ଭୁବନେଶ୍ୱର,୭।୭(ବ୍ୟୁରୋ):ରାଜଧାନୀର ଏକ ମୋବାଇଲ ଦୋକାନରୁ ମଙ୍ଗଳବାର ଜଣେ ଯୁବତୀ ଆଇଫୋନ୍ କିଣିବା ପରେ ଟଙ୍କା ନ ଦେଇ ଚମ୍ପଟ ମାରିବା ଘଟଣା ଚର୍ଚ୍ଚାର ବିଷୟ ପାଲଟିଛି। ସିସିଟିଭି ଫୁଟେଜକୁ ଆଧାର କରି ଦୋକାନୀ ଜଣକ ଶହୀଦନଗର ଥାନାରେ ଅଭିଯୋଗ କରିବା ପରେ ସମ୍ପୃକ୍ତା ଯୁବତୀ ନିଜ ଭୁଲ ସ୍ବୀକାର କରିବା ସହ ମୋବାଇଲ ଓ ସ୍ବାଇପ୍ ମେଶିନ ବାବଦକୁ ମୋଟ ୧.୪୩ଲକ୍ଷ ଟଙ୍କା ଦୋକାନୀଙ୍କୁ ଦେଇଛନ୍ତି।
ସୂଚନାନୁଯାୟୀ, ମଙ୍ଗଳବାର ପୂର୍ବାହ୍ନ ୧୧ଟା ସମୟରେ ଜଣେ ଯୁବତୀ ଶହୀଦନଗରରେ ଥିବା ଏକ ମୋବାଇଲ ଦୋକାନକୁ ଆସି ଏକ ଆଇଫୋନ୍ ଦେଖେଇବାକୁ ଦୋକାନୀଙ୍କୁ କହିଥିଲେ। ୧ଲକ୍ଷ ୩୯ ହଜାର ଟଙ୍କାର ଏକ ଆଇଫୋନ୍ ଦେଖି ପସନ୍ଦ କରିବା ପରେ ବାପାଙ୍କ ନାଁରେ ବିଲ୍ କାଟିଥିଲେ। ପରେ ଏଟିଏମ୍ କାର୍ଡ ଖରାପ ହୋଇଯିବା କହି ଟଙ୍କା ପାଇଁ ଦୋକାନୀଙ୍କୁ ଘରକୁ ଡାକିଥିଲେ। ଯୁବତୀଙ୍କ ଘର ସେହି ଶହୀଦନଗର ଅଞ୍ଚଳରେ ଥିବା ଏକ ଆପାର୍ଟମେଣ୍ଟରେ ହୋଇଥିବାରୁ ତାଙ୍କ କଥାରେ ବିଶ୍ୱାସ କରି ଦୋକାନୀ ଜଣଙ୍କ ସେଲ୍ସମ୍ୟାନଙ୍କୁ ପଠାଇଥିଲେ। ଯୁବତୀଙ୍କ ସହ ସ୍କୁଟିରେ ସେଲ୍ସମ୍ୟାନ ସ୍ବାଇପ୍ ମେଶିନ ନେଇ ଯାଇଥିଲେ। ବାଟରେ ଏକ ପେଟ୍ରୋଲ ପମ୍ପ ନିକଟରେ ଯୁବତୀଜଣକ ସେଲ୍ସମ୍ୟାନଙ୍କୁ ଏକ ବୋତଲ ଦେଇ ତେଲ ଆଣିବାକୁ କହିଥିଲେ। ସେଲ୍ସମ୍ୟାନ ତେଲ ଆଣିବାକୁ ଯାଇଥିବାବେଳେ ଯୁବତୀ ଜଣକ ଫୋନ୍ ଓ ସ୍ବାଇପ୍ ମେଶିନ ଧରି ଫେରାର ହୋଇଯାଇଥିଲେ। ଏହା ଦେଖି ସେଲ୍ସମ୍ୟାନ ଯୁବତୀଙ୍କ ପଛରେ ଗୋଡ଼ାଇ ଗୋଡ଼ାଇ ସେ ରହୁଥିବା ଆପାର୍ଟମେଣ୍ଟରେ ପହଞ୍ଚତ୍ଥିଲେ। ହେଲେ ସେଠାରେ ଯୁବତୀ ଜଣକ କୌଣସି ଫୋନ କିଣି ନାହାନ୍ତି ବୋଲି କହି ସେଲ୍ସମ୍ୟାନଙ୍କୁ ଫେରାଇ ଦେଇଥିଲେ। ପୂରା ଘଟଣା ସମ୍ପର୍କରେ ସେଲ୍ସମ୍ୟାନ ଆସି ଦୋକାନୀଙ୍କୁ କହିଥିଲେ। ଏହା ପରେ ସିସିଟିଭି ଫୁଟେଜ୍କୁ ଆଧାର କରି ସମ୍ପୃକ୍ତ ଯୁବତୀଙ୍କ ବିରୋଧରେ ଦୋକାନୀ ଶହୀଦନଗର ଥାନାରେ ଅଭିଯୋଗ କରିଥିଲେ। ପୋଲିସ ଅଭିଯୋଗକୁ ଭିତ୍ତିକରି ଯୁବତୀଙ୍କୁ ଡକାଇବା ସହ ଟଙ୍କା ଓ ସ୍ବାଇପ୍ ମେଶନ୍ ଫେରାଇବାକୁ କହିଥିଲା। ପରେ ଯୁବତୀ ଭୁଲ୍ମାଗି ଟଙ୍କା ପଇଠ କରିଥିଲେ।