ପରଜଙ୍ଗ,୩।୧୦(ଡି.ଏନ୍.ଏ.): ଢେଙ୍କାନାଳ ଜିଲା ପରଜଙ୍ଗ ଥାନା ମହାବିରୋଡ଼ ଫାଣ୍ଡି ଅନ୍ତର୍ଗତ ପଙ୍ଗାତିରା ପଞ୍ଚାୟତ କାର୍ଯ୍ୟାଳୟରୁ ବିପୁଳ ପରିମାଣର କୋଭିଡ ସାମଗ୍ରୀ ଚୋରି ହୋଇଛି। ଏନେଇ ଥାନାରେ ଏତଲା ମଧ୍ୟ ହୋଇଛି। ଚୋରି ସାମଗ୍ରୀର ଆନୁମାନିକ ମୂଲ୍ୟ ପ୍ରାୟ ୫ ଲକ୍ଷ ଟଙ୍କା ହେବ ବୋଲି ଆକଳନ କରାଯାଇଛି।
ପୋଲିସ ସୂଚନା ମୁତାବକ, କରୋନାର ପ୍ରଥମ ଲହର ସମୟରେ ପଙ୍ଗାତିରା ପଞ୍ଚାୟତକୁ କୋଭିଡ୍ ସେଣ୍ଟର ଭାବେ ବ୍ୟବହାର କରାଯାଉଥିଲା। ତେବେ ସେହି ସମୟରେ ବ୍ୟବହାର ହୋଇଥିବା ସାମଗ୍ରୀ ଓ ଅବ୍ୟବହୃତ କିଛି ନୂଆ ସାମଗ୍ରୀ ଚୋରି ହୋଇଛି। ଏକ ଡିଜେଲ ଜେନେରେଟର ସେଟ୍, ୨୦୦ଟି ସପ, ୨୦୦ଟି ମଗ, ୨୦୦ଟି ବେଡ୍ଶିଟ, ୧୫ଟି ଚୌକି, ୨ଟି ଟେବୁଲ, ୧୫୦ଟି ସୋଲାର ଆଲୋକ ସହିତ ସରକାରୀ କାଗଜପତ୍ର ଚୋରି ହୋଇଛି। ଏଥିରେ ଗ୍ରାମବାସୀ ପଞ୍ଚାୟତର ସରପଞ୍ଚ ଓ ରାତ୍ରି ଜଗୁଆଳିଙ୍କୁ ଦାୟୀ କରୁଛନ୍ତି। ଏ ନେଇ ପଞ୍ଚାୟତ ନିର୍ବାହୀ ଅଧିକାରୀ ଥାନାରେ ଏତଲା ଦେବା ପରେ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।