ରାୟଗଡ଼ା(ସ୍ବ.ପ୍ର.)/ରାୟଗଡ଼ା ଅଫିସ,୧।୩: ରାୟଗଡ଼ା ଜିଲା ସଦର ମହକୁମାରେ ଜିଲାପାଳଙ୍କ କାର୍ଯ୍ୟାଳୟ, ଜିଲା ପୋଲିସ କାର୍ଯ୍ୟାଳୟ ସମେତ ବହୁ ଜିଲାସ୍ତରୀୟ ଅଧିକାରୀଙ୍କ କାର୍ଯ୍ୟାଳୟ ରହିଛି। ଏଭଳି ଗୁରୁତ୍ୱପୂର୍ଣ୍ଣ ଅଞ୍ଚଳରେ ଚୋରି ଘଟଣା ବଢ଼ୁଥିବା ବେଳେ ଏହାକୁ ରୋକିବା ନେଇ କୌଣସି ଦୃଢ଼ ପଦକ୍ଷେପ ନିଆଯାଉନାହିଁ। ଅଧିକାଂଶ ଚୋରି ଘଟଣାର ଟେର ପାଉନି ପୋଲିସ। ଗତ ଦିନରେ ସହରରେ ସିରିଜ ଚୋରି ହୋଇଥିବା ବେଳେ ସୋମବାର ବିଳମ୍ବିତ ରାତିରେ ଜିଲାପାଳଙ୍କ କାର୍ଯ୍ୟାଳୟଠାରୁ ମାତ୍ର ୫୦ ମିଟର ତଥା ଏସ୍ପି ଅଫିସଠାରୁ ୧୦୦ ମିଟର ଦୂରରେ ଥିବା ଏକ ଘରୁ ଚୋରି ହୋଇଛି ା
ପ୍ରକାଶ ଯେ, ସୋମବାର ରାତିରେ ସୌରଭ ଫୁନ୍ଦନାନି ଓ ତାଙ୍କ ମା’ ସୀମା ଫୁନ୍ଦନାନି ଶୋଇଥିବା ବେଳେ କେହି ଦୁର୍ବୃତ ଝରକା ତାଡ଼ି ଘରେ ପଶି ଟଙ୍କା, ସୁନାରୁପା ଅଳଙ୍କାର ଚୋରି କରିଛନ୍ତି। ଘରୁ ପ୍ରାୟ ୫୦୦ ଗ୍ରାମ ସୁନା, ୩୦୦ ଗ୍ରାମ ରୁପା ଏବଂ ୩୯ ହଜାର ଟଙ୍କା ଚୋରି ହୋଇଥିବା ନେଇ ସୌରଭ ମଙ୍ଗଳବାର ସକାଳେ ଜାଣିବା ପରେ ପୋଲିସକୁ ସ ଜଣାଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ପରେ ଏସ୍ଡିପିଓ ଦେବଜ୍ୟୋତି ଦାସ, ଥାନା ଆଇଆଇସି କେକେବିକେ କହଁର ଟିମ୍ ସହିତ ସେଠାରେ ପହଞ୍ଚି ସନ୍ଧାନୀ କୁକୁର ଦ୍ୱାରା ତଦନ୍ତ କରିଥିଲେ ା ସନ୍ଧାନୀ କୁକୁର ଘରୁ ବାହାରି ଜିଲାପାଳଙ୍କ କାର୍ଯ୍ୟାଳୟ ଗେଟ୍ ଭିତରକୁ ପଶି ଅନ୍ୟପଟେ ରହିଥିବା ଗେଟ୍ ଦେଇ ବାହାରକୁ ବାହାରିଥିଲା। ପରେ ସନ୍ଧାନୀ କୁକୁର ରାଜ୍ୟ ବାହାରୁ ଆସିଥିବା ବୁଲା ବିକାଳି ବସିଥିବା ସ୍ଥାନ ପାଖକୁ ଯାଇ ଅଟକିଥିଲା ା ଉକ୍ତ ସ୍ଥାନଟି ଚୋରି ହୋଇଥିବା ଘରର ପଛପାର୍ଶ୍ୱ ା ପୋଲିସ ଉକ୍ତ ବୁଲା ବିକାଳିଙ୍କ ଉପରେ ସନ୍ଦେହ କରି ସେମାନଙ୍କ ଜିନିଷପତ୍ର ଯାଞ୍ଚ କରିଥିଲେ ମଧ୍ୟ କୌଣସି ପତ୍ତା ମିଳିନାହିଁ ା ତେବେ ଜିଲାପାଳ ଓ ପୋଲିସ କାର୍ଯ୍ୟାଳୟ ନିକଟବର୍ତ୍ତି ଅଞ୍ଚଳ ଯଦି ସୁରକ୍ଷିତ ନୁହେଁ, ତେବେ ଜିଲାବାସୀ କେତେ ସୁରକ୍ଷିତ ତାହା ଏଥିରୁ ଜଣାପଡ଼ୁଛି ା ସହରରେ ଚୋରି ରୋକିବାରେ ପୋଲିସ ପ୍ରଶାସନ ବିଫଳ ା ଜିଲା ସଦର ମହକୁମାରେ ସୁରକ୍ଷା ବ୍ୟବସ୍ଥା ପାଇଁ ୧୨୦ଟି ସ୍ଥାନରେ ସିସି କ୍ୟାମେରା ଲାଗିବା ପାଇଁ ବ୍ୟବସ୍ଥା ରହିଥିଲେ ମଧ୍ୟ ବର୍ତମାନ ସୁଦ୍ଧା ଗୋଟିଏ ବି ଲାଗିନାହିଁ ା ଉକ୍ତ କାର୍ଯ୍ୟ ପୌର ବିଭାଗ ଦାୟିତ୍ୱରେ ଥିବା ବେଳେ ପୌର ନିର୍ବାହୀ ଅଧିକାରୀଙ୍କ ଆନ୍ତରିକତା ଅଭାବ ଯୋଗୁ ସିସି କ୍ୟାମେରା ଲାଗିପାରୁନାହିଁ ା ଜିଲାପାଳ ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି ା