ ବଡପୁଅଙ୍କ ଫୋନ କଲ ଓ ବିକାଶଙ୍କ ମୃତ୍ୟୁ ଘଟିବା ହତ୍ୟାକାଣ୍ଡ ଆଡକୁ ଅଙ୍ଗୁଳି ଦେଖାଉଛି। ଏହାଛଡା ବିକାଶଙ୍କ ସହ ପଡୋଶୀ ଗିରିଧାରୀ ପରିବାର ସହ ବିବାଦ ଦେଖାଦେଇଥିଲା। ପଡୋଶୀ ଗିରିଧାରୀ ବାରିକ ତାକୁ ଜୀବନରୁ ମାରିଦେବାକୁ ଧମକ ଦେଇଥିଲେ ବୋଲି ମୃତ ଯୁବକଙ୍କ ଦାଦା ଅଭିଯୋଗ କରିଛନ୍ତି। ଏହି ସବୁ ଅଭିଯୋଗ ଓ ଘଟଣାକ୍ରମକୁ ନେଇ ପୋଲିସ ପକ୍ଷରୁ ତଦନ୍ତ ଆରମ୍ଭ ହୋଇଛି।