ବାରିପଦା ଅଫିସ,୨୧ା୮: ମୋବାଇଲ ଚୋରି ଅଭିଯୋଗରେ ଅଞ୍ଚଳବାସୀ ଯୁବକଙ୍କୁ ନିର୍ଧୂମ ଛେଚିବା ସହିତ ୨ହାତକୁ ଦୌଡ଼ିରେ ବାନ୍ଧି ୨ କିଲୋମିଟର ଚଳାଇବା ଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଏଭଳି ଏକ ସଂଘାତିକ ଘଟଣା ଘଟିଛି ମୟୂରଭଞ୍ଜ ଜିଲା ବାରିପଦା ଟାଉନ ଥାନା ରଘୁନାଥପୁର ଅଞ୍ଚଳରେ।
ସୂଚନାଯୋଗ୍ୟ,ଜଣେ ଯୁବକ ମୋବାଇଲ ଚୋରି କରି ଯାଉଥିବା ବେଳେ ଲୋକେ ଜାଣିବାକୁ ପାଇ ଧରିଥିଲେ। ପରେ ସଙ୍ଘବଦ୍ଧ ହୋଇ ଅଭିଯୁକ୍ତ ଯୁବକଙ୍କୁ ନିର୍ଘାତ ପିଟିବା ସହିତ ମୁହଁ ଫଟାଇ ଦେଇଥିଲେ। ସେତିକିରେ ରାଗ ଶାନ୍ତ ହୋଇ ନ ଥିଲା। ଯୁବକଙ୍କର ୨ ହାତକୁ ଏକ ରଶିରେ ବାନ୍ଧି ମୁଖ୍ୟ ରାସ୍ତାରେ ୨ କିଲୋମିଟର ଚଲାଇଥିଲେ। ରାଜରାସ୍ତାରେ ସମ୍ପୃକ୍ତ ଯୁବକକୁ ନେବା ସମୟରେ କେହି ବିରୋଧ କରି ନ ଥିଲେ। ଦେଖଣାହାରୀ ସାଜି ଲୋକମାନେ ଭିଡିଓ ଫଟୋ ଉତ୍ତୋଳନ କରିଥିଲେ। ଏଭଳି ଘଟଣା ବାରିପଦା ସହରରେ ଚର୍ଚ୍ଚାର ବିଷୟ ପାଲଟିଛି। ଅପରପକ୍ଷେ ସମ୍ପୃକ୍ତ ଯୁବକ ଜଣକ ମୋବାଇଲ ଚୋରି ଘଟଣାକୁ ଖଣ୍ଡନ କରିଥିବା ବେଳେ ସାଧାରଣ ଲୋକେ ଏଭଳି ଏକ ଦଣ୍ଡନୀୟ ଅପରାଧ କରିଛନ୍ତି। ବିନା ଦୋଷରେ କହିକି ଏଭଳି ଦଣ୍ଡ ଦେଲେ ତାହାକୁ ନେଇ ତଦନ୍ତ କରିବାକୁ ସାଧାରଣ ଲୋକେ ଦାବି କରିଛନ୍ତି। ତେବେ ରିପୋର୍ଟ ଲେଖା ହେବା ପର୍ଯ୍ୟନ୍ତ ଥାନାରେ କୌଣସି ଅଭିଯୋଗ ହୋଇ ନ ଥିବା ବେଳେ ଏହି ଘଟଣାରେ ପୋଲିସର ପ୍ରତିକ୍ରିୟା ମିଳିପାରିନାହିଁ।
