ସୁନ୍ଦରଗଡ଼/ବାଲିଶଙ୍କରା/ରାଜଗାଙ୍ଗପୁର,୩।୧: ସୁନ୍ଦରଗଡ଼ ଜିଲା ବାଲିଶଙ୍କରା ବ୍ଲକ ଅନ୍ତର୍ଗତ ଇବ୍ନଦୀର ଘୋଘର କନାକୁଣ୍ଡ ଘାଟରେ ରବିବାର ଅଘଟଣ ଘଟିଛି। ପିକ୍ନିକ୍ କରିବାକୁ ଯାଇଥିବା ଜଣେ ଯୁବତୀ ସେଲ୍ଫି ନେବାବେଳେ ନଦୀ ଭିତରେ ଖସିପଡ଼ି ନିଖୋଜ ହୋଇଛନ୍ତି। ଯୁବତୀ ଜଣକ ହେଉଛନ୍ତି ରାଜଗାଙ୍ଗପୁର କୁମ୍ଭାରପଡ଼ାର ଅନୁପମା ପ୍ରଜାପତି(୨୪)। ଯୁବତୀଙ୍କୁ ଉଦ୍ଧାର କରିବାକୁ ଯାଇଥିବା ଜଣେ ଯୁବକ ମଧ୍ୟ ଗୁରୁତର ହୋଇଛନ୍ତି। ଖବରପାଇ ବାଲିଶଙ୍କରା ଅଗ୍ନିଶମ ବିଭାଗ କର୍ମଚାରୀ, ତଳସରା ଏବଂ କିଞ୍ଜିରିକେଲା ଥାନା ପୋଲିସ ଘଟଣାସ୍ଥଳରେ ପହଞ୍ଚି ଖୋଜାଖୋଜି ଚଳାଇଥିଲେ। ସନ୍ଧ୍ୟା ସୁଦ୍ଧା ଯୁବତୀଙ୍କ ପତ୍ତା ମିଳିନାହିଁ।
ରାଜଗାଙ୍ଗପୁର କୁମ୍ଭାରପଡ଼ାର ଅବସରପ୍ରାପ୍ତ ବ୍ୟାଙ୍କ ଅଫିସର ଆତ୍ମାରାମ ପ୍ରଜାପତିଙ୍କ ସ୍ତ୍ରୀ କିରଣ ଦେବୀ, ଝିଅ ଅନୁପମା, ପୁତ୍ରବଧୂ ଆରତୀଙ୍କ ସମେତ ଅନୁପମାଙ୍କ ସହକର୍ମୀଙ୍କୁ ମିଶାଇ ପ୍ରାୟ ୧୫ଜଣ ଘୋଘରଘାଟକୁ ପିକ୍ନିକ୍ ପାଇଁ ଯାଇଥିଲେ। ପୂର୍ବାହ୍ନ ୧୨ଟା ୩୦ରେ ଅନୁପମା ସହକର୍ମୀଙ୍କ ସହ ସେଲ୍ଫି ନେଉଥିବା ବେଳେ ହଠାତ୍ ୧୫ଫୁଟ ତଳକୁ ନଦୀପାଣିରେ ଖସିପଡ଼ିଥିଲେ। ଏହି ସମୟରେ ତାଙ୍କ ସାଙ୍ଗରେ ଉପସ୍ଥିତ ଥିବା ଜଣେ ଯୁବକ ତାଙ୍କୁ ଉଦ୍ଧାର କରିବାକୁ ଯାଇ ସେ ମଧ୍ୟ ଖସିପଡ଼ିଥିଲେ। ମାତ୍ର ଯୁବକ ପଥରରେ ଲାଗି ରହିଯାଇଥିଲେ। ଅଗ୍ନିଶମ ବିଭାଗର କର୍ମଚାରୀମାନେ ପହଞ୍ଚତ୍ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିଥିଲେ। ଅନୁପମା ପାଣିରେ ଖସିପଡ଼ିବା ପୂର୍ବରୁ ତାଙ୍କ ହ୍ବାଟ୍ସଆପ୍ ଷ୍ଟାଟସ୍ରେ ନିଜର ସେଲ୍ଫି ଫଟୋ ଛାଡିଥିଲେ। ତାଙ୍କ ବିବାହ ଆସନ୍ତା ଫେବୃୟାରୀ ୧୬ରେ ସ୍ଥିର ହୋଇଥିଲା। ସେ ରାଉରକେଲାର ଏକ ଘରୋଇ ଇଞ୍ଜିନିୟରିଂ କଲେଜରେ କାର୍ଯ୍ୟ କରୁଥିଲେ।