ଦୁନିଆରେ ଅନେକ ଲୋକ ଅଛନ୍ତି, ଯେଉଁମାନେ ଘରେ ନାନା ପ୍ରକାରର ଜୀବଜନ୍ତୁ ପାଳିଥାନ୍ତି। ସେମାନେ ଏହି ପଶୁପକ୍ଷୀଙ୍କ ସହିତ ସମୟ ବିତାଇ ମନୋରଞ୍ଜନ କରନ୍ତି। କିଏ କୁକୁର ରଖିବାକୁ ଭଲ ପାଆନ୍ତି ତ ଆଉ କିଏ ବିଲେଇ ରଖିବାକୁ । ଆଉ କେହି ଶୁଆ, ନେଉଳ, ମୂଷା, ମାଙ୍କଡ଼, କୁକୁର ଆଦି ପାଳିଥାନ୍ତି। କୁମ୍ଭୀର ପାଳିବାକୁ କିଏ ଚାହେଁ କହିଲେ? କିନ୍ତୁ ଜଣେ ଯୁବତୀ ଅନେକ କୁମ୍ଭୀର ପାଳିଛନ୍ତି। ଗୋଟିଏ କିମ୍ବା ଦୁଇଟି ନୁହେଁ, ଏକାବେଳକେ ସେ ୬ଟି କୁମ୍ଭୀର ରଖିଛନ୍ତି। ନିକଟରେ ସେ ସୋସିଆଲ ମିଡିଆରେ ଏହି କୁମ୍ଭୀରମାନଙ୍କର ଏକ ଭିଡିଓ ପୋଷ୍ଟ କରିଥିଲେ। ଯାହା ଦେଖି ଲୋକେ ଆଶ୍ଚର୍ଯ୍ୟ ହୋଇଛନ୍ତି।
ତାଇଓ୍ବାନରେ ରହୁଥିବା ସାଶିମୀ ନାମକ ଜଣେ ଯୁବତୀ କୁମ୍ଭୀରମାନଙ୍କୁ ତାଙ୍କ ଘରେ ଚଳପ୍ରଚଳ କରାଇଥାନ୍ତି। ତାଙ୍କ ଘରର ପ୍ରତ୍ୟେକ କୋଣରେ ଏହି କୁମ୍ଭୀରମାନେ କୁକୁର ଏବଂ ବିଲେଇ ପରି ମୁକ୍ତ ଭାବରେ ବୁଲନ୍ତି। ସେ ନିଜେ ତାଇଓ୍ବାନର ଜଣେ ପ୍ରଜନକଙ୍କଠାରୁ ପ୍ରଥମେ କୁମ୍ଭୀର କିଣିଥିଲେ। ଏହା ପରେ କୁମ୍ଭୀରମାନଙ୍କ ପ୍ରତି ତାଙ୍କର ଆତ୍ମୀୟତା ବଢ଼ିବାରେ ଲାଗିଲା। ଯଦିଓ ସେ ନିଜ ପିଲାମାନଙ୍କ ପରି ଏହି କୁମ୍ଭୀରମାନଙ୍କର ଯତ୍ନ ନିଅନ୍ତି, କିନ୍ତୁ ଏହି ବିପଜ୍ଜନକ ପ୍ରାଣୀ ଯେକୌଣସି ସମୟରେ ଆକ୍ରମଣ କରିପାରିବେ। ତେବେ ଏପର୍ଯ୍ୟନ୍ତ ଏହି ୬ କୁମ୍ଭୀରଙ୍କ ମଧ୍ୟରୁ କେହି ବି ସାଶିମୀଙ୍କୁ ଆକ୍ରମଣ କରିନାହାନ୍ତି।
ସବୁଠୁ ଆଶ୍ଚର୍ଯ୍ୟର କଥା ସାଶିମୀଙ୍କ ପୋଷା କୁମ୍ଭୀର ମଧ୍ୟରୁ ଫିଲ୍ ନାମକ ଏକ କୁମ୍ଭୀର ତାଙ୍କ ଜିନିଷପତ୍ର ନେଇ ଘର ଚାରିପଟେ ବୁଲେ। ବେଳେବେଳେ ସାଶିମୀଙ୍କ ଜୋତା ଏବଂ ବେଳେବେଳେ କିଛି ଜିନିଷ ଲୁଚେଇ ଦିଏ। ସାଶିମୀ ଏସବୁ ଜିନିଷକୁ ସୋଫାତଳୁ ବାହାର କରନ୍ତି। ଯେତେବେଳେ ସାଶିମୀ ତାକୁ ଧରିବାକୁ ଯାଆନ୍ତି, ସେ ଦୌଡ଼ିବା ଆରମ୍ଭ କରେ।
ଏହି କୁମ୍ଭୀରମାନଙ୍କ ପାଇଁ ସାଶିମୀ ଏକ ବେଡ୍ରୁମ୍ ତିଆରି କରିଛନ୍ତି। ଏଥିରେ ତକିଆ ଏବଂ ଗଦି ପଡ଼ିଛି। ଯାହା ଉପରେ କୁମ୍ଭୀରଗୁଡ଼ିକ ଶୋଇଥାନ୍ତି। ସାଶିମୀ କୁମ୍ଭୀରମାନଙ୍କୁ ତାଙ୍କର ସର୍ବୋତ୍ତମ ବନ୍ଧୁ ବୋଲି କହିଛନ୍ତି। ସେ ଆହୁରି ମଧ୍ୟ କହିଛନ୍ତି, ସେମାନଙ୍କର ମଧ୍ୟ ଭାବନା ଅଛି। ସେମାନେ ଯନ୍ତ୍ରଣା ଅନୁଭବ କରନ୍ତି। ତାଙ୍କ ସହ ରହି ତାଙ୍କୁ ବହୁତ ଆନନ୍ଦ ମିଳୁଛି। କୁମ୍ଭୀରମାନଙ୍କୁ ସାଶିମୀ ଚୁମ୍ବନ ମଧ୍ୟ କରିଥାନ୍ତି।