କେନ୍ଦୁଝର,୯ା୭(ସ୍ବ.ପ୍ର.): ସଦର ବ୍ଲକ ଅନ୍ତର୍ଗତ ପର୍ଜନପୁର ପଞ୍ଚାୟତ କଶିରା ଗ୍ରାମର ରଇଦାସ ମାଝିଙ୍କ ପୁଅ କମଳାକାନ୍ତ(୩୨)ଶନିବାର ଅପରାହ୍ନରେ ବିଲରୁ ଘରକୁ ଫେରୁଥିଲେ। ଏହି ସମୟରେ ବଜ୍ରପାତ ହେବାରୁ ତାଙ୍କର ଜୀବନ ଚାଲିଯାଇଛି।
ସେ ବିଲରୁ କାମ ସାରି ସାଇକେଲରେ ଘରକୁ ଫେରୁଥିଲେ। ଏହି ସମୟରେ ଜଗନ୍ନାଥପୁର ଆଶ୍ରମ ସ୍କୁଲ ନିକଟରେ ପ୍ରଚଣ୍ତ ବେଗରେ ବଜ୍ରପାତ ହୋଇଥିଲା। ଫଳରେ ସେଠାରେ କମଳାକାନ୍ତ ଟଳି ପଡ଼ିଥିଲେ। ପରିବାର ଲୋକେ ତୁରନ୍ତ ପଦ୍ମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିବାବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ସୂଚନାଯୋଗ୍ୟ, ଚଳିତବର୍ଷ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ କମଳାକାନ୍ତ ସରପଞ୍ଚ ପ୍ରାର୍ଥୀ ହୋଇ ପରାଜିତ ହୋଇଥିଲେ। ବର୍ତ୍ତମାନ ସ୍ତ୍ରୀ ଏବଂ ଅଢ଼େଇ ବର୍ଷର ପୁଅ ଅସହାୟ ହୋଇଯାଇଛନ୍ତି। ସଦର ପୋଲିସ ଖବର ପାଇ ମୃତଦେହ ବ୍ୟବଚ୍ଛେଦ ପାଇଁ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟକୁ ପଠାଇଛି। କମଳାକାନ୍ତ ଜଣେ ଉଦୀୟମାନ ଯୁବକ ଥିଲେ। ତାଙ୍କର ଅକାଳ ବିୟୋଗରେ ଅଞ୍ଚଳରେ ଶୋକର ଛାୟା ଖେଳିଯାଇଛି।