ରାୟଗଡ଼ା ଅଫିସ,୨୬ା୧୨: ହେଲ୍ମେଟ ନ ପିନ୍ଧି ଗାଡ଼ି ଚଳାଇଥିବା ଜଣେ ଯୁବକ ପୋଲିସ ଲାଠିମାଡ଼ରେ ଆହତ ହୋଇଛନ୍ତି। ସେ ହେଲେ ରାୟଗଡ଼ା ଥାନା ଅଧୀନ ତଳ ସାଙ୍କେସ ଗ୍ରାମର ପୀତାମ୍ବର ହିମିରିକାଙ୍କ ପୁଅ ରାହୁଲ ହିମିରିକା(୧୮)। ରାହୁଲ ଏବଂ ଭାଇ କିଷାନ କଲାକା ଶୁକ୍ରବାର ଏକ ବାଇକ୍ ଯୋଗେ ଲାଡ଼ା ଅଭିମୁଖେ ଯାଉଥିଲେ। ମଝିଘରିଆଣୀ ମନ୍ଦିର ନିକଟରେ ପୋଲିସ ପକ୍ଷରୁ ହେଲ୍ମେଟ ଯାଞ୍ଚ ଚାଲିଥିବାବେଳେ ରାହୁଲଙ୍କୁ ଅଟକାଇ ପଛପଟୁ ଲାଠିରେ ମାଡ଼ ମାରିଥିଲେ। ଏଥିରେ ରାହୁଲଙ୍କ ମୁଣ୍ଡରେ ଆଘାତ ଲାଗିଛି। ତାଙ୍କୁ ଉଦ୍ଧାର କରାଯାଇ ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ତେବେ ଆହତ ରାହୁଲଙ୍କୁ ପୋଲିସ ଉଦ୍ଧାର କରି ମେଡିକାଲ ପଠାଇବା ବଦଳରେ ଦୁର୍ବ୍ୟବହାର କରିଛି। ତାଙ୍କ ଗାଡ଼ି ଚାବି ଛଡ଼ାଇ ନେଇଥିବା ରାହୁଲଙ୍କ ବାପା ଥାନାରେ ଲିଖିତ ଅଭିଯୋଗ କରିଛନ୍ତି। ଅନ୍ୟପକ୍ଷରେ ଘଟଣାକୁ ନେଇ ରାୟଗଡ଼ା ନଗର ଭାଜପା ଏସ୍ଟି ମୋର୍ଚ୍ଚା ପକ୍ଷରୁ ପ୍ରତିବାଦ କରାଯିବା ସହ ଥାନା ଘେରାଉ କରାଯାଇଥିଲା। ଭାଜପା ନଗର ସଭାପତି ଶ୍ୟାମକୁମାର ଦାଶ, ବିଦ୍ୟା ପଣ୍ଡା ଏବଂ ଶତାଧିକ କର୍ମୀ ଉପସ୍ଥିତ ରହି ଘଟଣାର ତଦନ୍ତ କରି ପୋଲିସ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିମନ୍ତେ ଦାବି କରିଛନ୍ତି। ଥାନା ପରିସରରେ ଉତ୍ତେଜନାର ଖବର ପାଇ ଏସ୍ପି ସର୍ବଣା ବିବେକ ଏମ୍ ପହଞ୍ଚି ପ୍ରତିବାଦକାରୀଙ୍କୁ ବୁଝାଶୁଝା କରିଥିଲେ। ତଦନ୍ତ କରି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ ପ୍ରତିଶ୍ରୁତି ଦେବାପରେ ପରିସ୍ଥିତି ଶାନ୍ତ ପଡ଼ିଥିଲା।