ଗୋପାଳପୁର,୧୯ା୬(ନବୀନ ରାଜ ଆଚାରୀ): ଗଞ୍ଜାମ ଜିଲା ଗୋଳନ୍ଥରା ଥାନା ଅନ୍ତର୍ଗତ ପିତାତଳି ପେଟ୍ରୋଲ ପମ୍ପ ଅଞ୍ଚଳରୁ ଏକ ନିର୍ମାଣାଧୀନ କୋଠା ପରିସରରୁ ୨ ଟନ୍ ବିଭିନ୍ନ ଲୁହା ସାମଗ୍ରୀ ଚୋରି ନେଇ ଗୋଳନ୍ଥରା ଥାନାରେ ଲିଖିତ ଅଭିଯୋଗ କରାଯାଇଛି। ଏ ନେଇ ପୋଲିସ ଏକ ଚୋରି ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ସୂଚନାନୁଯାୟୀ, ଏହି ଥାନା ଅଧିନସ୍ଥ ପିତାତଳି ଗ୍ରାମର ଏସ୍ ସାହୁକାର ରାଓ ପେଟ୍ରୋଲ ପମ୍ପ ନିକଟରେ ଏକ କୋଠା ନିର୍ମାଣ କରୁଛନ୍ତି। ଏହି କୋଠା ପରିସରରୁ ନିର୍ମାଣ ପାଇଁ ବ୍ୟବହୃତ ଲୁହା ସାମଗ୍ରୀ ରଖି ଥିବା ବେଳେ ସୋମବାର ରାତିରେ କୌଣସି ଦୁର୍ବୃତ୍ତ ପ୍ରାୟ ୨ ଟନ୍ ଓଜନର ଲୁହା ପ୍ଲେଟ୍ ସମେତ ଅନ୍ୟାନ୍ୟ ସାମଗ୍ରୀ ଚୋରି କରି ନେଇଥିବା ନେଇ ବୁଧବାର ଅପରାହ୍ନରେ ଥାନାରେ ଲିଖିତ ଅଭିଯୋଗ କରିଛନ୍ତି। ଏ ନେଇ ଥାନା କେସ୍ ନଂ ୨୬୮/୨୪ ରେ ଏକ ମାମଲା ରୁଜୁ କରି ପୋଲିସ ତଦନ୍ତ ଚଳାଇଛି।