![](https://www.dharitri.com/wp-content/uploads/2024/02/1-34.jpg)
ଭୁବନେଶ୍ୱର,୨୭।୨(ସତ୍ୟଜିତ୍ ରାଉତ): ରାଜଧାନୀରେ କମୁନି ଚୋରଙ୍କ ଉପଦ୍ରବ। ସୁଯୋଗ ଦେଖି ଘରେ କଳାକନା ବୁଲାଉଛନ୍ତି ଚୋର। ତେବେ ଭୁବନେଶ୍ୱରରେ ପୁଣି ଚୋରି ହୋଇଛି। ଶହୀଦନଗର ଥାନା ଅନ୍ତର୍ଗତ ଭିଏସ୍ଏସ୍ ନଗରରେ ଜଣଙ୍କ ଘରୁ ସୋମବାର ବିଳମ୍ବିତ ରାତିରେ ଦୁର୍ବୃତ୍ତମାନେ ସୁନା ଅଳଙ୍କାର ଚୋରି କରିନେଇଛନ୍ତି। ଏନେଇ ମନୋଜ କୁମାର ବେହେରା ମଙ୍ଗଳବାର ଶହୀଦନଗର ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ସୂଚନା ଅନୁଯାୟୀ, ଭିଏଏସ୍ ନଗରରସ୍ଥିତ ପ୍ଲଟ୍ ନଂ. ୪୯୭୧/୫ରେ ଥିବା ମଞ୍ଜୁ ନିବାସର ତଳ ମହଲାରେ ମନୋଜ ଭଡା ନେଇ ପରିବାର ସହ ରହୁଛନ୍ତି। ତେବେ ମୁଖ୍ୟ କବାଟ କଡରେ ଝରକା ଖୋଲାଥିବାର ସୁଯୋଗ ନେଇ ଚୋରମାନେ ଏହି କାଣ୍ଡ ଘଟାଇଛନ୍ତି। ରାତି ପ୍ରାୟ ୨ଟାରୁ ୪ ମଧ୍ୟରେ ଏହି ଚୋରି ହୋଇଛି। ଚୋରମାନେ ଉକ୍ତ ଝରକା ଦେଇ ହାତ ଗଳାଇ କବାଟ ଭିତର ପଟୁ ଖୋଲିବା ପରେ ଘରକୁ ପଶିଥିଲେ। ପରେ ଭ୍ୟାନିଟିରୁ ଚାବି କାଠି ନେଇ ଆଲ୍ମିରାର ଡ୍ର ଖୋଲି ସୁନା ଅଳଙ୍କାର ଆଦି ନେଇଯାଇଛନ୍ତି। ମନୋଜ ଏବଂ ତାଙ୍କ ପରିବାର ସଦସ୍ୟମାନେ ଶୋଇପଡିଥିବା ବେଳେ ଏହି ଚୋରି ହୋଇଛି। ତେବେ ଘରେ ସିସିଟିଭି ନ ଥିବାରୁ ଚୋରଙ୍କୁ ଧରିବା ପୋଲିସ ପାଇଁ ଚ୍ୟାଲେଞ୍ଜ୍ ହୋଇଛି। ସାଇଣ୍ଟିଫିକ୍ ଟିମ୍ ଓ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ବିଭିନ୍ନ ଦିଗକୁ ନେଇ ତଦନ୍ତ କରିବା ସହ ଅଭିଯୁକ୍ତଙ୍କୁ ଧରିବା ପାଇଁ ପ୍ରୟାସ ଚଳାଇଥିବା ସୂଚନା ମିଳିଛି।