ହରାରେ,୨୪।୯ (ଏପି): ଆସନ୍ତାମାସ ଏକ ସୀମିତ ଓଭର ସିରିଜ ଖେଳିବାକୁ ଜିମ୍ବାଓ୍ବେ କ୍ରିକେଟ ଦଳ ପାକିସ୍ତାନ ଗସ୍ତ କରିବ। ଏ ନେଇ ଜିମ୍ବାଓ୍ବେ ସରକାର ଅନୁମତି ଦେଇଛନ୍ତି। କୋଭିଡ୍-୧୯ ମହାମାରୀ କାରଣରୁ ଦଳ ସରକାରଙ୍କଠାରୁ ଅନୁମତି ଲୋଡିଥିଲା। ତେବେ ଦଳକୁ ଅନୁମତି ପ୍ରଦାନ କରାଯାଇଛି ବୋଲି ଜିମ୍ବାଓ୍ବେ କ୍ରିକେଟ ତରଫରୁ କୁହାଯାଇଛି।
ଜିମ୍ବାଓ୍ବେ ଓ ପାକିସ୍ତାନ ମଧ୍ୟରେ ୩ଟି ଦିନିକିଆ ଓ ୩ଟି ଟି୨୦ ମ୍ୟାଚ୍ ଖେଳାଯିବ। ଅକ୍ଟୋବର ଶେଷ ଓ ନଭେମ୍ବର ପ୍ରାରମ୍ଭରେ ଏହି ମ୍ୟାଚ୍ଗୁଡିକ ଖେଳାଯିବାର କାର୍ଯ୍ୟକ୍ରମ ରହିଛି। ୩ଟି ଯାକ ଦିନିକିଆ ମୁଲତାନରେ ଖେଳାଯିବ। ସେହିପରି ୩ଟି ଯାକ ଟି୨୦ ରାଓ୍ବଲପିଣ୍ଡିରେ ଆୟୋଜନ ହେବ ବୋଲି ପାକିସ୍ତାନ କ୍ରିକେଟ ବୋର୍ଡ (ପିସିବି) ତରଫରୁ ସୂଚନା ଦିଆଯାଇଛି। ଦର୍ଶକଙ୍କୁ ଏହି ମ୍ୟାଚ୍ ଦେଖିବାକୁ ଅନୁମତି ଦିଆଯିବ ନାହିଁ। ଏଥିପାଇଁ ଦୁଇଟି ଷ୍ଟାଡିୟମରେ ଜୈବ ସୁରକ୍ଷିତ ପରିବେଶ ସୃଷ୍ଟି କରାଯିବ। ଏହି ଅବସରରେ ସବୁ ପ୍ରକାର ନିୟମ ଓ ପ୍ରୋଟୋକଲକୁ ଅନୁସରଣ କରାଯିବ ବୋଲି ପିସିବି ନିର୍ଦ୍ଦେଶକ ଜାକିର ଖାନ୍ କହିଛନ୍ତି। ଏକ ବର୍ଦ୍ଧିତ ଦଳ ସହ ଜିମ୍ବାଓ୍ବେ ପାକିସ୍ତାନରେ ପହଞ୍ଚିବ। ଖେଳାଳି ଓ ଅଫିସିଆଲମାନେ ହରାରେ ଛାଡିବା ପୂର୍ବରୁ ୪୮ ଘଣ୍ଟା ମଧ୍ୟରେ ୨ଥର କୋଭିଡ୍ ଟେଷ୍ଟର ସମ୍ମୁଖୀନ ହେବେ। ସେହିପରି ଅକ୍ଟୋବର ୨୦ ତାରିଖରେ ପାକିସ୍ତାନରେ ପହଞ୍ଚିବା ପରେ ମଧ୍ୟ ସେମାନେ ଟେଷ୍ଟର ସମ୍ମୁଖୀନ ହେବେ।
