ଚାନ୍ଦବାଲି,୧୨ା୫(କିଷାନ ପାତ୍ର)-ପୋଷା କୁକୁରକୁ ନିଶା ଦେଇ ଘରେ କଳାକନା ବୁଲାଇଲେ ଚୋର। ଲକ୍ଷାଧିକ ଟଙ୍କାର ସୁନା ଅଳଙ୍କାର ସହ ଟଙ୍କା ଚୋରି କରିନେଲେ। ଏଭଳି ଏକ ଘଟଣା ଘଟିଛି ଭଦ୍ରକ ଜିଲା ଚାନ୍ଦବାଲି ଥାନା ଅଧୀନ ଉତୁକୁଡା ଗାଁରେ। ଉକ୍ତ ଗ୍ରାମର ରଞ୍ଜିତ ନାୟକଙ୍କ ପୋଷା କୁକୁରକୁ ନିଶା ଦେଇ ଘରୁ ଚୋରି କରାଯାଇଥିବା ନେଇ ଚାନ୍ଦବାଲି ଥାନାରେ ଲିଖିତ ଅଭିଯୋଗ ହୋଇଛି।
ରଞ୍ଜିତ କରିଥିବା ଅଭିଯୋଗ ଅନୁଯାୟୀ, ଶନିବାର ବିଳମ୍ବିତ ରାତିରେ ତାଙ୍କ ପରିବାର ଲୋକେ ଶୋଇବା ପରେ ଚୋରମାନେ ରଡ୍ ମାଧ୍ୟମରେ ଘରର କବାଟ ତାଡ଼ି ଭିତରେ ପଶିଥିଲେ। ଚୋରମାନେ ତାଙ୍କ ପୋଷା କୁକୁରକୁ ନିଶା ଦେଇ ସଂଜ୍ଞାହୀନ କରି ଦେଇଥିଲେ। ରବିବାର ସକାଳେ କୁକୁର ଚେତାଶୂନ୍ୟ ହୋଇ ପଡ଼ି ରହିଥିବା ସେମାନେ ଦେଖିବାକୁ ପାଇଥିଲେ।
ଚୋରମାନେ ବାକ୍ସ ଟେକି ନେଇ ସେଥିରେ ଥିବା ସୁନା କାନଫୁଲ, ଚୁଡ୍, ପଟି, ହାର, ମୁଦି ଅଳଙ୍କାର ସହ ମହିଳା ମଣ୍ଡଳରେ ଡିପୋଜିଟ ଟଙ୍କା, ଏଲ୍ ଆଣ୍ଡ୍ ଟି ମଣ୍ଡଳରୁ ଆଣିଥିବା ୬୫ ହଜାର ଲୋନ୍ ଟଙ୍କା ଏମିତି ୩ ଲକ୍ଷରୁ ଅଧିକ ଟଙ୍କାର ଜିନିଷ ଚୋରି କରି ନେଇଛନ୍ତି। ଜିନିଷପତ୍ର ନେଇଯାଇ ବାକ୍ସ ବାହାରେ ଫିଙ୍ଗି ଦେଇଛନ୍ତି। ରଞ୍ଜିତ ଜଣେ ରାଜମିସ୍ତ୍ରି ଭାବେ କାମ କରିବା ସହ ଘର ପାଖରେ ଛୋଟ ଦୋକାନ କରି ଚଳୁଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି।