ପାରାଦୀପ, ୨୧ା୬(ସ୍ବ.ପ୍ର.):ପାରାଦୀପ-ଚଣ୍ଡିଖୋଲ ୫୩ନଂ.ଜାତୀୟ ରାଜପଥରେ ପୁଣି ଟ୍ରକ ଚାଳକଙ୍କ ବର୍ବରତା ଦେଖିବାକୁ ମିଳିଛି। ମୋବାଇଲ୍ ଓ ଟଙ୍କା ଚୋରି ଅଭିଯୋଗରେ ଜଣେ ଯୁବକଙ୍କ ହାତ ଗୋଡ଼ ବାନ୍ଧି ଟ୍ରକ ଡାଲାରେ ପକାଇ ଚାଳକ ନେଉଥିବାବେଳେ ଲୋକଙ୍କ ହାବୁଡରେ ପଡ଼ିଛନ୍ତି। ପାରାଦୀପ ଲକ୍ ଥାନା ପୋଲିସ ଓ ମାର୍ଶାଘାଇ ପୋଲିସ ଏଥିରେ ହସ୍ତକ୍ଷେପ କରିବା ପରେ ସମ୍ପୃକ୍ତ ଯୁବକ ମୁକୁଳିଛନ୍ତି। ଏହି ଘଟଣାରେ ଲକ୍ ଥାନା ପୋଲିସ ପକ୍ଷରୁ ମାମଲା (ନଂ.୧୭୫/୨୨) ରୁଜୁ କରାଯାଇ ଅଭିଯୁକ୍ତ ଟ୍ରକ ଚାଳକଙ୍କୁ ଗିରଫ କରାଯାଇଛି। ସେ ହେଲେ ସଦାନନ୍ଦ ରାଉତ। ତାଙ୍କ ଘର ଯାଜପୁର ଜିଲା ଧର୍ମଶାଳା ଥାନା ଅନ୍ତର୍ଗତ ଭୂବନ ଗ୍ରାମରେ। ସେ (ଓଡି-୦୫ ଏନ୍ ୭୫୭୮) ଟ୍ରକରେ ଚାଳକ ଥିଲେ। ଲକ୍ ଥାନା ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ, ଉକ୍ତ ଟ୍ରକ ଏହି ଥାନା ଅନ୍ତର୍ଗତ କାର୍ବନ ଛକରେ ପାର୍କିଂ କରାଯାଇଥିଲା। ରବିବାର ମିଥୁନ ବାରିକ(୩୪) ଟ୍ରକ କ୍ୟାବିନ ଭିତରେ ପଶି ୧୧ ହଜାର ଟଙ୍କା ଚୋରି କରିନେଇଥିଲେ। ଏଥିସହ ପାଖରେ ଥିବା ଆଉ ଏକ ଟ୍ରକରୁ ମୋବାଇଲ ଚୋରି କରିଥିଲେ। ଏହା ଦେଖି ଚାଳକ ସଦାନନ୍ଦ ଓ ଖଲାସି କାଳିଆ ବାରିକ କୌଶଳ କ୍ରମେ ମିଥୁନଙ୍କୁ କାବୁ କରି ଟଙ୍କା ଓ ମୋବାଇଲ ଉଦ୍ଧାର କରିଥିଲେ। ଏହାପରେ ମିଥୁନଙ୍କ ହାତଗୋଡ ବାନ୍ଧି ଟ୍ରକ ଡାଲାରେ ପକାଇ ସେମାନେ ଚଣ୍ଡିଖୋଲ ଅଭିମୁଖେ ଯାଇଥିଲେ। ତାଙ୍କର ଏପରି ଅବସ୍ଥା ଦେଖି କିଛି ଲୋକ ମାର୍ଶାଘାଇ ପୋଲିସକୁ ସୂଚନା ଦେଇଥିଲେ। ପରେ ପୋଲିସ ଉକ୍ତ ଗାଡ଼ିକୁ ପିଛାକରି କେନ୍ଦ୍ରାପଡା ଜିଲାର ହଜାରି ପାଖରେ ଟ୍ରକ ଅଟକାଇ ଥିଲା। ଏହି ସମୟରେ ଖଲାସି ଫେରାର ହୋଇଯାଇଥିବାବେଳେ ମିଥୁନଙ୍କୁ ପୋଲିସ ଉଦ୍ଧାର କରିଥିଲା। ଲକ୍ ଥାନା ଅଞ୍ଚଳରେ ଏହି ଘଟଣା ଘଟିଥିବାରୁ ମାମଲାକୁ ଲକ୍ ଥାନାକୁ ସ୍ଥାନାନ୍ତର କରାଯାଇଥିଲା।
ସୂଚନାଯୋଗ୍ୟ, ଗତ ମେ’୨୦ରେ ମୋବାଇଲ ଲୁଟ୍ ଅଭିଯୋଗରେ ଜଣେ ଅଭିଯୁକ୍ତଙ୍କୁ ଟ୍ରକ୍ ସମ୍ମୁଖରେ ବାନ୍ଧି ଗାଡ଼ି କିଛି ବାଟ ଚଲାଯାଇଥିଲା। ଏହି ଘଟଣା ମଧ୍ୟ ଉକ୍ତ ରାଜପଥରେ ଘଟିଥିଲା। ଏହି ଘଟଣାରେ ମାନବାଧିକାର ଉଲ୍ଲଂଘନ ହୋଇଥିବା ଅଭିଯୋଗ କରି ସେତେବେଳେ ଲକ୍ ଥାନା ଏବଂ ଓଡିଶା ମାନବିକ ଅଧିକାର କମିଶନ ପକ୍ଷରୁ ମାମଲା ରୁଜୁ କରାଯାଇଥିଲା।