ବ୍ରହ୍ମପୁର ଅଫିସ,୧୦ା୨: ବ୍ରହ୍ମପୁର ସହରର ଦୁଇଟି ଥାନା ଅଞ୍ଚଳରୁ ଚୋରି ଘଟଣା ସାମ୍ନାକୁ ଆସିଛି। ବୈଦ୍ୟନାଥପୁର ଥାନା ଗଣେଶନଗରରେ ଏକ ନିର୍ମାଣାଧୀନ ଘରୁ ଦୁଇଟି ପାଣି ପମ୍ପ, ୪୦ଟି ସୁଇଚ୍ ବୋର୍ଡ଼, ବିଦ୍ୟୁତ ତାର, ଗୋଟିଏ ଡ୍ରିଲ୍ ମେଶିନ୍ ଏଭଳି ପ୍ରାୟ ୪୦ରୁ ୫୦ହଜାର ଟଙ୍କାର ସାମଗ୍ରୀ ଚୋରି ହୋଇଥିବା ଲାଞ୍ଜିପଲ୍ଲୀ ଗୌଡ଼ ସାହିର ଚିନ୍ତାମଣି ଭୂୟାଁ ବୈଦ୍ୟନାଥପୁର ଥାନାରେ ଅଭିଯୋଗ କରିଛନ୍ତି। ନିର୍ମାଣାଧୀନ ଘରଟି ତାଙ୍କ ଶ୍ୱଶୁରଙ୍କର। ଏହାର ତଦାରଖ ଦାୟିତ୍ୱ ଚିନ୍ତାମଣିଙ୍କ ଉପରେ ନ୍ୟସ୍ତ ଥିଲା। ଗତ ୮ ତାରିଖ ସକାଳେ ଘରୁ ଚୋରି ହୋଇଥିବା ଜାଣିବା ପରେ ଥାନାର ଦ୍ୱାରସ୍ଥ ହୋଇଥିଲେ। ଏ ନେଇ ପୋଲିସ ଏକ ମାମଲା(ନଂ.୭୭/୨୩) ରୁଜୁ କରି ଘଟଣାର ତଦନ୍ତ କରୁଛି। ସେହିପରି ଗୋଷଣୀ ନୂଆଗାଁ ଥାନା ଅନ୍ତର୍ଗତ ସଦାନନ୍ଦ ବିହାରରେ ଜଣଙ୍କ ଘରୁ ଚୋରି ହୋଇଛି। ଗୃହ ନିର୍ମାଣ ବୋର୍ଡ଼ର ଜଣେ କନିଷ୍ଠ ଯନ୍ତ୍ରୀ ଗତ ୫ରୁ ୭ତାରିଖ ପର୍ଯ୍ୟନ୍ତ ଘରେ ତାଲା ପକାଇ ଆସିକାରେ ଚାଲିଥିବା କାମ ତଦାରଖ କରିବାକୁ ଯାଇଥିଲେ। ସେଠାରୁ ୮ତାରିଖରେ ଫେରିଲା ପରେ ସାମ୍ନାପଟ କବାଟ ତାଲା ଭଙ୍ଗି ଘରୁ ଚୋରି ହୋଇଥିବା ଦେଖିବାକୁ ପାଇଥିଲେ। ଘରୁ ଏକ ବାଇକ୍ (ନଂ.ଓଆର୍୦୫ଏସ୍-୪୦୧୫) ଓ ଆଲମାରୀରୁ ୧୦ହଜାର ଟଙ୍କା ଚୋରି ହୋଇଥିବା ନେଇ ଥାନାରେ ଅଭିଯୋଗ ହୋଇଛି। ଏନେଇ ପୋଲିସ ଏକ ମାମଲା(ନଂ.୩୬/୨୩) ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।