ବଇଣ୍ଡା,୨୮ା୧୨(ଡି.ଏନ.ଏ.) ଅନୁଗୋଳ ଜିଲା ହଣ୍ଡପା ଓ କିଶୋରନଗର ଥାନା ଅଞ୍ଚଳରେ ବଢ଼ୁଛି ଆପରାଧିକ କାର୍ଯ୍ୟକଳାପ। ପୋଲିସ ଠିକ୍ ଭାବେ ପାଟ୍ରୋଲିଂ କରୁ ନ ଥିବାରୁ ଚୋରି, ଡକାୟତି, ଲୁଟ୍ ଆଦି ବଢ଼ିବାରେ ଲାଗିଛି। ରବିବାର ରାତିରେ ଏହି ଥାନା ଅଞ୍ଚଳର ୯ଟି ସ୍ଥାନରୁ ଚୋରି ହୋଇଛି।
ସୂଚନା ଅନୁଯାୟୀ, ହଣ୍ଡପା ଥାନା ନାକିଚି ଛକରେ ଥିବା ବଡ ଡଙ୍ଗିଆଣି ଗ୍ରାମର ବିଭୂତି ପ୍ରଧାନଙ୍କ ଲୁଗା ଦୋକାନରୁ ରବିବାର ରାତିରେ ତାଲା ଭାଙ୍ଗି ୫୦ ହଜାର ଟଙ୍କାର ଡ୍ରେସ ଚୋରି ହୋଇଛି। ସେହିପରି ହଣ୍ଡପା ଗ୍ରାମ ଜିତେନ ଦେହୁରୀଙ୍କ ଗ୍ରାହକ ସେବାକେନ୍ଦ୍ର ତାଲା ଭାଙ୍ଗି ୮ ହଜାର ଟଙ୍କା, ଗଦେଇମୁଣ୍ଡା ଗ୍ରାମର ମନୋରଞ୍ଜନ ପ୍ରଧାନଙ୍କ ବହି ଦୋକାନରୁ ୧୫ ହଜାର ଟଙ୍କାର ପାଠ୍ୟ ଉପକରଣ, ଡଙ୍ଗିଆଣି ଗ୍ରାମର ଯୁଧିଷ୍ଠିର ପ୍ରଧାନଙ୍କ ଫାଷ୍ଟଫୁଡ୍ ଦୋକାନରୁ ତାଲା ଭାଙ୍ଗି ୩ ହଜାର ଟଙ୍କାର ସାମଗ୍ରୀ, ଡଙ୍ଗିଆଣି ଗ୍ରାମର ତ୍ରିଲୋଚନ ବାରିକଙ୍କ ସେଲୁନ ତାଲା ଭାଙ୍ଗି ୨ ହଜାର ଟଙ୍କାର ସାମଗ୍ରୀ, ଡଙ୍ଗିଆଣି ଗ୍ରାମର ରମେଶ ଚନ୍ଦ୍ର ପ୍ରଧାନଙ୍କ ତେଜରାତି ଦୋକାନରୁ ୩୦ ହଜାର ଟଙ୍କାର ସାମଗ୍ରୀ, ରଘୁନାଥପୁର ଗ୍ରାମର ରାଧେଶ୍ୟାମ ପ୍ରଧାନଙ୍କ ଷ୍ଟୂଡିଓରୁ ୬୦ ହଜାର ଟଙ୍କାର ଏକ ଭିଡିଓ କ୍ୟାମେରା ଚୋରି କରାଯାଇଛି। ଗଦେଇମୁଣ୍ଡା ଗ୍ରାମର ମେନକା ସେନାପତିଙ୍କ ଘର ଆଲମିରା ଭାଙ୍ଗି ୧ ଲକ୍ଷ ଟଙ୍କା ଚୋରି ହୋଇଛି। କିଶୋରନଗର ଥାନା ତୁରୁଡା ଗ୍ରାମରେ ଠିଆ ହୋଇଥିବା ଦାମୋଦର ସାହୁଙ୍କ ପିକଅଫ ଭ୍ୟାନ (ନଂ. ଓଡି୧୯ବି – ୯୫୨୩ ) ଚୋରି କରାଯାଇଛି। ଏହାପୂର୍ବରୁ ହଣ୍ଡପା ଥାନା ଲୁହାମୁଣ୍ଡା ଗ୍ରାମରେ ଇଚ୍ଛାପୁର ଗ୍ରାମର ସୁନିଲ ବେହେରା ଦେଇଥିବା ଦୋକାନରୁ ଶନିବାର ଲକ୍ଷାଧିକ ଟଙ୍କାର ସୁନା ଗହଣା ଚୋରି ହୋଇଥିଲା। ଏହାକୁ ନେଇ ବ୍ୟବସାୟୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଯାଇଛି। ଚୋରି ସଂକ୍ରାନ୍ତରେ ବ୍ୟବସାୟୀମାନେ ହଣ୍ଡପା ଥାନାରେ ଓ ଦାମୋଦର କିଶୋରନଗର ଥାନାରେ ଅଭିଯୋଗ କରିଛନ୍ତି। ଆଠମଲ୍ଲିକ ଏସ୍ଡିପିଓ ଚିନ୍ତାମଣି ପ୍ରଧାନ, ହଣ୍ଡପା ଆଇଆଇସି ପ୍ରଦୀପ ପ୍ରଧାନ ସାଇଣ୍ଟିଫିକ ଟିମ ଓ ସନ୍ଧାନୀ କୁକୁର ନେଇ ଘଟଣା ସ୍ଥଳରେ ତଦନ୍ତ କରିଥିଲେ ମଧ୍ୟ ଦୁର୍ବୃତ୍ତମାନଙ୍କ ପତ୍ତା ମିଲିନାହି। ଆଠମଲ୍ଲିକ ଏସ୍ଡିପିଓ ଚିନ୍ତାମଣି ପ୍ରଧାନ କହିଛନ୍ତି, ପୋଲିସ ପକ୍ଷରୁ ତଦନ୍ତ ଚାଲିଛି। ଏକ ଗ୍ୟାଙ୍ଗ ଏଥିରେ ସାମିଲ ଥିବା ସନ୍ଦେହ କରାଯାଉଛି। ଖୁବ୍ଶୀଘ୍ର ଦୁର୍ବୃତ୍ତମାନେ ଧରାପଡ଼ିବେ।